ന്യൂയോർക്ക്: കോവിഡ് 19 പകർച്ചാവ്യാധിയുടെ കാലത്ത് കൂടുതൽ പേർ ഓൺലൈനിലേക്ക് വരുന്നുണ്ടെങ്കിലും ലോകജനസംഖ്യയിൽ 37 ശതമാനം പേർ (ഏകദേശം 300 കോടിയോളം പേർ) ഇന്റർനെറ്റ് ഒരിക്കലും ഉപയോഗിച്ചിട്ടില്ലാത്തവർ ആണെന്ന് ഐക്യരാഷ്ട്രസഭ.
വികസ്വര രാജ്യങ്ങളിലെ 290 കോടി ജനങ്ങളിൽ 96 ശതമാനവും ഇതുവരെ ഇന്റർനെറ്റ് ഉപയോഗിച്ചിട്ടില്ലാത്തവരാണെന്ന് ഐക്യരാഷ്ട്ര സഭയിലെ അന്തർദേശീയ ടെലി കമ്മ്യൂണിക്കേഷൻ യൂണിയൻ (ഐടിയു) കണക്കാക്കി.
അതേസമയം ഓൺലൈനിലേക്ക് കടന്ന ജനങ്ങളുടെ എണ്ണം 2019ൽ 410 കോടി ഉണ്ടായിരുന്നത് 2021 ആയപ്പോൾ 490 കോടിയിലെത്തിയതായി ഐടിയു പറഞ്ഞു. ഇതിൽ തന്നെ ലക്ഷക്കണക്കിനാളുകൾ സ്ഥിരമായി ഇന്റർനെറ്റ് ഉപയോഗിക്കാത്തവരും, മറ്റുള്ളവരുടെ ഉപകരണങ്ങളിൽ ഇന്റർനെറ്റ് ഉപയോഗിക്കുന്നവരും കണക്ഷൻ വേഗത പ്രശ്നങ്ങൾ നേരിടുവരുമാണ്.
കോവിഡ് പ്രതിസന്ധിയുടെ ആദ്യ വർഷം ആഗോള തലത്തിലുള്ള ഇന്റർനെറ്റ് ഉപഭോക്താക്കളുടെ എണ്ണത്തിൽ 10 ശതമാനം വർധനവുണ്ടായിട്ടുണ്ട്. ഒരു ദശാബ്ദത്തിൽ ഉണ്ടായിട്ടുള്ള ഏറ്റവും വലിയ വളർച്ചയാണിത്. ലോക്ക്ഡൗൺ, സ്കൂൾ അടക്കൽ, ഇന്റർനെറ്റ് ബാങ്കിങ് ഉപയോഗിക്കേണ്ടതിന്റെ ആവശ്യകത എന്നിവയെല്ലാം ഈ വളർച്ചാനിരക്കിനെ സ്വാധീനിച്ചിട്ടുണ്ട്.
എന്നാൽ ഈ വളർച്ചയിലും അസമത്വം നിലനിൽക്കുന്നുണ്ട്. ദരിദ്ര രാജ്യങ്ങളിൽ ഇന്റർനെറ്റ് ലഭ്യത പലപ്പോഴും താങ്ങാനാവുന്നില്ല. വികസനം ഏറ്റവും കുറഞ്ഞ 46 രാജ്യങ്ങളിൽ ഏകദേശം മുക്കാൽ ഭാഗവും ഒരിക്കലും ഇന്റർനെറ്റ് ഉപയോഗിക്കാത്തവരാണ്.
വികസ്വര രാജ്യങ്ങളിൽ ലിംഗ വ്യത്യാസം കൂടുതൽ പ്രകടമായതിനാൽ, യുവാക്കളും പുരുഷന്മാരും നഗരവാസികളും പ്രായമായവരേക്കാളും സ്ത്രീകളേക്കാളും ഗ്രാമപ്രദേശങ്ങളിലുള്ളവരേക്കാളും ഇന്റർനെറ്റ് ഉപയോഗിക്കാൻ സാധിക്കുന്നവരാണ്.
ദാരിദ്ര്യം, നിരക്ഷരത, വൈദ്യുതി ലഭ്യതക്കുറവ്, ഡിജിറ്റൽ അറിവില്ലായ്മ എന്നിവയെല്ലാം ആളുകളെ ഡിജിറ്റൽ സേവനങ്ങളിൽ നിന്ന് അകറ്റിനിർത്തുന്നുണ്ടെന്നും ഐടിയു പറഞ്ഞു.
Content Highlights: Statistics of internet users in the world, United Nations, International Telecommunication Union, Digital Divide
