ഉലുവയില കഴിച്ചാൽ ലഭിക്കും ഗുണങ്ങൾ

എല്ലാ വീടുകളിലേയും അടുക്കളയിൽ ഉറപ്പായും ഉണ്ടാവുന്ന ഒരു ചേരുവ ആയിരിക്കും ഉലുവ. നമ്മൾ തയ്യാറാക്കുന്ന കറികളിലും പലതരം ഭക്ഷ്യ വിഭവങ്ങളിലുമെല്ലാം ഉലുവ ചേർക്കാറുണ്ട്. ആരോഗ്യഗുണങ്ങൾ അനവധിയുള്ളത് ഉലുവയിൽ മാത്രമല്ല അതിൻ്റെ ഇലകളും ഇതുപോലെതന്നെ ഗുണങ്ങൾ ഉള്ളതാണെന്ന കാര്യം അറിയാമോ ? അതുകൊണ്ടുതന്നെ ഇന്ന് നമ്മൾ ചർച്ചചെയ്യുന്നത് ഉലുവയെ കുറിച്ചല്ല. മറിച്ച് അതിൻ്റെ ചെടിയിലെ ഇലകളെ കുറിച്ചാണ്. പണ്ടൊക്കെ ഉലുവ ഇലകൾ കറികളിലും മറ്റും ചേർക്കാനായി ഉപയോഗിച്ചിരുന്നു. എന്നാൽ ഇന്ന് അതിൻറെ ഉപയോഗം വളരെ ഗണ്യമായ രീതിയിൽ കുറഞ്ഞിട്ടുണ്ട്. ഈയൊരു ഇല ഭക്ഷണത്തിൽ ഉൾപ്പെടുത്തുന്നത് പലരീതിയിലും നിങ്ങളുടെ ആരോഗ്യം മെച്ചപ്പെടുത്തുമെന്ന വസ്തുത നിങ്ങൾക്കറിയാമോ? നിങ്ങളുടെ ആരോഗ്യത്തിനായാലും സൗന്ദര്യത്തിനായാലും എണ്ണമറ്റ ഗുണങ്ങളെ നൽകാൻ ശേഷിയുള്ള ഒന്നാണ് ഉലുവയിലകൾ. മുടിക്കും ചർമ്മത്തിനും ഒക്കെ ധാരാളം ഗുണങ്ങൾ നൽകാൻ ഇതിനു ശേഷിയുണ്ടെന്ന് ആയുർവേദം പോലും ശുപാർശ ചെയ്യുന്നുണ്ട്. ഉലുവ ഇലയുടെ നിങ്ങൾക്കറിയാത്ത ചില ഗുണങ്ങളെക്കുറിച്ച് ഇന്ന് സംസാരിക്കാം.

ഭക്ഷണക്രമം മെച്ചപ്പെടുത്താൻ
ഉലുവ ഇലകളിൽ കലോറി കുറവും ലയിക്കുന്ന ഫൈബർ കണ്ടൻറ് കൂടുതലുമാണുള്ളത്. അതുകൊണ്ടുതന്നെ ഭക്ഷണക്രമം നിയന്ത്രിക്കുന്നവർക്കും കലോറി ഉപഭോഗം നിരീക്ഷിക്കുന്നവർക്കുമെല്ലാം അനുയോജ്യമായ ഒന്നാണിത്. ഈ ഇലകൾ ചേർത്ത് തയ്യാറാക്കുന്ന ഭക്ഷണങ്ങൾ കഴിച്ചു കഴിയുന്ന ഒരാൾക്ക് കൂടുതൽ സമയം പൂർണ്ണത അനുഭവപ്പെടുകയും ഇത് വിശപ്പു കുറയ്ക്കുകയും ചെയ്യുന്നു. കഴിച്ച ഭക്ഷണത്തിൽ കൂടുതൽ സംതൃപ്തി തോന്നുന്നതിനൊപ്പം, നിങ്ങളുടെ നെഞ്ചെരിച്ചിൽ പോലുള്ള ലക്ഷങ്ങളെ കുറയ്ക്കാനും ഇതിന് കഴിയും. ഒരു പഠനത്തിൽ പറയുന്നത് ഉലുവയുടെ ഇലകൾ ദഹനത്തെ സഹായിക്കുന്ന ആന്റാസിഡ് മരുന്നുകളായി പ്രവർത്തിക്കും എന്നാണ്. അതിനാൽ തന്നെ ഉലുവ ഇലകൾ ഇനിമുതൽ നിങ്ങളുടെ ഭക്ഷണത്തിൽ ചേർക്കുന്നത് പതിവാക്കാം. ആരോഗ്യകരമായ ദഹനവ്യവസ്ഥ ഉറപ്പാക്കാൻ ഇത് സഹായിക്കും.

