പനിയും കൊവിഡ് 19 ഉം:
SARS – CoV – 2 ശരീരത്തിൽ പ്രവേശിക്കുന്നതിന്റെ സാധാരണ ലക്ഷണമാണ് പനി. വൈറസ് ശരീരത്തിലേക്ക് കടക്കുന്നതോടെ രോഗപ്രതിരോധ സംവിധാനം പ്രവർത്തിക്കാൻ തുടങ്ങുമ്പോഴാണ് പനിയും മറ്റ് ലക്ഷണങ്ങളും ശരീരം പുറപ്പെടുവിക്കുന്നത്. വൈറസിനെ തുരത്താൻ പ്രത്യേക ചികിത്സ ഇല്ലാത്തതിനാൽ ലക്ഷണങ്ങളെ ശമിപ്പിക്കാനുള്ള മരുന്ന് നൽകുക മാത്രമാണ് ചെയ്യുന്നത്.
താപനില അളക്കുമ്പോൾ:
പനി ബാധിച്ച ഒരാൾക്ക് ഏത് തരത്തിലുള്ള ചികിത്സ വേണം എന്ന് തീരുമാനിക്കുന്നത് ലക്ഷണങ്ങൾ എത്രത്തോളം തീവ്രമാണ് എന്നത് പരിശോധിച്ചാണ്. പ്രത്യേകിച്ച് ശരീരതാപനില. താപനില കൃത്യമായ രീതിയിൽ കണക്കാക്കേണ്ടത് അത്യാവശ്യമാണ്. അതിനായി ഇക്കാര്യങ്ങൾ ശ്രദ്ധിക്കൂ:
*ഭക്ഷണം കഴിച്ച ഉടനെയോ കുളി കഴിഞ്ഞ ഉടനെയോ താപനില കണക്കാക്കരുത്. പകരം, 15 മിനിറ്റ് കാത്തിരുന്ന ശേഷം ഇത് ചെയ്യാം.
*നിങ്ങൾ മെർക്കുറി തെർമോമീറ്റർ ഉപയോഗിച്ചാണ് താപനില കണക്കാക്കുന്നതെങ്കിൽ നോർമൽ താപനിലയെക്കാൾ താഴെയാവണം സിൽവർ ലൈൻ എന്ന് ഉറപ്പാക്കുക.
*കൃത്യമായ ഫലം ലഭിക്കുന്നതിനായി തെർമോമീറ്റർ നിങ്ങളുടെ നാവിനടിയിലോ കക്ഷത്തിന് താഴെയോ വെയ്ക്കുക.
*കുറഞ്ഞത് രണ്ടോ മൂന്നോ മിനിറ്റ് നേരം തെർമോമീറ്റർ അവിടെ ചേർത്ത് വെയ്ക്കുന്നത് കൃത്യമായ ഫലം കണ്ടെത്താൻ സഹായിക്കും.
പനി എങ്ങനെ പരിചരിക്കാം:
പനി തീവ്രമാണെങ്കിലും അല്ലെങ്കിലും ചില പരിചരണങ്ങൾ അത്യാവശ്യമാണ്. ശരീരത്തിൽ ചൂട് തുടരുന്നതും ദഹന പ്രശ്നങ്ങൾ, ക്ഷീണം പോലുള്ള പ്രശ്നങ്ങളും പനിയുടെ ഭാഗമായി അനുഭവിക്കേണ്ടി വരും. ചെറുതെന്ന് തോന്നുമെങ്കിലും അത്ര ലാഘവത്തോടെ ഈ ലക്ഷണങ്ങളെ കണക്കാക്കരുത്. പനിയുടെ സമയത്ത് ആരോഗ്യതോടെയിരിക്കാൻ ചെയ്യേണ്ട കാര്യങ്ങൾ എന്തെല്ലാമെന്ന് നോക്കാം.
ജലാംശം നിലനിർത്താം:
പനിയുള്ള സമയത്ത് ശരീരത്തിൽ നിർജ്ജലീകരണം അനുഭവിക്കാനുള്ള സാധ്യത വളരെ കൂടുതലാണ്. അതുകൊണ്ട് തന്നെ ജലാംശം നിലനിർത്താനായി ധാരാളം വെള്ളം കുടിക്കേണ്ടത് അത്യാവശ്യമാണ്. ദ്രാവകരൂപത്തിലുള്ള ഭക്ഷണ പദാർത്ഥങ്ങൾ കഴിക്കുന്നതാണ് ഈ സമയത്ത് ഏറ്റവും ഉചിതം. പനിയുടെ തീവ്രത കൂടുന്ന സമയത്ത് ശരീര താപനില നിയന്ത്രിക്കാനായി സ്വയം സ്വീകരിക്കുന്ന മാർഗമാണ് വിയർക്കൽ. വിയർപ്പ് കാരണം ശരീരത്തിലെ ജലാംശം വളരെയധികം നഷ്ടപ്പെടുന്നതാണ് വലിയ തോതിലുള്ള നിർജ്ജലീകരണം സംഭവിക്കാൻ കാരണം. അതിനാൽ ധാരാളമായി വെള്ളം കുടിക്കുക മാത്രമാണ് പ്രതിവിധി. എന്നാൽ തികച്ചും ആരോഗ്യകരമായ ദ്രാവകങ്ങൾ മാത്രമേ കഴിക്കാവൂ. ശുദ്ധ ജലം, അധികം മധുരം ചേർക്കാത്ത വീട്ടിൽ തന്നെ തയ്യാറാക്കിയ ജ്യൂസ് എന്നിവ കഴിക്കാം.
