ഓസ്ട്രേലിയയിലെ പ്രമുഖ ദൃശ്യ പത്ര മാധ്യമ ഗ്രൂപ്പായ 7 നെറ്റ്വർക്ക് നടത്തുന്ന The Voice എന്നാ പ്രോഗ്രാമിലെ ഏറ്റവും പ്രായം കുറഞ്ഞ മത്സരാർത്ഥിയായി അവസരം നേടിയിരിക്കുകയാണ് മലയാളിയും , ഇന്ത്യൻ കമ്യൂണിറ്റിയിലെ തന്നെ ആദ്യത്തെ അഭിമാന താരവുമായ കൊച്ചുമിടുക്കി 12 വയസുകാരി ജാനകി ഈശ്വർ.
ഇന്ന് – ഓഗസ്റ്റ് 09 – ന് (തിങ്കളാഴ്ച)- മെൽബൺ സമയം(AEST) വൈകീട്ട് 07 : 30pm ന് , Channel 7 – ലാണ് ജാനകിയുടെ ഒഡീഷന്റെ ആദ്യ വിധി നിർണ്ണയം നടത്തപ്പെടുന്നത്.
“ഈ പ്രായത്തിൽ എനിക്ക് എന്തെല്ലാം ചെയ്യാനാകുമെന്ന് ലോകത്തിനു കാണിച്ചു കൊടുക്കാനുള്ള അവസരമായാണ് ഞാനിതിനെ കാണുന്നതെന്ന്” ഓഡിഷനിൽ പങ്കെടുത്ത 7 -)൦ ക്ലാസ് വിദ്യാർത്ഥിനിയായ ജാനകി പറഞ്ഞു.
‘ കലാമൂല്യവും , തനതായ ഒരിടവും കണ്ടെത്താനുള്ള കഴിവ് പ്രായാതീതമായി എനിക്കുണ്ട് എന്ന് പറഞ്ഞു കട്ടക്ക് കൂടെ നിൽക്കുന്നത് എന്റെ മാതാപിതാക്കളാണ്. അവരാണ് എനിക്ക് പ്രോത്സാഹനവും, പ്രചോദനവും തരുന്നത്. എന്റെ യുട്യൂബ് ചാനലിൽ ഇടുന്ന പാട്ടുകൾക്ക് നല്ല പ്രോത്സാഹനമാണ് ശ്രോതാക്കളിൽ നിന്നും ലഭിച്ചത് . അതിൽ നിന്നും ആർജ്ജിച്ച ആത്മവിശ്വാസമാണ് എന്നെ ഈ വേദിയിൽ എത്തിച്ചത്’. ജാനകി കൂട്ടിച്ചേർത്തു.
https://www.youtube.com/channel/UCH5uCHkE1-KYthd8H2gWNVA
ഇന്ത്യൻ സംസ്കാരത്തിലും , പൈതൃകത്തിലും ജാനകി അഭിമാനം കൊള്ളുന്നു. കോഴിക്കോട് സ്വദേശിയായ ജാനകിയുടെ അച്ഛൻ അനൂപ് ദിവാകരനും , ഭാര്യ ദിവ്യയും 2007 – ലാണ് ഓസ്ട്രേലിയയിലേക്ക് കുടിയേറിയത്. മെൽബണിൽ അനൂപ് മാനുഫാക്ച്ചറിങ് മേഖലയിലും, ദിവ്യ IT മേഖലയിലാണ് ജോലി ചെയ്യുന്നത് . രണ്ടുപേരും സംഗീതത്തെ ഇഷ്ട്ടപെടുന്നവരും മെൽബണിലെ മലയാള സമൂഹത്തിനു സുപരിചതരുമാണ് .
