മനസും ശരീരവും ആരോഗ്യത്തോടെ നിലനിർത്താം യോഗയിലൂടെ

ജീവിതത്തിന്റെ താളം നിശ്ചയിക്കുന്നതിൽ മനസിനും ശരീരത്തിനും ഒരുപോലെ പങ്കുണ്ട്. മനുഷ്യ മനസും ശരീരവും തമ്മിലുള്ള സന്തുലിതാവസ്ഥ ഉറപ്പാക്കുകയും ആരോഗ്യകരമായി നിലനിർത്തുകയും ചെയ്യുന്ന വ്യായാമ മുറയാണ് യോഗ. തലമുറകളായി കൈമാറികിട്ടിയ യോഗാഭ്യാസത്തിനു ഈ അടുത്തകാലത്താണ് അർഹമായ പരിഗണനയും പ്രാധാന്യവും ലഭിച്ചു തുടങ്ങിയത്. 5000 വർഷങ്ങൾക്കപ്പുറം ജീവിച്ചിരുന്ന ഋഷിവര്യന്മാരാണ് ശരീരത്തെയും മനസിനെയും സമചിത്തതയോടെ നിലനിർത്തുന്നതിന് സഹായിക്കുന്ന യോഗാ മുറകൾ ചിട്ടപ്പെടുത്തിയെടുത്തത്. കാലങ്ങൾക്കിപ്പുറം പുതു തലമുറയിലെ ആളുകൾ യോഗയുടെ പ്രാധാന്യം തിരിച്ചറിയുകയും അത് ജീവിതശൈലിയുടെ ഭാഗമാക്കി കൂടെ കൂട്ടാനും തയ്യാറാവുന്നുണ്ട്.

ഏത് പ്രായത്തിലുള്ളവർക്കും എവിടെയിരുന്നും യോഗ ചെയ്യാമെന്നത് പ്രത്യേകതയാണ്. വൃത്തിയുള്ളതും ശുദ്ധവായു ലഭിക്കുന്നതുമായ ഏതൊരുസ്ഥലവും യോഗ ചെയ്യുന്നതിന് അനുയോജ്യമാണ്.

മനസിന്റെയും ശരീരത്തിന്റെയും ആരോഗ്യം പരസ്പരം ബന്ധപ്പെട്ടു കിടക്കുന്നതാണ്. പതിവായി യോഗ ചെയ്യുകയാണെങ്കിൽ മനസും ശരീരവും ഓജസ് നിറഞ്ഞതാവും ,ജീവിതത്തിലെ എല്ലാ വശങ്ങളിലും ഇതിന്റെ പ്രതിഫലനം അനുഭവപ്പെടുകയും ചെയ്യും. ഓരോരുത്തരുടെയും ആരോഗ്യസ്ഥിതിയ്ക്ക് അനുസരിച്ച് ചെയ്യാൻ കഴിയുന്ന യോഗാ മുറകൾ തിരഞ്ഞെടുക്കുന്നത് ഗുണം ചെയ്യും. പൊതുവെ ആരോഗ്യക്കുറവും അവശതകളുമുള്ള ഒരാൾക്ക് കഠിനമായയോഗാമുറകൾ ചെയ്യാൻ പ്രയാസം അനുഭവപ്പടാം. ശരീരത്തിന് അമിത ആയാസം വരാത്ത മറ്റ്‌ യോഗാസനങ്ങൾ സ്വീകരിച്ചുകൊണ്ട് ഈ പ്രശ്നം പരിഹരിക്കാം.

ഒരാളുടെ ആരോഗ്യനില എല്ലാ തരത്തിലും മെച്ചപ്പെടുത്തകുകയും ജീവിതശൈലിയിലെ പിശകുകൾ മൂലം ഉണ്ടായേക്കാവുന്ന പലതരത്തിലുള്ള രോഗങ്ങളെ അകറ്റിനിർത്താനും യോഗ ജീവിതത്തോട് ചേർത്ത നിർത്തുക വഴി സാധിക്കും.

യോഗയുടെ ഗുണങ്ങൾ:
ശരീരത്തിന് എണ്ണമറ്റ ഗുണങ്ങളാണ് യോഗ ചെയ്യുന്നത് മൂലം ലഭിക്കുന്നത്. പല ശാരീരിക അസ്വസ്ഥതകളും യോഗയിലൂടെ മാറ്റിയെടുക്കാൻ കഴിയും. പതിവായി യോഗ ചെയ്‌താൽ ശരീരത്തിന് ലഭിക്കുന്ന ചില ഗുണങ്ങൾ അറിഞ്ഞിരിക്കാം.