കട്ടിയുള്ള വസ്ത്രങ്ങൾ ഒഴിവാക്കാം:
പനിയുള്ള സമയത്ത് കട്ടിയുള്ള വസ്ത്രങ്ങൾ ധരിക്കാൻ തോന്നുക സ്വാഭാവികമാണ്. തണുപ്പും അസ്വസ്ഥതകളും മറികടക്കാൻ ഇത് സഹായിക്കുകയും ചെയ്യും. എന്നാൽ നേർത്തതും അയാഞ്ഞതുമായ വസ്ത്രങ്ങളാണ് പനിയുള്ള സമയത്ത് ധരിക്കാൻ അനുയോജ്യമായവ. കാരണം ധാരാളം വായുസഞ്ചാരമുള്ള വസ്ത്രങ്ങൾ ധരിക്കുന്നത് അസ്വസ്ഥത കുറയ്ക്കും. മാത്രമല്ല പനി കുറയുന്ന സമയങ്ങളിൽശരീരം നന്നായി വിയർക്കുന്നതിനാൽ ഇടുങ്ങിയ വസ്ത്രങ്ങൾ ധരിക്കുന്നത് അസ്വസ്ഥതയുണ്ടാക്കും. എന്നാൽ പനിയുള്ള സമയത്തെ തണുപ്പിനെ പ്രതിരോധിക്കാനായി ബ്ലാങ്കേറ്റുകളോ കോട്ടുകളോ ഉപയോഗിക്കാം.
നെറ്റിയിൽ തണുപ്പ് നൽകാം:
കുഞ്ഞു നാളിൽ പനി വരുമ്പോൾ അമ്മ സ്നേഹത്തോടെയും കരുതലോടെയും ചെയ്തിരുന്ന കാര്യം ഓർമ്മയുണ്ടോ? അതേ, ഒരു നേർത്ത ടവൽ എടുത്ത് നീളത്തിൽ മടക്കിയെടുത്ത് തണുത്ത വെള്ളത്തിൽ മുക്കി നേർത്ത നനവോടെ നെറ്റിയിൽ നനച്ചിട്ടിരുന്നത് ഓർമ്മയുണ്ടോ? വളരെ ലളിതമെന്ന് തോന്നുമെങ്കിലും ഇങ്ങനെ ചെയ്യുന്നത് പനിയുടെ അസ്വസ്ഥതകൾ കുറയ്ക്കാൻ ഏറെ ഫലപ്രദമാണ്. താപനില വളരെ വേഗത്തിൽ കുറയ്ക്കാനായി ഈ രീതി സഹായിക്കും.
കുളി ഒഴിവാക്കേണ്ട:
പനിയുള്ള ദിവസം മുഴുവൻ കുളിക്കാതിരിക്കുന്നത് അസ്വസ്ഥത വർധിപ്പിക്കുക മാത്രമേ ചെയ്യൂ. അതിനാൽ ദിവസത്തിൽ ഒരു തവണയെങ്കിലും നന്നായി കുളിക്കുന്നത് അസ്വസ്ഥതകൾ കുറയ്ക്കാൻ സഹായിക്കും. ശരീരം മുഴുവൻ ചൂടും അസ്വസ്ഥതയും അനുഭവപ്പെടുന്നുണ്ടെങ്കിൽ തീർച്ചയായും തണുത്ത വെള്ളത്തിൽ ശരീരം മുഴുവൻ കഴുകുന്നത് നല്ലതാണ്. ഇതിന് കഴിയാത്തവർ ബാത്ത് ടവൽ നനച്ച് ശരീരം തണുക്കുന്നതുവരെ തുടച്ചെടുക്കുന്നതും നല്ലതാണ്.
ഭക്ഷണം കഴിക്കണോ?