ശക്തമായ ആന്റിഓക്‌സിഡന്റ്
ആന്റിഓക്‌സിഡന്റുകളുടെ സമൃദ്ധമായ ഉറവിടമുള്ള ഭക്ഷണങ്ങളാണ് നമ്മുടെ ശരീരത്തിന് ഏറ്റവും ആവശ്യം. ഉലുവ ഇലകളിൽ വിറ്റാമിൻ സി, വിറ്റാമിൻ എ, ബീറ്റ കരോട്ടിൻ എന്നിവയടങ്ങുന്ന പോഷകങ്ങൾ നിറഞ്ഞിരിക്കുന്നു. ഇത് നിങ്ങളുടെ ശരീരത്തിന്റെ രോഗപ്രതിരോധ ശേഷി വർദ്ധിപ്പിക്കുന്നതിലൂടെ ശരീരത്തിന് സംരക്ഷണ വലയം തീർക്കുന്നു. ഒരു പരിധിവരെ സാധാരണ രോഗങ്ങളെ ചെറുത്തു നിർത്താൻ പ്രതിരോധശേഷിയുള്ള ശരീരത്തിന് കഴിയും. ആന്റിഓക്‌സിഡന്റൽ ഗുണങ്ങൾ നിങ്ങളുടെ ചർമ്മത്തിന് തിളക്കവും യുവത്വവും നിലനിർത്താൻ സഹായിക്കുകയും ചെയ്യും. ഈ ഇലകൾ കഴിക്കാനായി തിരഞ്ഞെടുക്കുമ്പോൾ ഇത് അമിതമായി പാകം ചെയ്യുന്നത് ഒഴിവാക്കുക. ഈ ഇലകൾ പാകം ചെയ്യാനുള്ള ഏറ്റവും നല്ല മാർഗം ഇത് ആദ്യം അരിഞ്ഞു കഷണങ്ങളാക്കി വെള്ളത്തിലിട്ട് തിളപ്പിച്ച ശേഷം ഇലകളുള്ള ഈ വെളളം നിങ്ങൾക്ക് കഴിക്കാനുള്ള ഭക്ഷണം തയ്യാറാക്കാൻ ഉപയോഗിക്കുകയാണ്.

കൊളസ്ട്രോളിനും പ്രമേഹത്തിനും എതിരെ പോരാടുന്നു
ഉലുവ ഇലകൾ നിങ്ങളുടെ ഉപാപചയ സംബന്ധമായ ആരോഗ്യ പ്രശ്നങ്ങൾ ഉണ്ടെങ്കിൽ അതിനെ നേരിടുന്നതിന് സഹായകമാണ്. ഉദാഹരണത്തിന്, പ്രമേഹം ടൈപ്പ് 1, ടൈപ്പ് 2 പ്രമേഹം ബാധിച്ചവർക്കുള്ള ഒരു ഔഷധ ചേരുവയാണ് ഇത് എന്ന് ഒരു പഠനം സൂചിപ്പിക്കുന്നു. വാസ്തവത്തിൽ, പ്രമേഹമില്ലാത്ത ആളുകൾക്ക് കൂടുതൽ അളവിൽ മധുരപലഹാരങ്ങൾ കഴിച്ചു കഴിയുമ്പോൾ പോലും ഉലുവ ഇലകൾ കഴിച്ച് കുറച്ചു മണിക്കൂറുകൾക്കുള്ളിൽ ഉണ്ടാവുന്ന ഷുഗർ ലെവൽ വ്യതിയാനങ്ങളെ ഫലപ്രദമായി നിയന്ത്രിച്ചുനിർത്താൻ കഴിയും. കാരണം, ഈ ഇലകൾ ശരീരത്തിന്റെ കാർബ് ടോളറൻസ് വർദ്ധിപ്പിച്ച് ഇൻസുലിൻ പ്രവർത്തനം മെച്ചപ്പെടുത്തുന്നു. ഇത് നിങ്ങളുടെ ശരീരത്തിലെ ഷുഗർ ലെവൽ ഉയരുന്നത് നിയന്ത്രിക്കാൻ സഹായിക്കും. ഉലുവ ഇലകൾ കഴിക്കുന്നതുവഴി ശരീരത്തിലെ കൊളസ്ട്രോൾ നില കുറയ്ക്കുന്നതിനും സഹായം ചെയ്യുമെന്ന് മറ്റു പഠനങ്ങളും സൂചിപ്പിക്കുന്നുണ്ട്. പ്രമേഹ രോഗലക്ഷണങ്ങൾ നേരിടുന്ന ആളാണ് നിങ്ങളെങ്കിൽ ഇതിനെതിരെ പോരാടുന്നതിന് ഉലുവ ഇലകൾ അരച്ച് ഉച്ചഭക്ഷണത്തിനും അത്താഴത്തിനും മുമ്പ് ഒരു സ്പൂൺ കഴിക്കുന്നത് നല്ലതാണ്.