> തലച്ചോറിന്റെ പ്രവർത്തനം മെച്ചപ്പെടുത്തുന്നു
> മാനസിക സമ്മർദ്ദം കുറയ്ക്കുന്നു
> ജീൻ സംബന്ധമായ പ്രശ്നങ്ങൾ മാറ്റുന്നു
> പേശികളുടെ വഴക്കം വർദ്ധിപ്പിക്കുന്നു
> രക്തസമ്മർദ്ദം കുറയ്ക്കുന്നു
> ശ്വാസകോശത്തിന്റെ ശേഷി മെച്ചപ്പെടുത്തുന്നു
> അനാവശ്യ ഉത്കണ്ഠ ഒഴിവാക്കുന്നു
> വിട്ടുമാറാത്ത നടുവേദനയ്ക്ക് പരിഹാരം
> പ്രമേഹരോഗികളിൽ രക്തത്തിലെപഞ്ചസാരയുടെ അളവ് നിയന്ത്രിക്കുന്നു
> ശരീരത്തിന്റെ സന്തുലിതാവസ്ഥ മെച്ചപ്പെടുത്തുന്നു
> അസ്ഥികളുടെ ആരോഗ്യം മെച്ചപ്പെടുത്തുന്നു
> ആരോഗ്യകരമായ ഭാരം നിലനിർത്താൻ സഹായിക്കുന്നു
> ഹൃദ്രോഗ സാധ്യത കുറയ്ക്കുന്നു

രക്തചംക്രമണം മെച്ചപ്പെടുത്തുന്നു :
യോഗ ശരീരത്തിലെ രക്തചംക്രമണം മെച്ചപ്പെടുത്തുന്നു. ശരീരത്തിലുടനീളം ഓക്സിജന്റെയും പോഷകങ്ങളുടെയും മികച്ച വിതരണം സാധ്യമാക്കുന്നു.ശരീരത്തിൽ മെച്ചപ്പെട്ട രക്തയോട്ടമുണ്ടാകുന്നത് അവയവങ്ങളുടെ ആരോഗ്യവും അതോടൊപ്പം തിളങ്ങുന്ന ചർമവും പ്രദാനംചെയ്യും.

ശരീരത്തിന്റെ ഘടന മെച്ചപ്പെടുത്തുന്നു:
പതിവായി യോഗ ചെയ്യുന്നതിലൂടെ നിങ്ങളുടെ ശരീരത്തിന്റെ ഘടനയും ചലനരീതിയും മെച്ചപ്പെടും. ആരോഗ്യകരമായതും മനോഹരവുമായ ശരീര ഘടന ലഭിക്കുമ്പോൾ ഒരു വ്യക്തി കൂടുതൽ ആത്മവിശ്വാസത്തോടെയും ആരോഗ്യത്തോടെയും കാണപ്പെടും.

മാനസികാവസ്ഥ മെച്ചപ്പെടുത്തും :
പതിവായി യോഗ പരിശീലിക്കുന്നത് ശരീരത്തെ ഉന്മേഷദായകമാക്കുകയും കൂടുതൽ ഊർജ്ജം പകരുകയും ചെയ്യും. ഇത് ജീവിതത്തിലെ പല പ്രശനങ്ങളും ലാഘവത്തോടെ കാണാനും മാനസികാവസ്ഥയെ ശാന്തമാക്കാനും സഹായിക്കുന്നു.

രക്തസമ്മർദ്ദം കുറയ്ക്കുന്നു:
ദിവസേന യോഗ പരിശീലിക്കുന്നത് ശരീരത്തിലെ രക്തചംക്രമണം വർദ്ധിപ്പിക്കുന്നു. ഇത് ശരീരത്തിൽ ഓക്സിജൻ നില ആരോഗ്യകരമാക്കാനും അതുവഴി ശരീരത്തിലെ രക്തസമ്മർദ്ദം കുറയ്ക്കാനും വളരെയധികം ഉപകാരപ്രദമാകും.

