പലപ്പോഴും പനി ശരീരത്തിൻറെ ഒരു പ്രതിരോധ സംവിധാനം തന്നെയാണ്. ശരീരത്തിലേയ്ക്ക് പുതുതായി ഏതെങ്കിലും വൈറസ് അല്ലെങ്കിൽ ബാക്ടീരിയ പ്രവേശിയ്ക്കുമ്പോൾ ശരീരം അതിനെ പ്രതിരോധിയ്ക്കാനായി ചെയ്യുന്ന മറുവഴിയാണ് പനി. കോവിഡ് 19 ഉൾപ്പെടെയുള്ളവയുടെ ലക്ഷണങ്ങൾ ആയി ആദ്യം വരുന്നത് പനിയാണ്. ചുരുക്കി പറഞ്ഞാൽ ശരീരത്തിൽ അസ്വാഭാവികമായി എന്തോ നടക്കുന്നു എന്നതിൻറെ വ്യക്തമായ സൂചനയാണ് പനി. അതിന് പ്രത്യേക ശ്രദ്ധ കൊടുക്കേണ്ടതിനാൽ ശരീരം സ്വയം തീർക്കുന്ന പ്രതിരോധ മാർഗം.
ഡെങ്കിപ്പനിയും സാധാരണ വൈറൽ പനിയും തമ്മിലുള്ള വ്യത്യാസം:
പനി ഏത് തരമായാലും അത് ഏറ്റവും നേരത്തെ തിരിച്ചറിഞ്ഞുകൊണ്ട് ചികിത്സ ലഭ്യമാക്കേണ്ടത് അത്യാവശ്യമാണ്. ലക്ഷണങ്ങൾ അറിയുകയും സാധാരണ വൈറൽ പനിയും ഡെങ്കിപ്പനിയും തമ്മിലുള്ള വ്യത്യാസം തിരിച്ചറിയേണ്ടതും പ്രധാനമാണ്.
സാധാരണ വൈറൽ പനി ബാധിയ്ക്കുന്നത് വായുവിലൂടെയാണ്. അണുബാധയുണ്ടായ ആളുകളുടെ സ്രവങ്ങൾ വഴി സമ്പർക്കം വരുന്നതാണ് പ്രധാന കാരണം. ഇവർ സ്പർശിച്ച സ്ഥലങ്ങളിൽ നിന്നും ഇത് മറ്റുള്ളവരിലേയ്ക്ക് ബാധിയ്ക്കാനുള്ള സാധ്യതയുണ്ട്. എന്നാൽ ബാധിയ്ക്കാൻ കാരണം കൊതുകുകളാണ്. ഈഡിസ് ഈജിപ്റ്റി എന്ന പ്രത്യേക തരം കൊതുകുകളിൽ നിന്നാണ് ഡെങ്കി ഉണ്ടാകുന്നത്.
വൈറൽ പനി 3 മുതൽ 5 ദിവസം വരെ നീണ്ടുനിൽക്കും. എന്നാൽ ഡെങ്കി ബാധിച്ചാൽ 2 മുതൽ 7 ദിവസം വരെ സാധാരണ പനിയും മറ്റ് അസ്വസ്ഥതകളും നീണ്ടുനിൽക്കാറുണ്ട്. ശരിയായ സമയത്ത് ചികിത്സ നൽകിയില്ലെങ്കിൽ ഡെങ്കി അപകടകരമായ അവസ്ഥയിലേയ്ക്ക് നീങ്ങുകയും ചെയ്യും.
ഗുരുതരമാകുന്ന ഡെങ്കിപ്പനി:
വൈറൽ പനിയേക്കാൾ ഗുരുതരമാകുന്നത് ഡെങ്കിപ്പനിയാണ്. വൈറൽ പനി ബാധിയ്ക്കുന്ന സമയത്ത് ജലദോഷം, ക്ഷീണം, തൊണ്ടവേദന, നേരിയ ശരീര വേദന എന്നിവയാണ് അനുഭവപ്പെടാറുള്ളത്. എന്നാൽ ഡെങ്കി ബാധിച്ചാൽ, കടുത്ത പനി, തലവേദന, സന്ധികളിൽ അസഹനീയമായ വേദന എന്നിവ ഡെങ്കിയുടെ സാധാരണ ലക്ഷണങ്ങളാണ്. എന്നാൽ ചിലരിൽ ശരീര ഭാഗങ്ങളിൽ ചുവന്ന പാടുകളും അനുഭവപ്പെടാറുണ്ട്. ഡെങ്കി ബാധിച്ച ശേഷം 24 മുതൽ 48 ദിവസത്തിനുള്ളിലാണ് ഇത് കണ്ടുവരാറുള്ളത്.
