കൊവിഡ് 19 പടർന്നുപിടിക്കാൻ തുടങ്ങിയതോടെ കഴിഞ്ഞ ഒരു വർഷത്തിലധികമായി പ്രതിരോഷ ശേഷി വർധിപ്പിക്കുന്ന കാര്യത്തിൽ മിക്കവരും ഏറെ ശ്രദ്ധാലുക്കളാണ്. അതിനായി പല ഹെർബൽ ഡ്രിങ്കുകളും പതിവാക്കിയവരാണ് കൂടുതലും. ഈ ശീലം ആരോഗ്യത്തെ ദോഷകരമായി ബാധിക്കാതിരിക്കാൻ ചില കാര്യങ്ങളിൽ ശ്രദ്ധ വേണം.
ചേരുവകൾ
സാധാരണയായി മഞ്ഞൾ, തുളസി, ഇഞ്ചി, കുരുമുളക്, ഏലയ്ക്ക, കറുവപ്പട്ട തുങ്ങിയവയെല്ലാം ചേർത്താണ് തയ്യാറാക്കുന്നത്. 50 മില്ലിയിലധികം അളവിൽ ഇത്തരം ഹെർബൽ ഡ്രിങ്കുകൾ കുടിക്കുന്നത് അപകടം വിളിച്ചുവരുത്തുന്നതിന് തുല്യമാണ്. ദിവസത്തിൽ പരമാവധി 2 തവണ മാത്രമേ ഹെർബൽ ഡ്രിങ്കുകൾ കുടിക്കാവൂ.
കഴിക്കുന്ന അളവ് അമിതമായാൽ ഹൈപ്പർ അസിഡിറ്റി, ദഹനക്കേട്, വായയിൽ അൾസർ, മൂത്രമൊഴിക്കുന്ന സമയത്ത് നീറ്റൽ പോലെ അനുഭവപ്പെടുക, ചർമത്തിൽ തിണർപ്പ്, മുഖക്കുരു എന്നിവ പോലുള്ള ചില പാർശ്വഫലങ്ങൾ ഉണ്ടാക്കുന്നു.
ചൂടുവെള്ളം കുടിക്കാം:
ശരീരത്തിലെ വിഷവസ്തുക്കളെയും രോഗകാരികളായ ബാക്ടീരിയകളെയും പുറന്തള്ളാൻ ചൂടുള്ള വെള്ളം കുടിക്കുന്നത് വളരെയധികം സഹായിക്കും. ദഹനവ്യവസ്ഥയെ മെച്ചപ്പെടുത്താൻ സഹായിക്കുന്ന ദഹനനാളത്തിന്റെ സ്വാഭാവിക ശുദ്ധീകരണ പ്രക്രിയ ഏറ്റവും നല്ല രീതിയിൽ നടക്കാൻ ചൂടുവെള്ളം കുടിക്കുന്നത് സഹായിക്കും. പതിവായി ചൂടുവെള്ളം കുടിക്കുന്നത് ശ്വസനസംബന്ധമായ എല്ലാ പ്രശ്നങ്ങളെയും മറികടക്കാൻ സഹായിക്കുന്നു. ഇത് ചുമ, തൊണ്ടവേദന എന്നിവയിൽ നിന്ന് മോചനം നൽകും.
എന്നാൽ രോഗപ്രതിരോധ ശേഷി വർദ്ധിപ്പിക്കുന്നതിനായി ആളുകൾ മഞ്ഞൾ, ജീരകം, മല്ലി,വെളുത്തുള്ളി തുടങ്ങിയ സുഗന്ധവ്യഞ്ജനങ്ങൾ അമിതമായി ഉപയോഗിക്കുന്നു. അമിതമായ അളവിലുള്ള ഉപയോഗം തീർച്ചയായും ദോഷം ചെയ്യും. അതെ സമയം ചില നല്ല വശങ്ങളുമുണ്ട്.
ഗുണങ്ങൾ:
ഹെർബൽ ഡ്രിങ്കുകളിൽ ഉപയോഗിക്കുന്ന മിക്ക ചേരുവകളും മസാല വിഭാഗത്തിൽ ഉൾപ്പെടുന്നതാണ്. ഇത് കഴിക്കുന്ന ഭക്ഷണം വേഗത്തിൽ ദഹിപ്പിക്കാൻ സഹായിക്കും, അതുപോലെ മെറ്റബോളിസം വർദ്ധിപ്പിക്കുകയും ചെയ്യുന്നു. സൈനസ് പ്രശ്നങ്ങൾ ഒഴിവാക്കാനും ശ്വസന സംബന്ധമായ പ്രശ്നങ്ങൾ ഒഴിവാക്കാനും ഇത് സഹായിക്കും.
ശരീരഭാരം കുറയ്ക്കാനും ഇവയുടെ ഉപയോഗം സഹായിക്കും. സുഗന്ധവ്യഞ്ജനങ്ങൾക്കെല്ലാം ആൻറി ബാക്ടീരിയൽ ഗുണങ്ങൾ ഉണ്ട്,മാത്രമല്ല, ആൻറി ഓക്സിഡൻറുകളാൽ സമ്പുഷ്ടമാണ്. അതുകൊണ്ട് തന്നെ പ്രതിരോധ ശേഷി വർധിപ്പിക്കാനും സഹായിക്കും.