അകാല വാർദ്ധക്യത്തെ തടയുന്നു:
വാർദ്ധക്യം എന്ന അവസ്ഥ തടഞ്ഞുനിർത്താൻ സാധിക്കുന്നതല്ല, പ്രായംകൂടുമ്പോൾ അതിനു അനുസൃതമായ മാറ്റങ്ങൾ ശരീരത്തിൽ സംഭവിച്ചുകൊണ്ടിരിക്കും. എന്നാൽ അകാലവാർദ്ധക്യം ബാധിക്കുന്നത് തെറ്റായ ജീവിതശൈലിയുടെ ഭാഗമായാണ്. കഴിക്കുന്ന ഭക്ഷണവും അനാരോഗ്യകരമായ ജീവിതശൈലിയും തന്നെയാണ് മിക്കപ്പോഴും വളരെ നേരത്തെ ശരീരത്തിൽ വാർധക്യ ലക്ഷണങ്ങൾ പ്രകടമാകുന്നതിനു കാണമാകുന്നത്. പ്രായമാകുന്നതിന്റെ ലക്ഷണങ്ങൾ വളരെ വൈകി മാത്രം പ്രകടമാക്കാൻ യോഗ പതിവാക്കുന്നത് സഹായിക്കും.

ശരീരം ശക്തിപ്പെടുത്തുന്നു :
യോഗ പതിവാക്കുന്നതോടെ ശരീരത്തിന്റെ ശക്തി വർദ്ധിക്കുമെന്നു പഠനങ്ങൾ തെളിയിച്ചിട്ടുണ്ട്. മനസും ശരീരവും ശക്തിപ്പെടുമ്പോൾ ആരോഗ്യം മികച്ചരീതിയിലാകുകയും ചെയ്യും.

ഉത്കണ്ഠ നിയന്ത്രിക്കൽ:
കൃത്യമായ ശ്വസന രീതിയാണ് യോഗയിലെ ആദ്യ പാഠം. വളരെ ആരോഗ്യകരമായ ശ്വസന രീതി സ്വീകരിക്കുന്നതിനായി ശരീരത്തിലെ ഓക്സിജൻ നിലവർദ്ധിപ്പിയ്ക്കുകയും ഹൃദയമിടിപ്പ് കുറയ്ക്കുകയും ചെയ്യാൻ സാധിക്കും. പ്രാണായാമം പോലുള്ള അടിസ്ഥാന ശ്വസനവ്യായാമങ്ങൾ ചെയ്യുന്നത് ശ്വാസകോശത്തെ അവയുടെ പൂർണ്ണശേഷിയിൽ നിറയ്ക്കുന്നതിനും കൂടുതൽ കാര്യക്ഷമമായി ശ്വാസകോശത്തിന് പ്രവർത്തിക്കാൻ സാധിക്കുകയും ചെയ്യും.

വിഷാദത്തെ അകറ്റി നിർത്താം:
വളരെ സമാധാനത്തോടെയും ശാന്തമായിരുന്നുമാണ് യോഗ ചെയ്യേണ്ടത്. മറ്റ് കാര്യങ്ങളിൽ നിന്ന് പൂർണമായും മാറി ശ്വസനത്തെ കൃത്യമായി നിരീക്ഷിച്ചുകൊണ്ട് ചെയ്യുന്ന യോഗാഭ്യാസം മനസിന് സമാധാനം നൽകുകയും വിഷാദം അകറ്റുകയും ചെയ്യും.

അവയവങ്ങൾ ഉത്തേജിക്കപ്പെടുന്നു:
യോഗ പരിശീലിക്കുമ്പോൾ ആന്തരികഅവയവങ്ങൾ ഉത്തേജിക്കപ്പെടുന്നു. അതുവഴി രോഗങ്ങളോടുള്ള ശരീരത്തിന്റെ പ്രതിരോധശേഷി വർദ്ധിക്കുന്നു. ശരീരത്തിലെ ഏത് ഭാഗത്തെ ബാധിക്കുന്ന രോഗത്തെയും ഒരു പരിധി വരെ അകറ്റിനിർത്താൻ യോഗ ശീലിയ്ക്കുന്നത് വഴി സാധിക്കും.

പ്രതിരോധശേഷി വർധിക്കും:
യോഗയും പ്രതിരോധശേഷിയും പരസ്പരം ബന്ധപ്പെട്ട് കിടക്കുന്നതാണ്. ശരീരത്തിലെ ഓരോ കോശത്തെയും മെച്ചപ്പെടുത്തുന്നതിനും ആരോഗ്യകരമായ രീതിയിലേക്ക് കൊണ്ട് വരുന്നതിനും യോഗ സഹായിക്കുന്നു.