പ്ലേറ്റ്ലെറ്റ് അളവ് കുറയുന്നത് അപകടം:
ലക്ഷണങ്ങൾ അനുഭവപ്പെടുന്നുവെങ്കിൽ അത് സ്ഥിരീകരിയ്ക്കാനായി ഏറ്റവും നല്ല വഴി പ്ലേറ്റ്ലെറ്റ് അളവ് പരിശോധിയ്ക്കുകയാണ്. ഇതിനായി വിശദമായ രക്ത പരിശോധനയും ഡെങ്കി NS 1 ആന്റിജെൻ പരിശോധനയും നടത്തേണ്ടതാണ്. ഡെങ്കി സ്ഥിരീകരിയ്ക്കുന്ന 80 മുതൽ 90 ശതമാനം വരെ ആളുകളിൽ പ്ലേറ്റ്ലെറ്റ് അളവ് ഒരു ലക്ഷത്തിൽ താഴെ ആയി കുറയുന്ന അവസ്ഥ അനുഭവപ്പെടാറുണ്ട്. എന്നാൽ 10 മുതൽ 20 ശതമാനം വരെ ആളുകളിൽ അപകടകരമായ അവസ്ഥയിൽ പ്ലേറ്റ്ലെറ്റ് അളവ് കുറയാറുണ്ട്. 20,000 ത്തിൽ താഴെ മാത്രം പ്ലേറ്റ്ലെറ്റ് അളവ് കുറയുന്നതാണ് ഗുരുതരമായ അവസ്ഥയായി കണക്കാക്കുന്നത്.
ഡെങ്കിപ്പനി പടർന്നു പിടിയ്ക്കുന്ന സമയം:
മഴ, മറ്റ് കാലാവസ്ഥാ വ്യതിയാനങ്ങൾ എന്നിവ സംഭവിയ്ക്കുന്ന ഈ സമയത്ത് ഡെങ്കിപ്പനി പടർന്നു പിടിയ്ക്കുന്നതായാണ് ആരോഗ്യ വിദഗ്ധർ ചൂണ്ടിക്കാട്ടുന്നത്. കേരളം ഉൾപ്പെടെ മറ്റ് പല സംസ്ഥാനങ്ങളിലും സമാനമായ സാഹചര്യം നിലവിലുണ്ട്. മാത്രമല്ല, ഓരോ വർഷവും ഡെങ്കി ബാധിയ്ക്കുന്നവരുടെ എണ്ണത്തിൽ വലിയ വർധന അനുഭവപ്പെടുന്നതായും റിപ്പോർട്ടുകൾ ഉണ്ട്.
DENV -2 അല്ലെങ്കിൽ D2 എന്ന ഡെങ്കി വൈറസ് സ്ട്രൈൻ കൂടുതലായി ബാധിക്കുന്ന അവസ്ഥയാണ് കണ്ടുവരുന്നത്. ഇതാണ് കൂടുതൽ പേരിൽ ഡെങ്കി പിടിപെടാൻ കാരണമാകുന്നത്. ഈ വേരിയന്റുകൾ ബാധിയ്ക്കുന്നവരിൽ ലക്ഷണങ്ങൾ വളരെ വലിയ തോതിൽ അനുഭവപ്പെടുന്നുണ്ട് എന്നാണ് പഠനങ്ങൾ പറയുന്നത്. ഇതിൻറെ ഫലമായി ഇവരിൽ ഡെങ്കി ഹെമറാജിക്ക് ഫീവർ അല്ലെങ്കിൽ ഡെങ്കി ഷോക്ക് സിണ്ട്രോം എന്നീ അവസ്ഥകൾക്ക് വഴിവെയ്ക്കുന്നു.
