ആദ്യം ശ്രദ്ധിച്ച് തുടങ്ങേണ്ടത് ഭക്ഷണ ശീലത്തിൽ നിന്നാണ്. കൂടാതെ പതിവായി ചെയ്യുന്ന വ്യായാമവും ഇതിൽ ഒരു പ്രധാന പങ്ക് വഹിക്കുന്നു. അനാരോഗ്യകരമായ ഭക്ഷണവും വ്യായാമത്തിന്റെ കുറവും ഈ ദിവസങ്ങളെ കൂടുതൽ അനാരോഗ്യകരവും വേദനയുള്ളതുമാക്കി മാറ്റിയേക്കാം. ആർത്തവ ദിനങ്ങളിൽ ആരോഗ്യത്തോടെ തുടരാൻ നിങ്ങൾ ഒഴിവാക്കേണ്ട ചില കാര്യങ്ങളുണ്ട്.
വ്യായാമം വേണ്ടെന്ന് വെക്കേണ്ട
ആർത്തവ ദിനങ്ങളിൽ എവിടെയെങ്കിലും ചടഞ്ഞു കൂടിയിരിക്കാനാണ് പലർക്കും ഇഷ്ടം. ഈ ദിവസങ്ങളിൽ വ്യായാമം ചെയ്യുന്നത് ചിലർക്കെങ്കിലും ചിന്തിക്കാവുന്നതിനേക്കാൾ അപ്പുറത്തുള്ള കാര്യമാണ്. എന്നാൽ വ്യായാമം ഒഴിവാക്കാതിരുന്നാൽ ആർത്തവ ദിനങ്ങളിലെ അസ്വസ്ഥതയും കുറയ്ക്കാം. ആർത്തവകാല ലക്ഷണങ്ങളായ തലവേദന, ക്ഷീണം, ഉത്കണ്ഠ എന്നിവയെ കുറയ്ക്കാനും വ്യായാമം സഹായിക്കും. ഇത് കൂടാതെ ഉന്മേഷവതികളാക്കി മാറ്റിക്കൊണ്ട് വേദനകളെ നേരിടാനുള്ള ഊർജ്ജം പകർന്നു തരാനും വ്യായാമത്തിന് കഴിയും.
ഉപ്പ് കൂടുതലുള്ള ഭക്ഷണം ഒഴിവാക്കൂ…
ആ ദിവസങ്ങളിൽ ചിലർക്ക് ചില പ്രത്യേക ഭക്ഷണങ്ങളോട് ആസക്തി തോന്നാറുണ്ട്. ചിലർക്ക് ഉപ്പ് കൂടുതൽ അടങ്ങിയ കഴിക്കാൻ താല്പര്യമേറും. ഫ്രൈകളും ചിപ്സുകളുമൊക്കെ കഴിക്കാൻ പലർക്കും ഇഷ്ടമായിരിക്കും. എന്നാൽ ആർത്തവ ദിവസങ്ങളിൽ ഉപ്പ് അടങ്ങിയ ഭക്ഷണങ്ങൾ കൂടുതൽ കഴിക്കുന്നത് ആർത്തവകാല ലക്ഷണങ്ങളെ കൂടുതൽ വഷളാക്കിയേക്കാം.
പാലുൽപ്പന്നങ്ങൾ കൂടുതലാണോ?
പാലുല്പന്നങ്ങൾ ഈ ദിവസങ്ങളിൽ കൂടുതലായി ഉപയോഗിക്കുന്നവരാണോ? മാസമുറയുടെ സമയത്ത് ഐസ് ക്രീം, ചീസ്, ബട്ടർ തുടങ്ങിയ പാലുല്പന്നങ്ങളുടെ ഉപയോഗം കുറയ്ക്കേണ്ടതുണ്ട്. കാരണം ഇവ ചിലരിൽ ഗ്യാസ് ട്രബിൾ പോലുള്ള ദഹന പ്രശ്നങ്ങൾ ഉണ്ടാക്കിയേക്കാം.
കാപ്പി കുടിക്കുമ്പോൾ
രാവിലെയും വൈകുന്നേരവും ഒക്കെയായി ഇടയ്ക്കിടെ കാപ്പിയും ചായയും കുടിക്കാൻ ഇഷ്ടപ്പെടുന്നവരോട് ഇത് കുറയ്ക്കണമെന്നോ അല്ലെങ്കിൽ ഒഴിവാക്കണമെന്നോ പറഞ്ഞാൽ എങ്ങനെയിരിക്കും? ആർത്തവ ദിനങ്ങളിലാണെങ്കിൽ ഇത്തരത്തിൽ ഇടവിട്ടുള്ള കാപ്പികുടി ഒഴിവാക്കണം. കാരണം ഇതിൽ അടങ്ങിയിരിക്കുന്ന കഫീൻ ധാതുക്കൾക്ക് ആർത്തവ ലക്ഷണങ്ങളുടെ അസ്വസ്ഥതകളെ വഷളാകുവാനുള്ള ശേഷിയുണ്ട്.
ഒരു സാനിറ്ററി നാപ്കിൻ എത്രനേരം ഉപയോഗിക്കും?
ആർത്തവ ദിനങ്ങളിൽ കൃത്യമായ ഇടവേളകളിൽ പാഡുകൾ മാറ്റി ഉപയോഗിക്കേണ്ടത് പ്രധാനമാണ്. പല സ്ത്രീകളും തങ്ങളുടെ മാസമുറയുടെ സമയങ്ങളിൽ ഒരേ പാഡുകൾ തന്നെ ദീർഘനേരം ഉപയോഗിക്കാറുണ്ട്. ഇത് അനാരോഗ്യകരമായ ശീലമാണ്. ദുർഗന്ധവും അണുബാധയും ഒക്കെ ഉണ്ടാവുന്നത് ഒഴിവാക്കാനായി ഓരോ 3 മുതൽ 4 മണിക്കൂറിനിടയിലും പാഡ് മാറ്റി പുതിയത് ഉപയോഗിക്കാൻ ശ്രദ്ധിക്കണം.
ഉറക്കത്തിന് വിട്ടുവീഴ്ച വേണ്ട
ആരോഗ്യമുള്ള ഒരു ശരീരത്തിന് 6 മുതൽ 7 മണിക്കൂർ വരെ നല്ല ഉറക്കം നൽകേണ്ടത് അത്യാവശ്യമാണ്. നിങ്ങളുടെ ആർത്തവ കാല നാളുകളിലാണ് ഇത് കൂടുതൽ പ്രാധാന്യമർഹിക്കുന്നത്. പതിവിലും കുറച്ച് മണിക്കൂർ മാത്രം ഉറങ്ങുന്നത് മൂലം ശരീരത്തിലെ സ്ട്രെസ് ഹോർമോണായ കോർട്ടിസോളിൻ്റെ അളവ് വർദ്ധിപ്പിക്കപ്പെടുകയും ഈ ദിനങ്ങളിൽ നിങ്ങൾക്ക് അസന്തുലിതമായ മാനസികവസ്ഥകളും ഉത്കണ്ഠകളും ഉണ്ടാകുകയും ചെയ്യുന്നു. ഇത് നിങ്ങളുടെ മാസമുറയുടെ തീവ്രതയെ ഏറ്റവും ദോഷകരമായി ബാധിച്ചേക്കാനിടയുണ്ട്.
