മെറ്റബോളിസം കൃത്യമായി നടന്നില്ലെങ്കിൽ പല തരത്തിലുള്ള ആരോഗ്യ പ്രശ്നങ്ങളും തലപൊക്കി തുടങ്ങും. അതിനാൽ തന്നെ മെറ്റബോളിസം ലെവൽ നല്ല രീതിയിൽ നിലനിർത്താനുള്ള കാര്യങ്ങൾ ജീവിതശൈലിയിൽ ഉൾപ്പെടുത്തേണ്ടത് അത്യാവശ്യമാണ്. അതുപോലെ തന്നെ മെറ്റബോളിസം ഇല്ലാതാക്കുന്ന നല്ലതല്ലാത്ത ശീലങ്ങൾ ഇന്ന് തന്നെ ഉപേക്ഷിക്കാനും ശ്രമിക്കാം. അത്തരത്തിൽ നാം ചെയ്യുന്ന 12 തെറ്റായ ശീലങ്ങൾ അറിഞ്ഞ് ഒഴിവാക്കാം:
വളരെ കുറഞ്ഞ അളവ് ഭക്ഷണം കഴിക്കുന്നത്:
ഒരാൾക്ക് ശരീരത്തിനും അധ്വാനത്തിനും അനുസരിച്ചുള്ള കലോറി അടങ്ങിയ ഭക്ഷണങ്ങൾ ഓരോ സമയത്തും ലഭിക്കണം. എന്നാൽ ചിലർ ശരീരത്തിൻറെ പ്രവർത്തനങ്ങൾക്ക് ആവശ്യമായത്രയും ഭക്ഷണം കഴിയ്ക്കാൻ മടി കാണിക്കാറുണ്ട്. ഭക്ഷണത്തിന്റെ അളവ് മാത്രമല്ല, പോഷകങ്ങളുടെ അളവ് കൂടി പരിഗണിച്ചു വേണം ഭക്ഷണം തീരുമാനിക്കാൻ.
ശാരീരികാധ്വനമില്ലാത്ത അവസ്ഥ:
ശാരീരികാധ്വാനം കുറഞ്ഞവരിലും മെറ്റബോളിസം വലിയ തോതിൽ കുറയും. ഇരുന്നുകൊണ്ടുള്ള ജോലി ചെയ്യുകയും മറ്റ് വ്യായാമങ്ങൾ ഒന്നും തന്നെ ചെയ്യാത്തവരിലും മെറ്റബോളിസം നിരക്ക് കുറയും. ദിവസവും കുറഞ്ഞത് അര മണിക്കൂറെങ്കിലും നടക്കാൻ ശ്രദ്ധിക്കണം. പതിവായി ഇരുന്നുകൊണ്ടുള്ള ജോലി ചെയ്യുന്നവരിൽ കുറഞ്ഞ പ്രായത്തിൽ തന്നെ വലിയ ആരോഗ്യ പ്രശ്നങ്ങൾ അനുഭവിക്കേണ്ടി വരും. ഡാൻസ് , യോഗ പോലുള്ളവ ചെയ്യുകയോ വീടിനുള്ളിൽ തന്നെ സ്റ്റെപ്പ് കയറിയിറങ്ങുകയോ ചെയ്യുന്നത് ഇത്തരക്കാരിൽ മെറ്റബോളിസം വർധിപ്പിക്കാൻ സഹായിക്കും.
മധുരം കലർന്ന പാനീയങ്ങളുടെ അമിതോപയോഗം:
അമിതമായ മധുര പാനീയങ്ങളുടെ ഉപയോഗവും മെറ്റബോളിസത്തെ ദോഷകരമായി ബാധിക്കും. ഇൻസുലിൻ ഉദ്പാദനത്തെ ബാധിക്കുക, അമിതവണ്ണം, അപകടകരമായ രീതിയിൽ പ്രമേഹം പിടിപെടുക തുടങ്ങിയവയെല്ലാം മധുര പാനീയങ്ങൾ അമിതമായി കഴിക്കുന്നത് കാരണം ശരീരത്തെ ബാധിക്കും. പഞ്ചസാരയിൽ 50 ശതമാനവും ശരീരത്തിന് ദോഷമുണ്ടാക്കുന്ന ഫ്രാക്ടോസ് ആണ്. അതുകൊണ്ട് തന്നെ മധുര പാനീയങ്ങൾ പതിവായി കഴിക്കുന്നത് മെറ്റബോളിസത്തെ നശിപ്പിക്കും.
