വളരെ ലാഘവത്തോടെ കൈകാര്യം ചെയ്യുന്ന ഒരു വിഷയം എത്രത്തോളം അപകടം ക്ഷണിച്ചുവരുത്തും എന്ന് വ്യക്തമാക്കാൻ കൂടിയാണ് താഹിറ ഇക്കാര്യം ആരാധകരുമായി പങ്കുവെച്ചത്. ആരോഗ്യത്തിന് ഗുണകരമാകുന്ന ചുരയ്ക്ക ജ്യൂസിന് കയ്പ്പ് രുചി അനുഭവപ്പെട്ടെങ്കിലും അത് അവഗണിച്ചുകൊണ്ട് താൻ കഴിച്ചതാണ് ദുരനുഭവത്തിന് കാരണമായതെന്ന് താഹിറ തൻറെ ഇൻസ്റ്റഗ്രാമിൽ കുറിയ്ക്കുന്നു. ഇക്കാരണത്താൽ 2 ദിവസം ICU വിൽ കിടക്കേണ്ട അവസ്ഥയുണ്ടായി എന്നതാണ് എത്രത്തോളം തീവ്രമാണ് ഇതിൻറെ മറുവശം എന്ന് വ്യക്തമാക്കുന്നത്.
എങ്ങനെയാണ് ചുരയ്ക്ക വിഷമയമാകുന്നത്?
ചുരയ്ക്ക ശരിയായ രീതിയിൽ കഴിച്ചില്ലെങ്കിൽ അത് വിഷ സമാനമാകും, ശരീരത്തിലെ രക്തസമ്മർദ്ദ നില അപകടകരമായ രീതിയിൽ അസന്തുലിതമാകുന്ന അവസ്ഥയിലേയ്ക്ക് കൊണ്ടുചെന്നെത്തിയ്ക്കും. ശരീരത്തിന് ഊർജ്ജം നൽകാനും എന്നാൽ അതേസമയം അടിഞ്ഞുകൂടിയ കൊഴുപ്പ് ഉരുക്കി കളയാനും കഴിയുന്ന മികച്ച പച്ചക്കറി എന്ന നിലയിൽ ചുരയ്ക്ക ഏറെ സ്വീകാര്യത നേടിയതാണ്. അമിതമായ കൊളസ്ട്രോൾ, ഷുഗർ ലെവൽ എന്നിവ നിയന്ത്രിയ്ക്കുന്നതിനും ഇത് ഉപയോഗിച്ച് വരുന്നുണ്ട്.
അപ്പോൾ പ്രശ്നം എവിടെ?
എങ്കിൽപ്പിന്നെ എവിടെയാണ് കുഴപ്പം? വേവിയ്ക്കാതെ ചുരയ്ക്ക ഉപയോഗിക്കുന്നതാണ് പലപ്പോഴും ഇത്തരം പ്രശ്നങ്ങൾക്ക് വഴിവെയ്ക്കുന്നത്. മാത്രമല്ല, കയ്പ് രുചി അനുഭവപ്പെടുന്നുവെങ്കിൽ തീർച്ചയായും അത് വിഷമയമാകും എന്ന് തിരിച്ചറിയുക. നല്ല ചുരയ്ക്ക കൊണ്ട് തയ്യാറാക്കിയ ജ്യൂസിന് ഒരിയ്ക്കലും കയ്പ് രുചി അനുഭവപ്പെടില്ല. എന്നാൽ ചുരയ്ക്ക ജ്യൂസിന് അനുഭവപ്പെട്ട കയ്പ് രുചി സ്വാഭാവികമെന്ന് തെറ്റിദ്ധരിച്ചതാണ് താഹിറ കശ്യപിന് സംഭവിച്ച അബദ്ധം. വിറ്റാമിൻ സി ധാരാളം അടങ്ങിയതിനാലാണ് കയ്പ് രുചി എന്ന് വിശ്വസിച്ച് ജ്യൂസ് മുഴുവനും കുടിയ്ക്കുകയും ചെയ്തു. ഇത് കഴിച്ച ശേഷം അസ്വസ്ഥതകൾ അനുഭവപ്പെട്ടതിനാൽ അടുത്ത ദിവസം തന്നെ ആശുപത്രിയിൽ പ്രവേശിപ്പിച്ചു.