ജാതി, മത , രാഷ്ട്രീയ ഭേദമന്യേ മലയാളികൾക്കായി വിവിധ അസോസിയേഷനുകൾ നടത്തുന്ന സാംസ്കാരിക പരിപാടികളിലെ സ്ഥിരം സാന്നിധ്യമായ അനൂപ് നല്ലയൊരു ഗായകനും , മികച്ച ആങ്കറുമാണ്. മലയാളം, തമിഴ് ചലച്ചിത്ര പിന്നണി ഗായകനും, സ്റ്റാർ സിങ്ങർ വിജയിയുമായ അരുൺ ഗോപൻ, അനൂപിന്റെ സ്വന്തം സഹോദരനാണ്.
അനുഗ്രഹീത കലാ പാരമ്പര്യമുള്ള ഒരു കുടുംബത്തിലെ ഇളം തലമുറക്കാരി , ഓസ്ട്രേലിയയിലെ ഏറ്റവും ജനപ്രീതിയുള്ള ടെലിവിഷൻ മാമാങ്കത്തിൽ കൂടുതൽ ഉയരങ്ങൾ താണ്ടി, തനതായ ഒരിടം അടയാളപ്പെടുത്തുന്നത് കാണാൻ അനുഗ്രഹാശംസകളുമായി ജിജ്ഞാസാ ഭരിതരായി കാത്തിരിക്കുകയാണ് ഇന്ത്യൻ സമൂഹമാകെ. ഓസ്ട്രേലിയൻ മലയാളികൾക്കാകട്ടെ – കൊച്ചു ജാനകിയുടെ ഓരോ ചുവടും , തങ്ങളുടേതുമാണെന്നാ അഭിമാനവും. സ്വദേശത്തും , വിദേശത്തും നിന്നുമായി അഭിന്ദനങ്ങളുടെ ഒഴുക്കാണ് ഈ കൊച്ചുമിടുക്കിക്ക് നിത്യേന ലഭിക്കുന്നത്. ഈ മാസം – ഓഗസ്റ്റ് 08 – )൦ തീയതി മുതൽക്കാണ് പുതിയ സീസണ് 7 നെറ്റ്വർക്ക് ചാനലിൽ ആരംഭം കുറിക്കുന്നത്. തന്റെ അഭൗമ സംഗീതത്തിന്റെ അലയൊലികൾ, ഓസ്ട്രേലിയൻ സംഗീതാസ്വാദകരെ പുതിയ തലത്തിലേക്ക് കൂട്ടികൊണ്ടുപോകുന്നത് കാണാനും , ആദ്യപാദ ഒഡീഷനിൽ വിജയിച്ചാൽ തുടർന്നുള്ള ഓരോ ഘട്ടത്തിലും പ്രോത്സാഹനങ്ങളും, അഭിപ്രായങ്ങളും നൽകി ഓസ്ട്രേലിയയിലെ മലയാളീ സമൂഹം കുടുംബസമേതം കൂടെയുണ്ടാകും എന്നാണ് കരുതെന്നതെന്ന് ജാനകി ഓസ് മലയാളത്തോട് പറഞ്ഞു.
https://7plus.com.au/the-voice?utm_medium=display_7housead&utm_source=marketing&utm_campaign=thevoice_homepage&utm_content=brand
ഓഗസ്റ്റ് 09 – ന് (തിങ്കളാഴ്ച) മെൽബൺ സമയം(AEST) വൈകീട്ട് 07 : 30pm ന് , Channel 7 – ലാണ് ജാനകിയുടെ ഒഡീഷന്റെ ആദ്യ വിധി നിർണ്ണയം നടത്തപ്പെടുന്നത്. വിധി നിർണ്ണയിക്കാൻ എത്തുന്ന പാശ്ചാത്യ സംഗീത ലോകത്തെ പ്രമുഖ സംഗീതജ്ഞരായ Keith Urban, Rita Ora, Guy Sebastian, Jessica Mauboy എന്നീ വിശ്വ പ്രസിദ്ധരെ നേരിട്ട് കാണാനുള്ള ആകാംക്ഷയിൽ, നെഞ്ചിടിപ്പേറുന്ന കാത്തിരിപ്പിലാണ് ജാനകി ഈശ്വറും, ഓസ്ട്രേലിയൻ പ്രവാസികളായ ഇന്ത്യാക്കാരും.
