ഫെയ്സ്ബുക്ക് പേര് മാറുകയാണ്. ആരും ആദ്യം കേൾക്കുമ്പോൾ അമ്പരന്നുപോയ വാർത്തയാണിത്. വലിയൊരു ജനതയുടെ ജീവിതത്തിന്റെ ഭാഗമായി മാറിയ ഫെയ്സ്ബുക്ക് പേര് മാറ്റുമ്പോൾ ആകാംഷയും അമ്പരപ്പും ഉണ്ടാവാതിരിക്കുന്നതെങ്ങനെ! എന്തായാലും നമ്മൾ ഉപയോഗിക്കുന്ന ഫെയ്സ്ബുക്ക് ആപ്പിന്റേയും ഫെയ്സ്ബുക്ക് വെബ്സൈറ്റിന്റേയും പേര് മാറ്റാനല്ല. മറിച്ച് ഫെയ്സ്ബുക്ക് വെബ്സൈറ്റും, വാട്സാപ്പും, ഇൻസ്റ്റാഗ്രാമുമെല്ലാം അടക്കിവാഴുന്ന ഫെയ്സ്ബുക്ക് ഐഎൻസി എന്ന അമേരിക്കൻ കമ്പനിയുടെ പേരാണ് മാറാൻ പോവുന്നത്. മെറ്റാവേഴ്സ് സാങ്കേതിക വിദ്യകളിലും സേവനങ്ങളിലും ശ്രദ്ധയൂന്നാൻ ലക്ഷ്യമിട്ടുകൊണ്ടാണ് ഈ പേര് മാറ്റമെന്നാണ് റിപ്പോർട്ടുകൾ.
ആളുകൾക്ക് പരസ്പരം കാണാനും സംസാരിക്കാനുമെല്ലാം സാധിക്കുന്ന ഷെയേർഡ് വെർച്വൽ സ്പേസ് ആണ് മെറ്റാവേഴ്സ്. വ്യത്യസ്ത ഉപകരണങ്ങളിലൂടെ ആളുകൾക്ക് ഈ വെർച്വൽ ലോകത്ത് പ്രവേശിക്കാനാവും ഓരോരുത്തർക്കും വെർച്വൽ രൂപമുണ്ടാവും (അവതാർ). പരസ്പരം കാണാനും സംസാരിക്കാനും സാധിക്കും.
മെറ്റാവേഴ്സ് ആണ് ഇന്റർനെറ്റിന്റെ ഭാവി എന്നാണ് മാർക്ക് സക്കർബർഗിന്റെ പ്രവചനം. വെർച്വൽ റിയാലിറ്റി, ഓഗ്മെന്റഡ് റിയാലിറ്റി സാങ്കേതിക വിദ്യകളിൽ കമ്പനിയുടെ പ്രവർത്തനം കേന്ദ്രീകരിക്കാനും സക്കർബർഗ് ഉദ്ദേശിക്കുന്നു.
ഫെയ്സ്ബുക്കിന് പ്രാമുഖ്യം നഷ്ടപ്പെടുന്നു?
2004 ൽ സക്കർബർഗും സഹപാഠികളും ചേർന്ന് ഹാർവാർഡ് സർവകലാശാലയിൽ നിർമിച്ച സോഷ്യൽമീഡിയാ വെബ്സൈറ്റാണ് ഫെയ്സ്ബുക്ക്. പിന്നീട് അത് ആഗോളതലത്തിൽ ലഭ്യമാക്കുകയും വളർച്ച കൈവരിക്കുകയും ചെയ്തു. അന്ന് മുതൽ ഇന്ന് വരെ കമ്പനിയുടെ അടിസ്ഥാന ശിലയായി നിലകൊണ്ട സേവനമായിരുന്നു ഫെയ്സ്ബുക്ക്.
അടുത്തകാലത്ത് കമ്പനി ഏറ്റെടുത്ത ഇൻസ്റ്റാഗ്രാം, വാട്സാപ്പ്, ഒകുലസ് പോലുള്ള ചെറുതും വലുതുമായ സേവനങ്ങളേയും അതിന്റെ ഉപശാഖകളേയുമെല്ലാം നിയന്ത്രിക്കുന്ന മാതൃസ്ഥാപനമായി ഫെയ്സ്ബുക്ക് മാറിയപ്പോഴും ആ പേര് ഒഴിവാക്കാൻ അധികൃതർ തയ്യാറായിരുന്നില്ല. ഫെയ്സ്ബുക്ക് എന്ന വെബ്സൈറ്റിനേയും ഫെയ്സ്ബുക്ക് എന്ന കോർപ്പറേറ്റ് കമ്പനിയേയും വേർതിരിക്കാൻ ഒരു അക്ഷരം പോലും അധികം ചേർക്കാതിരുന്നതിന് അന്ന് കമ്പനി ചെറുതായി കളിയാക്കപ്പെട്ടിരുന്നു.
മെറ്റാവേഴ്സിൽ ശ്രദ്ധയൂന്നുന്ന ഒരു കമ്പനിയായി മാറാനാണ് ഉദ്ദേശിക്കുന്നത് എന്നാണ് റിപ്പോർട്ടുകൾ. അതായത് ഫെയ്സ്ബുക്ക് എന്ന സോഷ്യൽ മീഡിയാ വെബ്സൈറ്റിന്റെ പ്രാമുഖ്യം നഷ്ടപ്പെടുന്നു എന്നർത്ഥം. കമ്പനിയ്ക്ക് പുതിയ പേര് വരുന്നതോടെ ഇൻസ്റ്റാഗ്രാം, വാട്സാപ്പ്, മെസഞ്ചർ, പോലെ കമ്പനിയുടെ കീഴിലുള്ള ഒരു കൂട്ടം ഉൽപ്പന്നങ്ങളിൽ ഒന്ന് മാത്രമായി ഫെയ്സ്ബുക്ക് മാറും.
