കറുവയില ചേർത്ത് ഔഷധ ഗുണങ്ങളുള്ള ചായ തയ്യാറാക്കാം

മിക്ക വീടുകളിലും പാചക ആവശ്യങ്ങൾക്കായി ഉപയോഗിക്കുന്ന ഒരു ചേരുവയാണ് കറുവയില എന്നും അറിയപ്പെടുന്ന വഴന ഇല. ഈ ഇലകളിൽ നല്ല സൗരഭ്യവാസനയുണ്ട്. അതുകൊണ്ട് തന്നെ, നമ്മുടെ പരമ്പരാഗത ഭക്ഷണങ്ങളുടെ രുചിയും വാസനയും വർദ്ധിപ്പിക്കുന്നതിന് പലപ്പോഴും ഇത് ഒരു ചേരുവയായി ഉപയോഗിക്കുന്നു. ബിരിയാണി, കറികൾ, പുലാവ്, സൂപ്പ് മുതലായവയുടെ രുചി അവ എങ്ങനെ ഉയർത്തുന്നുവെന്ന് നമുക്കെല്ലാവർക്കും അറിയാം. എന്നാൽ ഇത് ആരോഗ്യഗുണങ്ങളാൽ സമ്പന്നമാണ് എന്ന കാര്യം നിങ്ങൾക്കറിയാമോ?

ആന്റിഓക്‌സിഡന്റുകൾ, വിറ്റാമിൻ എ, സി, ഇരുമ്പ്, പൊട്ടാസ്യം, കാൽസ്യം, മഗ്നീഷ്യം എന്നിവയുടെ മികച്ച ഉറവിടമാണ് ഈ ഇലകൾ, അതുകൊണ്ടാണ് ഇത് ദഹനനാളത്തിന് അത്ഭുതകരമായ ഗുണങ്ങൾ സൃഷ്ടിക്കുന്നത്. എന്തിനധികം, ഇതിൽ ആൻറി ഡയബറ്റിക്, ഡൈയൂറിറ്റിക്, ഗുണങ്ങളും അടങ്ങിയിട്ടുണ്ട്. വഴന ഇല ചേർത്ത് നിങ്ങൾക്ക് രുചികരമായ ചായ തയ്യാറാക്കാനും സാധിക്കും. വാസ്തവത്തിൽ, ഇത് ആരോഗ്യ ഗുണത്തിന്റെ കാര്യത്തിൽ ഗ്രീൻ ടീയേക്കാൾ വളരെ മികച്ചതാണ് എന്നാണ് പറയപ്പെടുന്നത്.

ഗുണങ്ങൾ അറിയാം
1. 2009 ജനുവരിയിൽ ജേണൽ ഓഫ് ക്ലിനിക്കൽ ബയോകെമിസ്ട്രി ആൻഡ് ന്യൂട്രീഷ്യൻ പ്രസിദ്ധീകരിച്ച പഠനത്തിൽ വഴന ഇലകൾ ടൈപ്പ് 2 പ്രമേഹം നിയന്ത്രിക്കുകയും ഗ്ലൂക്കോസും ലിപിഡ് നിലയും മെച്ചപ്പെടുത്തുകയും ചെയ്യുന്നു എന്ന് കണ്ടെത്തിയിട്ടുണ്ട്. അതിനാൽ, ടൈപ്പ് 2 പ്രമേഹത്തെ ചികിത്സിക്കാൻ വഴന ഇല ചായ വളരെ ഫലപ്രദമാണ്. മാത്രമല്ല, ഇത് ഇൻസുലിൻ സംവേദനക്ഷമത മെച്ചപ്പെടുത്തുകയും ചെയ്യുന്നു.

2. ദഹനനാളത്തെ ഉത്തേജിപ്പിക്കുന്നതിലൂടെയും മൂത്രമൊഴിക്കുന്നതിനെ പ്രോത്സാഹിപ്പിക്കുന്നതിലൂടെയും ദഹനം മെച്ചപ്പെടുത്താൻ വഴന ഇലകൾ ഗുണകരമാണെന്ന് അറിയപ്പെടുന്നു. മലബന്ധം തടയുന്നതിനും ഇത് വളരെ ഫലപ്രദമാണ്.