ഭക്ഷണത്തിലെ പ്രോട്ടീൻ അളവ് കുറയുന്നത്:
കഴിക്കുന്ന ഭക്ഷണത്തിൽ ആവശ്യത്തിന് പ്രോട്ടീൻ ഇല്ലാത്തത് മെറ്റബോളിസത്തെ ദോഷകരമായി ബാധിക്കും. ശരീരത്തിലെ അമിത കലോറി കൈകാര്യം ചെയ്യാൻ മെറ്റബോളിസം ഉയരെണ്ടത് അത്യാവശ്യമാണ്, ഇതിനായി ഭക്ഷണത്തിൽ പ്രോട്ടീൻ ഉൾപ്പെടുത്തേണ്ടത് അത്യാവശ്യമാണ്.
ഉറക്കക്കുറവ്:
നല്ല ആരോഗ്യത്തിന് നല്ല ഉറക്കം ആവശ്യമാണ്‌. ആവശ്യത്തിന് ഉറക്കം ലഭിക്കാത്തതും ആഴത്തിലുള്ള ഉറക്കം സാധ്യമാകാത്തതും ശരീരത്തെ ദോഷകരമായി തന്നെ ബാധിക്കും. ഹൃദയ സംബന്ധമായ അസുഖങ്ങൾ, പ്രമേഹം, വിഷാദം പോലുള്ള പല തരത്തിലുള്ള ആരോഗ്യ പ്രശ്നങ്ങൾക്ക് ഉറക്കക്കുറവ് വഴിവെക്കും. നന്നായി ഉറങ്ങുന്നില്ലെങ്കിൽ അത് മെറ്റബോളിസ നിരക്ക് കുറയ്ക്കുകയും അമിതവണ്ണത്തിന് കാരണമാകുകയും ചെയ്യും. രാത്രി ഉറക്കം നഷ്ടപ്പെടുന്നവർ പകൽ സമയത്ത് ഉറങ്ങി ശീലിക്കുന്നത് മെറ്റബോളിസത്തെ ബാധിക്കും.
വ്യായാമം ഇല്ലാത്ത അവസ്ഥ:
ശരീരം വർക്ക് ഔട്ട്‌ ചെയ്യുന്നത് മെറ്റബോളിസ നിരക്ക് വർധിപ്പിക്കാൻ സഹായിക്കും, പ്രത്യേകിച്ച് കൈകളിൽ ഭാരം എടുത്തുകൊണ്ടുള്ള വർക്ക് ഔട്ടുകൾ. അമിത കലോറി കുറയ്ക്കാനും മസിൽ മാസ് വർധിപ്പിക്കാനും ഇത് സഹായിക്കും. ശരീരത്തിൽ നിന്ന് കൊഴുപ്പ് നീക്കം ചെയ്തുകൊണ്ട് ആരോഗ്യത്തോടെയിരിക്കാൻ ഇത് സഹായിക്കും.
പ്രഭാത ഭക്ഷണം ഒഴിവാക്കുന്നത്:
ഒരു ദിവസത്തെ ഒഴിച്ചുകൂടാനാകാത്ത ഭക്ഷണം പ്രഭാത ഭക്ഷണമാണ്. ദിവസം മുഴുവനുള്ള ഊർജ്ജം നൽകുന്നതിൽ പ്രഭാത ഭക്ഷണത്തിന് വലിയ പങ്കുണ്ട്. ശരീരത്തിൻറെ മെറ്റബോളിസ നില വർധിപ്പിക്കാൻ സമ്പുഷ്ടമായ പ്രഭാത ഭക്ഷണം കഴിക്കുന്നത് ഗുണം ചെയ്യും. അതുകൊണ്ട് തന്നെ ഒരിയ്ക്കലും പ്രഭാത ഭക്ഷണം ഒഴിവാക്കരുത്. എന്നാൽ പലപ്പോഴും ജോലി തിരക്കുകളും മറ്റും കാരണം പലരും രാവിലെ ഭക്ഷണം കഴിക്കാതിരിക്കുകയോ നാമമാത്രമായി മാത്രം കഴിക്കുകയോ ചെയ്യുകയാണ് പതിവ്.
പതിവായ ആൽക്കഹോൾ ഉപയോഗം:
പതിവായി മദ്യം, വൈൻ എന്നിവ കഴിക്കുന്നത് ശരീരത്തിൻറെ മെറ്റബോളിസം ക്രമാതീതമായി കുറയ്ക്കും. വലിയ ഇടവേളകളിൽ അല്പം മദ്യമോ മറ്റ് ആൾക്കഹോൾ അടങ്ങിയ പാനീയങ്ങളോ കഴിക്കുന്നത് വലിയ ദോഷം ചെയ്യില്ല. എന്നാൽ ഇത് ജീവിതരീതിയുടെ ഭാഗമാക്കി മാറ്റുന്നത് വലിയ ദോഷം ചെയ്യും.
