കോട്ടയം: ശരീരത്തിലെ പരിക്കുകൾ ഭേദമാക്കുന്നതിനും കോശ പുനരുജ്ജീവനത്തിനും സഹായകമാകുന്ന ജൈവ പോളിമർ ഉത്‌പന്നങ്ങൾ വികസിപ്പിച്ചെടുക്കുന്നതിന് ബ്രസീൽ, റഷ്യ, ഇന്ത്യ ചൈന, സൗത്ത് ആഫ്രിക്ക (ബ്രിക്സ്) എന്നീ രാജ്യങ്ങൾ ചേർന്ന് രൂപം കൊടുത്തിട്ടുള്ള ഗവേഷണ പദ്ധതിക്ക് നേതൃത്വം നൽകാൻ മഹാത്മാഗാന്ധി സർവകലാശാല.
നാനോ സെല്ലുലോസ് സാങ്കേതികവിദ്യ പ്രയോജനപ്പെടുത്തി ജൈവപോളിമർ ഉപയോഗിച്ച് ഇതിനാവശ്യമായ ഉത്‌പന്നങ്ങൾ നിർമിക്കുകയാണ് ലക്ഷ്യം. നാനോ, പോളിമർ ഗവേഷണത്തിൽ, വൈസ് ചാൻസലർ പ്രൊഫ. സാബു തോമസിന്റെ നേതൃത്വത്തിൽ മഹാത്മാഗാന്ധി സർവകലാശാല കൈവരിച്ച നേട്ടങ്ങളാണ് ഈ ഗവേഷണ പദ്ധതിക്ക് സർവകലാശാലയെ അർഹമാക്കിയത്.
ബ്രിക്സ് രാജ്യങ്ങളിൽനിന്നുള്ള ശാസ്ത്രജ്ഞരുടെ സഹകരണത്തോടെ എം.ജി.സർവകലാശാലയിലെ ഇന്റർനാഷണൽ ആൻഡ് ഇന്റർ യൂണിവേഴ്സിറ്റി സെന്റർ ഫോർ നാനോസയൻസ് ആൻഡ് നാനോടെക്നോളജി ഗവേഷണം ഏകോപിപ്പിക്കും.
പ്രൊഫ. നന്ദകുമാർ കളരിക്കൽ, ഡോ. രാജി എന്നിവരും ഗവേഷകരായിരിക്കും.ചൈനയിലെ ഹുവാങ് ഷോങ് യൂണിവേഴ്സിറ്റി ഓഫ് സയൻസ് ആൻഡ് ടെക്നോളജിയിലെയും റഷ്യയിലെ നാഷണൽ റിസർവ്വ് ഒഗറേവ് മെർസോവിയ സ്റ്റേറ്റ് യൂണിവേഴ്സിറ്റിയിലെയും സംഘങ്ങളും ഗവേഷണത്തിൽ പങ്കുചേരുമെന്ന് വൈസ് ചാൻസലർ പ്രൊഫ. സാബു തോമസ് അറിയിച്ചു.
Content Highlights: M.G University to lead cell recreation research programme