ചർമ്മത്തിലെ പാടുകൾ കുറയ്ക്കാൻ
മുഖക്കുരു പ്രത്യക്ഷപ്പെടുകയും തുടർന്ന് നിങ്ങളുടെ മുഖത്ത് അതിന്റെ അടയാളങ്ങൾ അവശേഷിക്കുകയും ചെയ്യുന്ന ഒരവസ്ഥയെ നിങ്ങൾ മറ്റെന്തിനെക്കാളും വെറുക്കുന്നില്ലേ? എന്നാൽ ഈയൊരു പ്രതിസന്ധി മറികടക്കാൻ നിങ്ങളെ സഹായിക്കുന്ന ഒരു കാര്യം ഉലുവ ഇലകളിൽ ഉണ്ട്. ഉലുവ ഇലകൾ നിങ്ങളുടെ ചർമത്തിൽ പോകാൻ ഏറ്റവും പാടുള്ള പാടുകളെ വരെ കുറയ്ക്കാൻ സഹായിക്കും. ഇതിനായി നിങ്ങൾ ആകെ ചെയ്യേണ്ടത് ഉലുവ പൊടിച്ചെടുത്തതും ഉലുവ ഇലകൾ ചേർത്ത് തിളപ്പിച്ച വെള്ളവും നിങ്ങളുടെ ബാധിത പ്രദേശത്ത് പുരട്ടുക മാത്രമാണ് പതിനഞ്ച് മിനിറ്റ് സൂക്ഷിച്ചതിനെ തുടർന്ന് തുടർന്ന് ഈ വെള്ളം ഉപയോഗിച്ച് കൊണ്ട് കഴുകിക്കളയാം. ഓരോ തവണ പ്രയോഗിക്കുമ്പോഴും നിങ്ങളുടെ ചർമ്മം മെച്ചപ്പെടുന്നത് തിരിച്ചറിയാൻ കഴിയും.

നീളമുള്ളതും ആരോഗ്യമുള്ളതുമായ മുടിയിഴകൾക്ക്
മറ്റുള്ളവർ കണ്ടാൽ അസൂയപ്പെടുന്ന ആകർഷകമായ നീണ്ട തലമുടി നേടിയെടുക്കാൻ ആഗ്രഹമില്ലാത്തവർ ആരാണ്. നീളമുള്ള തിളങ്ങുന്ന മുടിക്കായി ആയുർവേദം ശുപാർശ ചെയ്യുന്ന പ്രധാന ഔഷധ ചേരുവയാണ് ഉലുവ ഇലകൾ. നിങ്ങളുടെ തലയോട്ടിയുടെയും മുടിയുടെയും ആരോഗ്യത്തിന് ഉത്തമമാണ് ഇലകൾ. പതിവ് ഉപയോഗത്തിലൂടെ, കട്ടിയുള്ളതും ഇടതൂർന്നു വളരുന്ന തിളങ്ങിയ മുടി ലഭിക്കുന്നത് നിങ്ങൾ തിരിച്ചറിയും. നിങ്ങളുടെ തലയിൽ ഉലുവ പേസ്റ്റ് പുരട്ടി നാൽപത് മിനിറ്റ് സൂക്ഷിക്കാൻ വയ്ക്കാം. ഉലുവയിലകൾ ഇട്ട് തിളപ്പിച്ച വെള്ളം തണുപ്പിച്ച് ഇത് മുടി കഴുകൻ ഉപയോഗിക്കാം. മുടിയിൽ തേക്കാനുള്ള എണ്ണ കാച്ചാനായി ഉലുവയും അതിൻറെ ഇലകളും കറിവേപ്പിലയും വെളിച്ചെണ്ണയും ചേർത്ത് എണ്ണ തയ്യാറാക്കാം. ഈ നിങ്ങളുടെ തലയിൽ എണ്ണ പുരട്ടി, കഴുകുന്നതിനുമുമ്പ് 30 മിനിറ്റ് സൂക്ഷിക്കുക.