റിഫൈൻഡ് കാർബോഹൈഡ്രേറ്റ് അമിതമായി കഴിക്കുന്നത്:
മുഴു ധാന്യങ്ങൾ, പച്ചക്കറികൾ, പഴങ്ങൾ എന്നിവയിൽ കണ്ടുവരുന്ന കാർബോഹൈഡ്രേറ്റിൽ നിന്ന് വളരെ വ്യത്യാസമുള്ളതാണ് റിഫൈൻഡ് കാർബോഹൈഡ്രേറ്റ്. പഞ്ചസാര, തവിട് കളഞ്ഞ ധന്യ പൊടികൾ എന്നിവയാണ് റിഫൈൻഡ് കാർബോഹൈഡ്രേറ്റ്ന് ഉദാഹരണം. ഇത് ദഹന പ്രക്രിയയുടെ വേഗം കുറയ്ക്കുകയും മെറ്റബോളിസ നില താഴ്ത്തുകയും ചെയ്യും.
കഠിനമായ ഡയറ്റ് :
കഠിനമായ രീതിയിൽ ഡയറ്റ് എടുത്തുകൊണ്ട് വണ്ണം കുറയ്ക്കാൻ ശ്രമിയ്ക്കുന്ന ചിലരുണ്ട്. പരിധിയിലധികം ഭക്ഷണം നിയന്ത്രിച്ചുകൊണ്ട് ഭക്ഷണ ക്രമീകരണം നടത്തുന്നവരിൽ മെറ്റബോളിസം ശരിയായ രീതിയിൽ നടക്കില്ല. ചിലർ ഇതോടൊപ്പം അമിതമായ തോതിൽ വ്യായാമങ്ങളും കൂടി ചെയ്യുകയാണെങ്കിൽ ഇത് വിപരീത ഫലമാണ്‌ നൽകുക. ഭാരം നിയന്ത്രുക്കുന്നതോടൊപ്പം തന്നെ ശരീരത്തിന് ആവശ്യമായ വിറ്റാമിനുകളും മിനറലുകളും ലഭിക്കുന്നുണ്ടെന്ന് ഉറപ്പാക്കണം.
വെള്ളം കുടിയ്ക്കാതിരിക്കുന്ന ശീലം:
ശരീരത്തിലേ എല്ലാ പ്രവർത്തനങ്ങളും മികച്ച രീതിയിൽ നടക്കുന്നതിനായി വെള്ളം അത്യാവശ്യമാണ്. അതുകൊണ്ട് തന്നെ ദിവസം കുറഞ്ഞത് 12 ഗ്ലാസ്‌ വെള്ളമെങ്കിലും കുടിയ്ക്കാനായി ശ്രദ്ധിക്കണം. ആരോഗ്യകരമായ രീതിയിൽ വേണം വെള്ളം കുടിയ്ക്കാൻ, ഭക്ഷണത്തിന് തൊട്ട് മുൻപോ ഭക്ഷണം കഴിച്ച ഉടനെയോ വെള്ളം കുടിയ്ക്കരുത്. മറ്റ് സമയങ്ങളിൽ വെള്ളം കുടിയ്ക്കാം. ഒരു സമയത്ത് വലിയ അളവ് വെള്ളം കുടിയ്ക്കുന്നതിന് പകരം അല്പാല്പമായി വെള്ളം കുടിയ്ക്കുന്നതാണ് ഏറ്റവും നല്ലത്.
സമ്മർദ്ദം:
മാനസിക സമ്മർദ്ദം വർധിക്കുന്നതും മെറ്റബോളിസം കുറയാൻ ഇടയാക്കും. കാരണം വലിയ തോതിൽ സമ്മർദ്ദം അനുഭവിക്കുമ്പോൾ ശരീരത്തിൽ കോർട്ടിസോൾ ഹോർമോൺ അമിതമായി ഉദ്പാദിപ്പിക്കപ്പെടും. ഇത് ഇൻസുലിൻ ലെവൽ അസന്തുലിതമാക്കുകയും മെറ്റബോളിസം കുറച്ചുകൊണ്ട് അമിതവണ്ണത്തിനും അനുബന്ധ പ്രശ്നങ്ങൾക്കും കാരണമാകുകയും ചെയ്യും.
