ന്യൂഡൽഹി: മെസേജിങ് ആപ്ലിക്കേഷനായ വാട്സാപ്പിൽ പേമെന്റ് സേവനത്തിൽ ഉപഭോക്താക്കളുടെ എണ്ണം വർധിപ്പിക്കാൻ നാഷണൽ പെമെന്റ് കോർപറേഷൻ ഓഫ് ഇന്ത്യയിൽ (എൻ.പി.സി.ഐ.) നിന്ന് അനുമതി ലഭിച്ചു. ഉപഭോക്താക്കളുടെ എണ്ണം നാല് കോടിയായി ഉയർത്താം.
തങ്ങളുടെ പേമെന്റ് സേവനം ഉപയോഗിക്കുന്നവരുടെ എണ്ണത്തിലുള്ള പരിധി ഒഴിവാക്കിത്തരണമെന്ന് അധികൃതരോട് വാട്സാപ്പ് അപേക്ഷിച്ചിരുന്നു. നിലവിൽ വാട്സാപ്പ് പേമെന്റിൽ രണ്ട് കോടി ഉപഭോക്താക്കളെ പാടുള്ളൂ എന്ന നിബന്ധനയുണ്ട്. ഈ സാഹചര്യത്തിൽ പേമെന്റ് സേവനത്തിൽ വമ്പിച്ച രീതിയിൽ പ്രചാരം നൽകാനും ഉപഭോക്താക്കളെ ആകർഷിക്കാനും വാട്സാപ്പ് പരിമിതി നേരിട്ടിരുന്നു.
വാട്സാപ്പിന്റെ അപേക്ഷ പരിഗണിച്ച് ഉപഭോക്താക്കളുടെ എണ്ണം ഇരട്ടിയാക്കി ഉയർത്താൻ എൻ.പി.സി.ഐ. അനുമതി നൽകുകയായിരുന്നു. എങ്കിലും പരിധി ഒഴിവാക്കിത്തരണം എന്ന ആവശ്യം അധികൃതർ അംഗീകരിച്ചില്ല.
നാല് കോടി ഉപഭോക്താക്കൾ എന്ന നിബന്ധനയും വാട്സാപ്പിനെ സംബന്ധിച്ചിടത്തോളം വലിയ വിലങ്ങുതടിയാണ്. ഇന്ത്യയിൽ 50 കോടിയിലേറെ വരിക്കാരുണ്ട് വാട്സാപ്പിന്. ഈ ഉപഭോക്താക്കളിൽ വലിയൊരു വിഭാഗത്തെ ലക്ഷ്യമിട്ടാണ് പേമെന്റ് സേവനം അവതരിപ്പിച്ചത് എങ്കിലും എൻ.പി.സി.ഐയുടെ നിബന്ധന കാരണം പേമെന്റ് സേവനത്തിന് പ്രചാരം നേടിയെടുക്കാൻ സാധിക്കാത്ത അവസ്ഥയാണ്.
ഇന്ത്യയിൽ ലഭ്യമായ പേമെന്റ് സേവനങ്ങളിൽ ഗൂഗിൾ പേയ്ക്ക് ഏഴ് കോടി ഉപഭോക്താക്കളാണുള്ളത്. ഫോൺ പേയ്ക്ക് 28 കോടി ഉപഭോക്താക്കളുണ്ട്. വാട്സാപ്പിന് അനുവദിച്ചിരിക്കുന്ന പുതിയ പരിധി എന്ന് മുതലാണ് നിലവിൽ വരികയെന്ന് വ്യക്തമല്ല. ഇതിനകം തന്നെ രണ്ട് കോടിക്കടുത്ത് ഉപഭോക്താക്കളെ സ്വന്തമാക്കാൻ വാട്സാപ്പിന് സാധിച്ചിട്ടുണ്ടെന്നാണ് വാട്സാപ്പ് നൽകുന്ന വിവരം.
കഴിഞ്ഞ വർഷമാണ് എൻ.പി.സി.ഐ. വാട്സാപ്പിന് പേമെന്റ് സേവനങ്ങൾ ആരംഭിക്കാൻ അനുമതി നൽകിയത്. ഇന്ത്യയുടെ വ്യവസ്ഥകൾ പാലിക്കുന്നതുമായ ബന്ധപ്പെട്ട് വർഷങ്ങൾ നീണ്ട നടപടി ക്രമങ്ങൾക്കൊടുവിലാണ് അനുമതി ലഭിച്ചത്.
Content Highlights: WhatsApp Payment, UPI Apps, NPCI, Google Pay, Whatsapp Payment User base