3. വഴന ഇല ചായ നിങ്ങളുടെ ഹൃദയത്തിന് നല്ലതാണ്. അവയിൽ അടങ്ങിയ പൊട്ടാസ്യം, ആന്റിഓക്‌സിഡന്റുകൾ, ഇരുമ്പ് എന്നിവയുടെ ശക്തമായ സംയോജനമാണ് ഇതിന് കാരണം. ഈ പോഷകങ്ങൾ ഹൃദയ താളം മെച്ചപ്പെടുത്തുവാനും രക്തസമ്മർദ്ദം കുറയ്ക്കുന്നതിനും സഹായിക്കുന്നു.

4. വിറ്റാമിൻ സിയുടെ ഉറവിടമാണ് വഴന ഇല ചായ എന്നതിനാൽ, ഇത് രോഗപ്രതിരോധ ശേഷിക്ക് മികച്ചതും ആൻറി ബാക്ടീരിയൽ ഗുണങ്ങളുള്ളതുമാണ്. ഇത് അണുബാധയെ തടയുന്നതിനും ഫലപ്രദമായി പ്രവർത്തിക്കുന്നു.

5. മെറ്റബോളിസം വർദ്ധിപ്പിക്കുകയും ശരീരഭാരം കുറയ്ക്കാൻ സഹായിക്കുകയും ചെയ്യുന്ന കറുവപ്പട്ടയുടെ ഗുണം വഴന ഇലകളിൽ ഉൾപ്പെടുന്നു.

6. ഈ ചായയ്ക്ക് നിങ്ങളുടെ സമ്മർദ്ദ നില കുറയ്ക്കാനും കഴിയും.

7. ഔഷധഗുണമുള്ളതിനാൽ, വഴന ഇല ചായ കാൻസറിനെ ചികിത്സിക്കാൻ ചിലർ ഉപയോഗിക്കുന്നു.

8. കൂടാതെ, അതിന്റെ ആന്റി ഇൻഫ്ലമേറ്ററി ഗുണങ്ങൾ നിങ്ങളുടെ ശരീരത്തെ വീക്കത്തിൽ നിന്ന് സംരക്ഷിക്കുന്നു.

ഈ ചായ എങ്ങനെ തയ്യാറാക്കാം?
നിങ്ങൾക്ക് ആവശ്യമായ ചേരുവകൾ:

മൂന്ന് വഴന ഇലകൾ
ഒരു നുള്ള് കറുവപ്പട്ട പൊടി
രണ്ട് കപ്പ് വെള്ളം
നാരങ്ങയും തേനും (ആവശ്യമെങ്കിൽ മാത്രം)

തയ്യാറാക്കേണ്ട വിധം:

ഘട്ടം 1: വഴന ഇലകൾ കഴുകുക, ഒരു പാത്രത്തിൽ വെള്ളം തിളപ്പിക്കുക.
ഘട്ടം 2: വഴന ഇലകളും കറുവപ്പട്ട പൊടിയും വെള്ളത്തിൽ ചേർത്ത് 10 മിനിറ്റ് തിളപ്പിക്കുക.
ഘട്ടം 3: ഗ്യാസ് ഓഫ് ചെയ്ത് ചായ ഒരു കപ്പിൽ ഒഴിക്കുക. ഇനി, നിങ്ങളുടെ അഭിരുചിക്കനുസരിച്ച് ആവശ്യമുള്ള മധുരം (തേൻ) അല്ലെങ്കിൽ നാരങ്ങ നീര് ചേർക്കുക.

അത്രയേയുള്ളൂ! നിങ്ങളുടെ ദിവസത്തിന് ആരോഗ്യകരമായ തുടക്കം നൽകുന്നതിന്, എല്ലാ ദിവസവും രാവിലെ ഈ ഉന്മേഷദായകമായ ചായ കുടിച്ച് ആരംഭിക്കാം.