പനിയുള്ള സമയങ്ങളിൽ സാധാരണ വിശപ്പ് കുറയുകയും രുചിയില്ലായ്മ അനുഭവപ്പെടുകയും ചെയ്യും. എന്നാൽ ചിലർക്ക് അരുചി അനുഭവപ്പെടാത്തതിനാൽ നന്നായി ഭക്ഷണം കഴിക്കാനും സാധിക്കും. യഥാർത്ഥത്തിൽ പനിയുള്ള സമയത്ത് ഭക്ഷണം കഴിക്കുന്നതാണോ ഒഴിവാക്കുന്നതാണോ നല്ലത്? രണ്ടായാലും ചില പ്രശ്നങ്ങൾ ഉണ്ട്. ധാരാളം ഭക്ഷണം കഴിക്കുന്നത് ശരീരത്തിന് കൂടുതൽ ആയാസമുണ്ടാക്കും. ഭക്ഷണം കഴിക്കാതിരിക്കുന്നത് ക്ഷീണവും മറ്റ് പ്രശ്നങ്ങളും വർധിപ്പിക്കും. അതിനാൽ ഒരുപാട് കട്ടിയുള്ള ആഹാരം ഒഴിവാക്കിക്കൊണ്ട് ലഘുവയതും ദ്രാവകരൂപത്തിലുള്ളതുമായ ഭക്ഷണങ്ങൾ കഴിക്കുകയാണ് നല്ലത്.
അടുക്കളയിൽ തന്നെയുണ്ട് ഒറ്റമൂലികൾ:
വീടിന്റെ അടുക്കളയിൽ കാണുന്ന മിക്ക ഉത്പന്നങ്ങളും പനിയ്ക്ക് ഒറ്റമൂലിയായി ഉപയോഗിക്കാം. ആന്റിമൈക്രോബയൽ ഗുണങ്ങളടങ്ങിയ തേൻ ശരീരത്തിലെ അണുബാധയെ ചെറുക്കാൻ സഹായിക്കുന്നു. ഇത് ഇഞ്ചിയുമായി ചേരുമ്പോൾ,ശരീരത്തിന്റെ അസ്വസ്ഥത ലഘൂകരിക്കാനും അണുബാധകൾക്കെതിരെ പോരാടാനും സഹായിക്കും. ആന്റി-ഇൻഫ്ലമേറ്ററി ഗുണങ്ങൾ ഉള്ളതിനാൽ പനിക്കുള്ള വളരെ ഫലപ്രദമായ വീട്ടുവൈദ്യമാണ് വെളുത്തുള്ളി സൂപ്പ്. മല്ലി ചേർത്ത വെള്ളം, തുളസിയില ചായ എന്നിവയും പ്രതിരോധശേഷി വർദ്ധിപ്പിക്കാനും പനിയെ പ്രതിരോധിക്കാനും സഹായിക്കും.
വിശ്രമം പ്രധാനം:
രോഗപ്രതിരോധവ്യവസ്ഥയുടെ പ്രതികരണമാണ് പനി. അതുകൊണ്ട് തന്നെ ഈ സമയത്ത് ശരീരത്തിൽ മറ്റൊരു തരത്തിലുള്ള സമ്മർദ്ദവും ഉണ്ടാകാതിരിക്കേണ്ടത് അത്യാവശ്യമാണ്. പനി ബാധിക്കുമ്പോൾ, രോഗാണുവിനെ ചെറുക്കാൻ രോഗപ്രതിരോധ സംവിധാനത്തിന് ഊർജ്ജം നൽകാൻ ഉറക്കം അത്യാവശ്യമാണ്. നിങ്ങൾ എത്രത്തോളം ഉറങ്ങുന്നുവോ അത്രയും വേഗത്തിൽ നിങ്ങൾ സുഖപ്പെടും.
ചന്ദനം നെറ്റിയിൽ പുരട്ടാം:
ശരീരത്തിന് തണുപ്പ് പകരുന്നതാണ് ചന്ദനം. അതുകൊണ്ട് തന്നെ പനിയുള്ള സമയത്ത് ചന്ദനം അരച്ച് നെറ്റിയിൽ അല്പം കട്ടിയിൽ പുരട്ടുന്നത് നല്ലതാണ്. ഇത് നന്നായി ഉണങ്ങിയ ശേഷം കഴുകി കളയുകയോ വീണ്ടും നനച്ചു കൊടുക്കുകയോ ചെയ്യാവുന്നതാണ്.
ആവശ്യമെങ്കിൽ ചികിത്സ തേടാൻ മടിക്കരുത്:
ഇത്തരം വീട്ടുവൈദ്യങ്ങളിലൊന്നും പനി ശമിക്കുന്നില്ലെങ്കിൽ തീർച്ചയായും ഒരു ഡോക്ടറെ സമീപിക്കുകയും കൃത്യമായ മരുന്നുകൾ കഴിക്കുകയും ചെയ്യേണ്ടത് അത്യാവശ്യമാണ്.