വേവിയ്ക്കാതെ കഴിക്കുന്നത് അപകടം:
അമിത വണ്ണം കുറയ്ക്കൽ, ആരോഗ്യത്തിന് ആവശ്യമായ മിനറലുകൾ നൽകുന്നവ തുടങ്ങിയ ലേബലുകളിൽ ധാരാളം ഹെർബൽ ജ്യൂസുകൾ വിപണിയിൽ ലഭിക്കുന്നുണ്ട്. എന്നാൽ വേവിയ്ക്കതെയുള്ള പച്ചക്കറികൾ ഉപയോഗിച്ച് തയ്യാറാക്കുന്ന ഇത്തരം പായ്ക്കറ്റ് ജ്യൂസുകൾ തീർത്തും അപകടകരമാണ്. ഏറെ നാൾ കേടുകൂടാതെ ഇരിയ്ക്കുന്നതിനായി പലതരം രാസവസ്തുക്കൾ ഉപയോഗിച്ചാണ് ഇവ തയ്യാറാക്കുന്നത്. അതുകൊണ്ട് തന്നെ ഗുണത്തെക്കാൾ ദോഷമാണ് ഇത്തരം ജ്യൂസുകൾ കഴിക്കുന്നത് വഴി ലഭിക്കുക.
പായ്ക്കറ്റുകൾ അല്ലാതെ, വീട്ടിൽ തന്നെ തയ്യാറാക്കി കഴിയ്ക്കുമ്പോഴും വേവിച്ചു മാത്രം ഉപയോഗിക്കുകയാണ് ഏറ്റവും നല്ല രീതി. മറ്റൊന്നും ചേർക്കാതെ വേവിച്ച് സൂപ്പ് രൂപത്തിൽ കഴിയ്ക്കുന്നത് തികച്ചും ആരോഗ്യകരമാണ്. പ്രത്യേകിച്ച് ചുരയ്ക്കയുടെ കാര്യത്തിൽ. വേവിയ്ക്കാതെ കഴിയ്ക്കുകയാണെങ്കിൽ ഇതിലടങ്ങിയിരിക്കുന്ന ടെട്രാ സൈക്ലിക്ക് ട്രിറ്റെർപെനോയിട് അല്ലെങ്കിൽ കുകുർബിറ്റാസിൻസ് ശരീരത്തിന് ദോഷകരമാകുന്ന രീതിയിലേയ്ക്ക് മാറും. ഇത് ദഹന സംബന്ധമായ അസ്വസ്ഥതകൾ ഉൾപ്പെടെ പല പ്രശ്നങ്ങളും സൃഷ്ടിയ്ക്കുകയും ചെയ്യും.
ശ്രദ്ധിയ്ക്കേണ്ട ലക്ഷണങ്ങൾ:
പച്ചക്കറികൾ പൂർണമായും ആരോഗ്യകരമാണ് എന്ന ധാരണയും അവ വേവിയ്ക്കാതെ കഴിയ്ക്കുന്നത് കൂടുതൽ പോഷകങ്ങൾ നൽകും എന്ന ചിന്തയുമാണ് ഏറെപ്പേർക്കും സമാനമായ അബദ്ധങ്ങൾ സംഭവിയ്ക്കുന്നതിന് കാരണമാകുന്നത്. ഇങ്ങനെ സംഭവിച്ചു കഴിഞ്ഞാൽ ഉടൻ തന്നെ ചികിത്സ തേടുന്നത് ഗുരുതരാവസ്ഥയിലെത്തുന്നത് തടയും. സ്വയംചികിത്സ ചെയ്യുന്നത് പ്രശ്നം കൂടുതൽ രൂക്ഷമാകാൻ കാരണമാകും. അതിനാൽ ഇത്തരം ലക്ഷണങ്ങൾ കാണുകയാണെങ്കിൽ പെട്ടെന്ന് തന്നെ ചികിത്സ തേടണം.
*ശ്വാസം എടുക്കാൻ കഴിയാത്ത അവസ്ഥ
*അടിവയറ്റിൽ കടുത്ത വേദന
*അതിസാരം
*ക്ഷീണം
*രക്തം ചർദ്ദിയ്ക്കൽ
*രക്തസമ്മർദ്ദ നില അനിയന്ത്രിതമായി കുറയുന്ന അവസ്ഥ
*മല വിസർജ്ജനത്തോടൊപ്പം രക്തം പുറത്ത് പോകൽ