വിവാദങ്ങളിൽ നിന്നും രക്ഷനേടാനുള്ള ശ്രമം
കഴിഞ്ഞ കുറച്ച് വർഷങ്ങളായി നിരന്തരം വിവാദങ്ങളിൽ അകപ്പെടുന്ന സോഷ്യൽ മീഡിയാ സേവനമാണ് ഫെയ്സ്ബുക്ക്. വിവരച്ചോർച്ച മുതൽ തീവ്രവാദം, വംശീയത, കലാപം, ആത്മഹത്യ ഉൾപ്പടെയുള്ളവ ഫെയ്സ്ബുക്കിന്റൈ സ്വാധീനത്തിൽ സംഭവിക്കുന്നുണ്ടെന്ന ആരോപണങ്ങൾ ഉയർന്നുവരികയും കമ്പനി ക്രൂശിക്കപ്പെടുകയും ചെയ്യുകയുണ്ടായി. ഫെയ്സ്ബുക്ക് വെബ്സൈറ്റിന് നേരെയുള്ള വിമർശനങ്ങൾ പക്ഷെ കമ്പനിയെ മൊത്തത്തിൽ ബാധിക്കുന്ന സ്ഥിതിവിശേഷവും ഉണ്ടായി. അതിന് കാരണമാവുന്നതും സമാനമായ പേര് തന്നെയാണെന്ന് പറയാം.
പ്രവർത്തന മേഖല മറ്റ് പലതിലേക്കും വ്യാപിപ്പിക്കാനുള്ള ശ്രമത്തിലാണ് ഫെയ്സ്ബുക്ക് ഐഎൻസി എന്ന സ്ഥാപനം. ഫെയ്സ്ബുക്ക് വെബ്സൈറ്റിനോ മറ്റ് ഉൽപന്നങ്ങൾക്കോ നേരെയുള്ള വിവാദങ്ങൾ കമ്പനിയെ മൊത്തത്തിൽ ബാധിക്കാതിരിക്കുക എന്ന ഉദ്ദേശവും പേരുമാറ്റമെന്ന തീരുമാനത്തിന് പിറകിലുണ്ടാകാനിടയുണ്ട്.
ഗൂഗിളിനെയും ആൽഫബെറ്റിനേയും മാതൃകയാക്കുമ്പോൾ
1998 ൽ രൂപീകരിക്കപ്പെട്ട ഗൂഗിൾ 2015 ലാണ് പുനസംഘടനയിലൂടെ ആൽഫബെറ്റ് ഐഎൻസി എന്ന കമ്പനിയ്ക്ക് തുടക്കമിട്ടത്. ഇതോടെ ആൽഫബെറ്റിന് കീഴിലാണ് ഗൂഗിൾ. ഗൂഗിളിനെ കൂടാതെ ഫിറ്റ്നസ് വെയറബിൾ സ്ഥാപനമായ ഫിറ്റ്ബിറ്റ്, ഫൈബർ ഇന്റർനെറ്റ് സേവമായ ഗൂഗിൾ ഫൈബർ, വെഞ്ച്വർ കാപ്പിറ്റൽ സ്ഥാപനമായ ജിവി, റോബോട്ടിക് സോഫ്റ്റ് വെയർ സ്ഥാപനമായ ഇൻട്രിൻസിക്, ഓട്ടോണമസ് ഡ്രൈവിങ് സാങ്കേതിക വിദ്യയ്ക്കായുള്ള വേമോ പോലുള്ള സ്ഥാപനങ്ങളും ആൽഫബെറ്റിന് കീഴിലാണ്.
ഈ ഘടനയിൽ പുതിയ പേരിലുള്ള മാതൃസ്ഥാപനത്തിന് കീഴിൽ ഫെയ്സ്ബുക്ക് ഉൾപ്പടെയുള്ള സേവനങ്ങളെ അണിനിരത്താനാണ് കമ്പനിയുടെ ശ്രമം.
ഫെയ്സ്ബുക്കിന്റെ പുതിയ പേര് എന്താവും?
ഫെയ്സ്ബുക്കിന്റെ മാതൃസ്ഥാപനത്തിന്റെ പേര് മാറ്റാൻ പോവുന്നുവെന്ന പ്രഖ്യാപനം വന്നതോടെ കമ്പനിയുടെ പുതിയ പേര് എന്താകും എന്നുള്ള ചർച്ചയിലാണ് സമൂഹ മാധ്യമങ്ങൾ. സോഷ്യൽ മീഡിയാ സ്ഥാപനം എന്നതിൽ നിന്ന് മാറി ഒരു മെറ്റാവേഴ്സ് കമ്പനിയായി മാറാനുള്ള ശ്രമത്തിലാണ് സക്കർബർഗ് തുടക്കമിട്ട കമ്പനി.
എഫ്.ബി. എന്ന ചുരുക്ക പേര് മുതൽ ദി ഫെയ്സ്ബുക്ക് എന്ന പേര് വരെ ആളുകൾ പറയുന്നുണ്ട്. ഹൊറൈസൺ എന്ന പേരും ആളുകൾ നിർദേശിക്കുന്നു. മെറ്റാ വേഴ്സ് കമ്പനിയായതിനാൽ മെറ്റാ (Meta)എന്ന വാക്ക് കൂടി ചേർന്ന പേരായിരിക്കും എന്നും ആളുകൾ പറയുന്നു.
ഒക്ടോബർ 28-ഓടുകൂടി പുതിയ പേര് പ്രഖ്യാപിക്കാനാണ് കമ്പനി പദ്ധതിയിടുന്നത്.