ദോഷങ്ങൾ:
ഹെർബൽ ഡ്രിങ്കുകളുടെ രൂപത്തിൽ വലിയ അളവിൽ മസാല ഉള്ളിലെത്തുമ്പോൾ അത് ആമാശയത്തിലെ പാളിക്ക് കേടുപാടുകൾ വരുത്തും, ഇത് ഗ്യാസ്ട്രൈറ്റിസ്, ആമാശയ അൾസർ, കുടൽ പുണ്ണ് പോലുള്ള കുടൽ രോഗങ്ങൾ എന്നിവയ്ക്കും കാരണമാകും. മഞ്ഞൾ, ജീരകം, മല്ലി, വെളുത്തുള്ളി തുടങ്ങിയ സുഗന്ധവ്യഞ്ജനങ്ങൾ ചൂട് ഉദ്പാദിപ്പിക്കുന്നതാണ്. അതിനാൽ ശരീരത്തിന്റെ ചൂട് വർദ്ധിപ്പിക്കാൻ ഇവ കഴിക്കുന്നത് കാരണമാകും. രക്തസ്രാവം, ഹിമോറോയിഡുകൾ എന്നിവ അനുഭവിക്കുന്ന ആളുകൾ മഞ്ഞൾ , ജീരകം എന്നിവ ഒഴിവാക്കണം.
ഓയിൽ പുള്ളിങ്:
വയ്ക്കകത്ത് എണ്ണ നിറച്ച് ഗാർഗിൾ ചെയ്യുന്ന രീതിയാണ് ഓയിൽ പുള്ളിങ്. ഇത് വായുടെയും ദഹന നാളത്തിന്റെയും ആരോഗ്യത്തിന് വളരെയധികം സഹായിക്കും. ഇതിനായി വിവിധതരം എണ്ണകൾ ഉപയോഗിക്കാമെങ്കിലും വെളിച്ചെണ്ണയും എള്ള് എണ്ണയുമാണ് സാധാരണയായി ഉപയോഗിക്കുന്നത്. ഈ രീതിയിൽ ചെയ്യുന്നത് കഫ ദോഷങ്ങളെ ഒഴിവാക്കാനും വായുടെ ഉൾവശം ശുദ്ധീകരിക്കുകയും ചെയ്യുന്നു. കൂടാതെ തൊണ്ടയുടെയും ചുണ്ടുകളുടെയും വരൾച്ച തടയുകയും പല്ലിന്റെയും മോണയുടെയും സ്ഥിരത വർദ്ധിപ്പിക്കുകയും ചെയ്യുന്നു.
നാരങ്ങാ വെള്ളം അതിരാവിലെ വേണോ?
സിട്രിക് സ്വഭാവമുള്ളതിനാൽ നാരങ്ങ വളരെയധികം അസിഡിറ്റി ഉണ്ടാക്കുന്നതാണ്. ഒരിക്കലും വെറുംവയറ്റിൽ നാരങ്ങാ നീര് കുടിക്കുന്നത് ശീലമാക്കരുത്. ഇത് ഗ്യാസ്ട്രോ ഓസോഫേഷ്യൽ റിഫ്ലക്സ് ഡിസീസ് (ജിആർഡി), ഗ്യാസ്ട്രിക് അൾസർ തുടങ്ങിയ അവസ്ഥയിലേക്ക് നയിക്കും. ഇത് നെഞ്ചെരിച്ചിൽ ഓക്കാനം, ഛർദ്ദി, മൈഗ്രെയ്ൻ, തലവേദന എന്നിവയ്ക്ക് കാരണമാകും. മറ്റ് സമയങ്ങളിൽ ഇത് ഉപയോഗിക്കാം. എന്നാൽ വലിയ അളവ് ഉപയോഗിക്കുന്നത് എല്ലായ്പ്പോഴും ദോഷം ചെയ്യും.
കുരുമുളക്, നാരങ്ങ, വെളുത്തുള്ളി, കറുവപ്പട്ട എന്നിവ ഉൾപ്പെടെയുള്ള ഹെർബൽ ഡ്രിങ്ക് ഉപയോഗിക്കുമ്പോൾ ഓരോ ചേരുവകളും മിതമായി മാത്രം ഉൾപ്പെടുത്തുക. അതുപോലെ തന്നെ കഴിക്കുന്ന അളവും തവണകളും നിയന്ത്രിക്കുക. പ്രതിരോധ ശക്തിക്ക് കരുത്ത് പകരാനും ചുമ, തുമ്മൽ പോലുള്ള അസുഖങ്ങളെ നിയന്ത്രിക്കാനും ഇത്തരം ഹെൽബൽ ഡ്രിങ്കുകൾ പ്രയോജനം ചെയ്യും.
