കേന്ദ്ര പൂളിൽ നിന്നുള്ള കുറവു മലം പ്രതിദിനം സംസ്ഥാനത്ത് 100 മെഗാവാട്ട് വൈദ്യുതിയുടെ കുറവാണ് ഉണ്ടാകുന്നത്. ഇതുവഴി രണ്ട് കോടി രൂപയുടെ നഷ്ടമുണ്ടാകുന്നുണ്ടെന്നും മന്ത്രി പറഞ്ഞതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു.
അതേസമയം, രാജ്യത്ത് കൽക്കരി ക്ഷാമമുണ്ടെന്നും ഇത് വൈദ്യുതി പ്രതിസന്ധിയിലേയ്ക്ക് നയിക്കുമെന്നുമുള്ള റിപ്പോര്‍ട്ടുകള്‍ തള്ളുകയാണ് കേന്ദ്രസര്‍ക്കാര്‍. രാജ്യത്ത് ആവശ്യത്തിനുള്ള കൽക്കരി ബാക്കിയുണ്ടെന്നു കേന്ദ്ര ഊര്‍ജമന്ത്രിയും പ്രതികരിച്ചിരുന്നു. അതേസമയം, കേന്ദ്ര പൂളിൽ നിന്നുള്ള വൈദ്യുതിയുടെ വരവ് കുറഞ്ഞതോടെ ഇതിനോടകം നിരവധി സംസ്ഥാനങ്ങള്‍ ലോഡ്ഷെഡ്ഡിങ് നടപ്പാക്കുന്നുണ്ട്. ഈ സാഹചര്യത്തിൽ പ്രതിസന്ധി സൂക്ഷ്മമായി നിരീക്ഷിക്കുകയാണെന്നും സംസ്ഥാനത്തും പവര്‍കട്ട് വേണ്ടിവന്നേക്കുമെന്നും മന്ത്രി അറിയിച്ചിരുന്നു.
നിലവിൽ സംസ്ഥാനത്ത് മഴ തുടരുന്ന സാഹചര്യത്തിൽ വൈദ്യുതി ഉപഭോഗം കുറവാണ്. എന്നാൽ മഴക്കാലം തീരുന്ന സാഹചര്യത്തിൽ വൈദ്യുതി ഉപയോഗവും വര്‍ധിക്കുമെന്നാണ് കണക്കുകൂട്ടൽ. കൽക്കരി ക്ഷാമം തുടരുന്ന പശ്ചാത്തലത്തിൽ സര്‍ക്കാര്‍ വൈദ്യുതി നിയന്ത്രണം ഏര്‍പ്പെടുത്തിയേക്കുമെന്നും റിപ്പോര്‍ട്ടുകള്‍ വന്നിരുന്നു. സാഹചര്യം വിലയിരുത്താനായി കെഎസ്ഇബി ഉദ്യോഗസ്ഥര്‍ ഞായറാഴ്ച യോഗം ചേരുകയും ചെയ്തിരുന്നു.
Also Read:
കേരളത്തിനു പുറത്തുള്ള 27 താപവൈദ്യുത നിലയങ്ങളിൽ നിന്നാണ് കേരളത്തിന് വൈദ്യുതി ലഭിക്കുന്നത്. ഇതിലെ മൂന്ന് കേന്ദ്രങ്ങളിലാണ് നിലവിൽ വൈദ്യുതി വിതരണത്തിൽ പ്രതിസന്ധഇയുള്ളത്. കേരളത്തിലേയ്ക്ക് വൈദ്യുതി എത്തിക്കുന്ന പ്രധാന നിലയങ്ങള്‍ക്ക സ്വന്തമായി കൽക്കരി ഖനികളുണ്ടെന്നും അവയെ കൽക്കരിക്ഷാമം ബാധിച്ചിട്ടില്ലെന്നും ഇന്നലെ കെഎസ്ഇബി ചെയര്‍മാൻ ഡോ. ബി അശോക് പറഞ്ഞിരുന്നു. എന്നാൽ പ്രതിസന്ധി തുടര്‍ന്നാൽ കേരളത്തെയും വൈദ്യുതി ക്ഷാമം ബാധിക്കും.
കേന്ദ്രത്തിൽ നിന്നു ലഭിക്കുന്ന ആയിരം മെഗാവാട്ട് വൈദ്യുതിയിൽ കുറവുണ്ടായിട്ടുണ്ടെന്നും കൂടംകുളം ആണവനിലയത്തിൽ നിന്ന് മുപ്പത് ശതമാനം വൈദ്യുതി മാത്രമാണ് ലഭിക്കുന്നതെന്നും മന്ത്രി ഇന്നലെ വ്യക്തമാക്കിയരുന്നു.
Also Read:
കൽക്കരി ക്ഷാമം മൂലം ഇതിനോടകം രാജസ്ഥാൻ അടക്കമുള്ള ഉത്തരേന്ത്യൻ സംസ്ഥാനങ്ങള്‍ വൈദ്യുതി നിയന്ത്രണത്തിലേയ്ക്ക് കടന്നിട്ടുണ്ട്. വൈദ്യുതി ക്ഷാമം രൂക്ഷമായതോടെ 10 നഗരങ്ങളിലാണ് രാജസ്ഥാൻ പവര്‍ കട്ട് ഏര്‍പ്പെടുത്തിയത്. വല ഉത്തരേന്ത്യൻ സംസ്ഥാനങ്ങളിലും 14 മണിക്കൂര്‍ വരെയാണ് പവര്‍ കട്ട് ഏര്‍പ്പെടുത്തിയിട്ടുള്ളത്. രാജ്യത്ത് ഉത്പാദിപ്പിക്കുന്ന വൈദ്യുതിയുടെ 70 ശതമാനവും കൽക്കരി ഉപയോഗിച്ചു പ്രവര്‍ത്തിക്കുന്ന താപവൈദ്യുത നിലയങ്ങളിൽ നിന്നാണ്. രാജ്യത്തെ 135 കൽക്കരി വൈദ്യുത നിലയങ്ങളിൽ പകുതിയിലും മൂന്ന് ദിവസത്തേയ്ക്കുള്ള കൽക്കരി മാത്രമാണ് ശേഷിക്കുന്നതെന്നാണ് റിപ്പോര്‍ട്ടുകള്‍. പ്രതിസന്ധിയെ കേന്ദ്രസർക്കാർ ചെറുതാക്കി കാണിക്കുകയാണെന്ന് ആരോപിച്ച് ഡൽഹി സർക്കാരും രംഗത്തെത്തിയിട്ടുണ്ട്.
