ഇന്ത്യയിൽ ബഹിരാകാശ സാങ്കേതികവിദ്യയുടെ വികാസം ലക്ഷ്യമിട്ടു കൊണ്ടുള്ള സ്വകാര്യ കമ്പനികളുടെ കൂട്ടായ്മയായ ഇന്ത്യൻ സ്പേസ് അസോസിയേഷന് (ഐഎസ്പിഎ) തുടക്കമിട്ട് പ്രധാനമന്ത്രി നരേന്ദ്ര മോദി. വൺ വെബ്, ഭാരതി എയർടെൽ, മാപ്പ്മൈ ഇന്ത്യ, വാൽചന്ദ്നഗർ ഇൻഡസ്ട്രീസ്, ആനന്ദ് ടെക്നോളി പോലുള്ള കമ്പനികൾ അസോസിയേഷനിൽ പങ്കാളികളാവും.
ബഹിരാകാശ സാങ്കേതികവിദ്യയുമായി ബന്ധപ്പെട്ട നയപരമായ വിഷയങ്ങളിൽ ഐഎസ്പിഎ, ഐഎസ്ആർഓയുമായി സഹകരിച്ച് പ്രവർത്തിക്കും. ഓൺലൈൻ വീഡിയോ കോൺഫറൻസിലൂടെയാണ് പ്രധാനമന്ത്രി ഇന്ത്യൻ സ്പേസ് അസോസിയേഷന് തുടക്കമിട്ടത്.
ബഹിരാകാശ ഗവേഷണ വ്യവസായരംഗത്ത് സ്വകാര്യ മേഖലയ്ക്ക് വേണ്ട സഹായങ്ങൾ സർക്കാർ നൽകുമെന്ന് നരേന്ദ്ര മോദി പറഞ്ഞു. ഐഎസ്ആർഓയുടെ സൗകര്യങ്ങളും സ്വകാര്യമേഖലയ്ക്ക് പ്രയോജനപ്പെടുത്താൻ തുടന്നുകൊടുക്കുകയാണെന്നും അദ്ദേഹം പറഞ്ഞു.
അമേരിക്കയിൽ സ്പേസ് എക്സ്, ബ്ലൂ ഒറിജിൻ, വിർജിൻ ഗാലക്ടിക് പോലുള്ള സ്വകാര്യ ബഹിരാകാശ കമ്പനികൾക്ക് അവസരം ഒരുങ്ങിയത് പോലെ ഇന്ത്യയിലും ബഹിരാകാശ സാങ്കേതികവിദ്യകളുമായി ബന്ധപ്പെട്ട പദ്ധതികൾക്ക് സ്വകാര്യ കമ്പനികൾക്കും നിക്ഷേപകർക്കും അവസരം ഒരുക്കാനാണ് സർക്കാർ ശ്രമം.
രാജ്യസുരക്ഷ, കാലാവസ്ഥ, പരിസ്ഥിതി, ഗതിനിർണയം, ദുരന്തനിവാരണം ഉൾപ്പടെ ബഹിരാകാശ സാങ്കേതികവിദ്യ പ്രയോഗത്തിൽ വരുന്ന മേഖലകളിൽ സ്വകാര്യ കമ്പനികൾക്ക് ഐഎസ്ആർഓയുടെ സാങ്കേതിക സൗകര്യങ്ങൾ പ്രയോജനപ്പെടുത്താനാവും.
രാജ്യത്തിന്റെ ക്ഷേമത്തിന് ബഹിരാകാശ സാങ്കേതിക വിദ്യയ്ക്ക് പ്രധാന പങ്കുണ്ടെന്ന് മോദി പറഞ്ഞു. നൂതന ആശയങ്ങൾ അവതരിപ്പിക്കാൻ സ്വകാര്യ മേഖലയ്ക്ക് സമ്പൂർണ സ്വാതന്ത്ര്യം നൽകുക, അതിനുള്ള അവസരം കൊടുക്കുന്നരീതിയിൽ പ്രവർത്തിക്കുക, ഭാവിയ്ക്ക് വേണ്ടി യുവാക്കളെ തയ്യാറാക്കുക എന്നിങ്ങനെയാണ് ഈ രംഗത്തെ സർക്കാരിന്റെ സമീപനമെന്നും അദ്ദേഹം പറഞ്ഞു.
രാജ്യത്തെ വിവിധ കമ്പനികളിൽ നിന്നുള്ള പ്രതിനിധികൾ അവതരണ പരിപാടിയിൽ പങ്കെടുത്തു.
Content Highlights: Indian Space Association Launched by prime minister narendra modi
