അയമോദക ഇലകളുടെയും അയമോദകത്തിന്റെയും ഗുണങ്ങളെ കുറിച്ച് അറിയാം.
ദഹന പ്രശ്നങ്ങൾക്ക് പരിഹാരം: ഗ്യാസ് ട്രബിൾ, അസിഡിറ്റി, വയറ്റിലെ മറ്റ് അസ്വസ്ഥതകൾ തുടങ്ങിയ പ്രശ്നങ്ങളൊക്കെ പരിഹരിക്കാൻ സഹായിക്കുന്ന മികച്ച പ്രതിവിധിയാണ് അയമോദകം. ഭക്ഷണ ശേഷം ഒരല്പം അയമോദകം ചവയ്ക്കാം. അതല്ലെങ്കിൽ അയമോദകം ചേർത്ത ഭക്ഷണങ്ങൾ ശീലമാക്കാം.
വയറ്റിലെ അസ്വസ്ഥതകൾക്ക്: ഗ്യാസ് സംബന്ധമായ പ്രശ്നങ്ങൾക്ക് അയമോദക വിത്തുകൾ മികച്ച പരിഹാര മാർഗമാണ്. സാധാരണ വയറ്റിൽ അനുഭവപ്പെടുന്ന ചെറിയ അസ്വസ്ഥതകൾ ഒഴിവാക്കാനും ഇവ സഹായിക്കും. കാൽ ടീസ്പൂൺ അയമോദകവിത്ത് ഒരു നുള്ള് ഉപ്പും കുറച്ച് വെള്ളവും ഉപയോഗിച്ച് ചവച്ചരച്ച് കഴിച്ചാൽ വയറ്റിലെ അസ്വസ്ഥതകൾക്ക് വളരെ പെട്ടന്നുതെന്ന ശമനമുണ്ടാകും.
കഫക്കെട്ട് മാറാൻ: കഫക്കെട്ടും ചുമയുമെല്ലാം നിങ്ങളെ അസ്വസ്ഥരാക്കുന്നുണ്ടോ? എങ്കിൽ തേനും കുരുമുളകും മഞ്ഞളും അയമോദക ഇലകളും ചേർത്ത് തിളപ്പിച്ച വെള്ളം കുടിക്കാം. ഇത് കഫക്കെട്ട് അകറ്റുന്നതിനുള്ള മികച്ച ഔഷധമാണ്. ഇത് കുടിക്കുന്നത് ചുമ, ജലദോഷം, കഫക്കെട്ട്, തൊണ്ടവേദന എന്നിവയിൽനിന്ന് ആശ്വാസം നൽകും. കുട്ടികൾക്കും ഇത് വളരെ ഫലപ്രദമായ വീട്ടുവൈദ്യമാണ്.
മൈഗ്രേൻ അകറ്റാം: മൈഗ്രേൻ ഒരിക്കലെങ്കിലും അനുഭവിച്ചവർക്കേ അതിന്റെ ബുദ്ധിമുട്ട് മനസ്സിലാകൂ എന്ന് ചിലരെങ്കിലും പറയാറുണ്ട്. മരുന്നുകൾ മാറി മാറി പരീക്ഷിച്ചിട്ടും ഇതിന്റെ വേദനയിൽ നിന്ന് ആശ്വാസം ലഭിക്കുന്നില്ലേ, എങ്കിൽ അയമോദകം ഇതിന് മികച്ച ഒരു പരിഹാരമാണ്. അയമോദകം ചൂടാക്കി കിഴി കെട്ടി ഇടയ്ക്കിടെ നെറ്റിയിൽ തടവുന്നതും അതിന്റെ ഗന്ധമേൽക്കുന്നതും മൈഗ്രേൻ മൂലമുള്ള അസ്വസ്ഥതകൾ കുറയ്ക്കാൻ സഹായിക്കും.
വീക്കം തടയാം: ശരീരഭാഗങ്ങളിൽ വീക്കം അനുഭവപ്പെടാറുണ്ടോ? എങ്കിൽ ഇത് പരിഹരിക്കാൻ അയമോദകം നല്ലൊരു മരുന്നാണ്. കുറച്ച് അയമോദ ഇലകൾ നിങ്ങൾ കുളിക്കുന്ന വെള്ളത്തിൽ ചേർത്താൽ മതി. നല്ല ആശ്വാസമുണ്ടാകും.