ഉലുവ ഇലകൾ ചേർത്ത ഗ്രീൻ സ്മൂത്തി

പോഷകഗുണങ്ങൾ അടങ്ങിയ ഇലകളും പച്ചക്കറികളും ഒക്കെ ചേർത്ത് തയ്യാറാക്കുന്നതാണ് ഗ്രീൻ സ്മൂത്തി. ഇതിൽ ഉലുവ ഇലകൾ ചേർത്താൽ ലഭിക്കുന്ന ഗുണങ്ങൾ ഇരട്ടിയാകും. ഒരു പിടി ചീര, കാലെ, പുതിന ഇല എന്നിവ എന്നിവയോടൊപ്പം ഉലുവയിലകളും ചേർത്ത് ജ്യൂസറിൽ ഇട്ട് അരച്ചെടുക്കുക. നിങ്ങൾക്ക് അൽപ്പം മധുരം വേണമെങ്കിൽ മിശ്രിതത്തിലേക്ക് ആപ്പിൾ അല്ലെങ്കിൽ വാഴപ്പഴം പോലുള്ള പഴങ്ങളും ചേർക്കാം. തൈര് ചേർക്കുന്നതും നല്ലതാണ്. നിങ്ങളുടെ ശരീരത്തിന് ഏറ്റവും മികച്ച ആരോഗ്യഗുണങ്ങൾ നൽകുന്ന ഒന്നായിരിക്കും ഈ ഗ്രീൻ ഡ്രിങ്ക്.

ഉലുവ ഇലകൾ പൊതുവേ കയ്പ്പ് ഉള്ള ഒന്നാണ്. അതുകൊണ്ടുതന്നെ ചില ആളുകൾക്ക് ഇത് എളുപ്പത്തിൽ കഴിക്കാൻ കഴിഞ്ഞെന്നുവരില്ല. രണ്ട് മുഴുവൻ വാഴപ്പഴം, ഒരു ആപ്പിൾ, ഒരു സ്ട്രോബെറി, കുറച്ച് ഉലുവ ഇലകൾ എന്നിവയെല്ലാം കൂടി ചേർത്ത് കഴിഞ്ഞാൽ നിങ്ങൾക്ക് മധുരമുള്ള ഒരു സ്മൂത്തി ഉണ്ടാക്കാൻ കഴിയും. ഇതിലേക്ക് ചീര ഇലകളും ചേർക്കുക. ആഴ്ചയിൽ ഒരു തവണയിൽ അധികം ഈ സ്മൂത്തി കഴിക്കുന്നില്ലെന്ന് ഉറപ്പാക്കുക.

ഉലുവ ഇലകൾ എത്ര നാൾ കേടുകൂടാതെയിരിക്കും ?
നിങ്ങൾ എവിടെയാണ് ഉലുവ ഇലകൾ സൂക്ഷിക്കുന്നത് എന്നതിനെ ആശ്രയിച്ചിരിക്കും അതിൻ്റെ കാലാവധി. ഈ ഇലകൾ ഫ്രിഡ്ജിൽ സൂക്ഷിക്കുകയാണെങ്കിൽ അവ ആറുമാസം വരെ കേടു കൂടാതെ നിലനിൽക്കും. ഈർപ്പവും ചൂടുള്ള കാലാവസ്ഥയും പച്ചക്കറികളുടെ ഷെൽഫ് ആയുസ്സ് കുറയ്ക്കുകയും അതിൽ പൂപ്പൽ ഉണ്ടാക്കാൻ കാരണമാവുകയും ചെയ്യും. ഓരോതവണയും ഇലകൾ വീണ്ടും ഉപയോഗിക്കാൻ എടുക്കുമ്പോൾ അവ കേടു വന്നിട്ടുണ്ടോ എന്ന് നോക്കുന്നത് എല്ലായ്പ്പോഴും നല്ലതാണ്.