ദഹനനാളത്തെ മെച്ചപ്പെടുത്തൽ:
പതിവായി യോഗ പരിശീലിക്കുന്നത് ദഹനവ്യവസ്ഥയെ സജീവമാക്കുകയും വയറുമായി ബന്ധപ്പെട്ട ദഹന പ്രശ്നങ്ങൾ ഉൾപ്പെടെയുള്ള അവസ്ഥകൾ ഇല്ലാതാക്കുകയും ചെയ്യുന്നു. പുതിയ കാലത്തെ ഭക്ഷണരീതി കാരണം ദഹന പ്രശ്നങ്ങൾ മിക്കവർക്കും പ്രയാസം സൃഷ്ടിക്കുന്നുണ്ട്.

മെറ്റബോളിസം വർധിപ്പിക്കുന്നു:
ശരീരത്തിന്റെ ഉപാപചയ പ്രവർത്തനങ്ങൾ മെച്ചപ്പെടുത്തി ശരീരത്തിന്അനുയോജ്യമായ ഭാരംനിലനിർത്തിക്കൊണ്ട് ആരോഗ്യകരമായശരീരം നൽകാൻ യോഗ പതിവാക്കുന്നത് വഴി സാധിക്കും.

മെച്ചപ്പെട്ട ലൈംഗികത ഉറപ്പാക്കുന്നു:
യോഗ നിങ്ങളുടെ ആത്മവിശ്വാസം വർദ്ധിപ്പിക്കുകയും ശരീരത്തിനും മനസിനും വലിയ തോതിലുള്ള ഊർജ്ജം നൽകുകയും ചെയ്യുന്നു. ഇത് നിങ്ങളുടെ ലൈംഗികതയ്ക്ക് വളരെയധികം ആവശ്യമായ ഉത്തേജനം നൽകുന്നു.

ഉറക്കം മെച്ചപ്പെടുത്തുന്നു:
മനസ്സിനെ പൂർണ്ണമായും വിശ്രമിക്കാൻ യോഗ സഹായിക്കുന്നു. അനാവശ്യമായ പിരിമുറുക്കങ്ങളിൽ നിന്ന് പുറത്തുകടക്കാനും ജീവിതത്തിൽ ശുഭാപ്‌തിവിശ്വാസത്തോടെ മുന്നോട്ട് പോകാനും യോഗ സഹായിക്കുന്നു. പിരിമുറുക്കങ്ങൾ ഇല്ലാതാകുമ്പോൾ ഉറക്കം സുഗമമാകും.

പോസിറ്റിവ് ആകാം:
സ്ഥിരമായി യോഗ പരിശീലിക്കുമ്പോൾ നാഡീവ്യവസ്ഥയിലെ പല ഹോർമോണുകളും സ്ഥിരത കൈവരിക്കും. ഇത് നിങ്ങളെ കൂടുതൽ പോസിറ്റീവായി മാറ്റാൻ സഹായിക്കുകയും ജീവിതത്തെ ഉന്മേഷദായകവും ക്രിയാത്മകവുമായ വീക്ഷണകോണിലൂടെ നോക്കി കാണാനും സാധിക്കും.

കോപം നിയന്ത്രിക്കുന്നു:
അനിയന്ത്രിതമായ കോപം വ്യക്തിയെ ഇല്ലാതാക്കും, എന്നാൽ പതിവായി യോഗ ചെയ്യുമ്പോൾ, ശ്വസനവും ധ്യാനവും നാഡീവ്യവസ്ഥയെ ശാന്തമാക്കുന്നു, അതുവഴി കോപവും സമ്മർദ്ദവും കുറയുന്നു. ഇത് ജീവിതത്തോടുള്ള സമ്മർദ്ദരഹിതവും ആരോഗ്യകരവുമായ സമീപനം പ്രാപ്തമാക്കുന്നു.

ഏകാഗ്രത വർധിപ്പിക്കുന്നു :
എല്ലാ ദിവസവും യോഗ ചെയ്യുന്നത് ഏകാഗ്രത മെച്ചപ്പെടുത്തും. തുടർച്ചയായി എട്ട് ആഴ്ചയെങ്കിലും യോഗ പരിശീലിക്കുമ്പോൾ തന്നെ ഒരാളുടെ ഏകാഗ്രത മെച്ചപ്പെട്ട് തുടങ്ങും.

ഇത്തരത്തിൽ നിരവധി ഗുണങ്ങളാണ് ഒരാൾ യോഗ പതിവാക്കുന്നതോടെലഭിക്കുന്നത്. അതിനാൽ ഈ യോഗാദിനത്തിൽ തന്നെ മനസും ശരീരവും മെച്ചപ്പെടുത്തുന്ന യോഗ ആരംഭിക്കൂ.