മദ്യപാനം നിർത്താൻ: മദ്യപാനം അങ്ങനെ പെട്ടന്നൊരു ദിവസം അവസാനിപ്പിക്കാൻ ബുദ്ധിമുട്ടാണ്. എന്നാൽ മദ്യത്തോട് മടുപ്പുണ്ടാക്കാൻ അയമോദകത്തിന് കഴിയും. മദ്യത്തോടുള്ള ആസക്തി കുറയ്ക്കാൻ അയമോദകപ്പൊടി മോരിൽ ചേർത്ത് കുടിച്ചാൽ മദ്യപാനത്തിനുള്ള ആഗ്രഹം കുറയ്ക്കാം.
വിഷ ജന്തുക്കളുടെ കടിയേറ്റാൽ: വീടിന് ചുറ്റും എട്ടുകാലി, തേൾ, പഴുതാര പോലുള്ള വിഷ ജന്തുക്കളെ കാണാറുണ്ടോ? ഇവ കടിച്ചാൽ കടുത്ത വേദനയും നീറ്റലും ഉണ്ടാകാറുണ്ട്. ഇങ്ങനെയുണ്ടാകുന്ന അവസരങ്ങളിൽ ഇത്തരം വേദന കുറയ്ക്കാനായി അയമോദക ഇല ചതച്ചത് കടിയേറ്റ ഭാഗത്ത് വെയ്ക്കാം. ഇതോടൊപ്പം പച്ച മഞ്ഞൾ കൂടെ ചേർത്ത് ഉപയോഗിച്ചാൽ മികച്ച ഫലം ലഭിക്കും.
അയമോദകം കഴിക്കാൻ ചില മാർഗ്ഗങ്ങൾ
ചട്ണിയോടൊപ്പം:
എന്നും പലവിധ ചട്ണികൾ നാം തയ്യാറാക്കാറുണ്ട്. അയമോദ ഇലകൾ അരച്ച് പ്രഭാത ഭക്ഷണത്തിനോ ഉച്ച ഭക്ഷണത്തിനോ ചട്ണിയായി ഉപയോഗിച്ചു നോക്കൂ. ഇത് രോഗ പ്രതിരോധ ശേഷി കൂട്ടുമെന്ന് മാത്രമല്ല നല്ല രീതിയിലുള്ള ദഹനത്തിനുംഇത് സഹായിക്കും.
കറിവേപ്പില പോലെ:
അയമോദകവും ഇലകളും ആൻറി ഇൻഫ്ലമേറ്ററി, ആൻറി ബാക്ടീരിയൽ, ആൻറി ഫംഗൽ ഗുണങ്ങളാൽ സമ്പന്നമാണ്. അതുകൊണ്ട് തന്നെ ശരീരത്തിനുണ്ടാകുന്ന ഗുണങ്ങൾ ചെറുതല്ല. നിങ്ങളുടെ ഭക്ഷണത്തിൽ കറിവേപ്പില ചേർക്കുന്നത് പോലെ തന്നെ ഇവയും ചേർക്കാം. അയമോദക ഇലകൾ വെറുതെ ചവച്ചരച്ച് കഴിക്കുന്നതും നല്ലതു തന്നെ ആണ്.
ഇലകൾ വറുത്തെടുക്കാം:
അയമോദക ഇലകൾ എടുത്ത് നന്നായി വറുത്തെടുക്കണം. ഒരു കപ്പ് ചൂടുള്ള മസാല ചായകൂടിയായാൽ മികച്ച കോമ്പിനേഷൻ ആയി.
ജ്യൂസിൽ ചേർക്കാം:
പച്ചക്കറി ജ്യൂസിനൊപ്പം അധിക സ്വാദിന് കുറച്ച് അയമോദക ഇലകൾ കൂടി ചേർത്തു നോക്കൂ. സ്വാദ് ഗംഭീരമാകും. കൂടെ നിങ്ങളുടെ അസുഖങ്ങളും അകറ്റി നിർത്താം.
