ഈ മഹാമാരിക്കാലം ആളുകളുടെ ഇന്റർനെറ്റ് ഉപയോഗത്തിൽ ഒരുപാട് മാറ്റങ്ങൾ വരുത്തിയിട്ടുണ്ട്. വാട്സ്ആപ്പ് സന്ദേശങ്ങൾ അയക്കാനും സ്വീകരിക്കാനും ആണ് ആളുകൾഇന്റർനെറ്റ് ഏറ്റവും അധികം ഉപയോഗിച്ചിട്ടുള്ളത്. ലോക്ക്ഡൗൺ കാലത്തു വീട്ടിൽ അടച്ചിരിക്കുന്നതുകൊണ്ടു സാമൂഹ്യ മാധ്യമങ്ങളുടെ ഉപയോഗവും വർധിച്ചിട്ടുണ്ട്. പുതിയതായി യൂട്യൂബ് ചാനലുകൾ തുറന്നവരുടെ എണ്ണവും കൂടിയിട്ടുണ്ട്.
കേരളത്തിൽഇന്റർനെറ്റ്ഉപഭോക്താക്കളിൽ 39 ശതമാനവും 16 മുതൽ 35 വരെ പ്രായമുള്ളവരാണെന്നു കേരള ഓപ്പൺ സർവേ സംരംഭം നടത്തിയ കണക്കെടുപ്പിൽ കണ്ടെത്തി. മഹാമാരികാലത്തെ ലോക്ക്ഡൗൺ സമയത്താണ് അവർ ഈ സർവേ നടത്തിയത്. ഓൺലൈൻ ക്ലാസ്സുകളും വർക്ക് ഫ്രം ഹോം സ്ഥിതിയും ആണ് യുവാക്കളെ ഇന്റർനെറ്റിൽ കൂടുതൽ സമയം ചിലവഴിക്കാൻ നിർബന്ധിതരാക്കിയത്.
ഇന്റർനെറ്റ് ഉപയോഗിക്കുന്നവരിൽ നാല് മുതൽ 10 വരെ പ്രായമുള്ളവരുടെ എണ്ണവും കൂടിയിട്ടുണ്ട്. 10 ശതമാനത്തിൽ എത്തിനിൽക്കുന്ന ഈ കണക്ക് കേരളത്തിലെ പ്രാഥമിക വിദ്യാലയങ്ങളിൽ ഓൺലൈൻ ക്ലാസുകൾ തുടങ്ങിയപ്പോൾ ഉണ്ടായതാണ്. സർവേ കണക്കു പ്രകാരം 11 മുതൽ 15 വരെ പ്രായമുള്ളവർ 10 ശതമാനവും 16 മുതൽ 21 വരെ പ്രായമുള്ളവർ 13 ശതമാനവും 22 മുതൽ 35 വരെ പ്രായമുള്ളവർ 26 ശതമാനവും 36 മുതൽ 50 വരെ പ്രായമുള്ളവർ 19 ശതമാനവും 51 മുതൽ 60 വരെ പ്രായമുള്ളവർ 16 ശതമാനവും 60 നു മുകളിൽ പ്രായമുള്ളവർ 6 ശതമാനവും ഇന്റർനെറ്റ് ഉപഭോക്താക്കൾ ആണ്.
2021 ജനുവരിയിൽ ഇന്ത്യയിൽ 624.0 ദശലക്ഷം ഇന്റർനെറ്റ് ഉപയോക്താക്കളുണ്ടായിരുന്നു. 2020 നും 2021 നും ഇടയിൽ ഇന്ത്യയിലെ ഇന്റർനെറ്റ് ഉപയോക്താക്കളുടെ എണ്ണം 47 ദശലക്ഷം (+ 8.2%) വർദ്ധിച്ചു.
ഡാറ്റാ റിപ്പോർട്ടൽ പറയുന്ന കണക്കനുസരിച്ചു 2021 ജനുവരിയിൽ ഇന്ത്യയിൽ 448.0 ദശലക്ഷം സാമൂഹ്യ മാധ്യമ ഉപയോക്താക്കൾ ഉണ്ടായിരുന്നു. 2020 നും 2021 നും ഇടയിൽ ഇന്ത്യയിൽ സാമൂഹ്യ മാധ്യമങ്ങൾ ഉപയോഗിക്കുന്നവരുടെ എണ്ണം 78 ദശലക്ഷം (+ 21%) വർദ്ധിച്ചു. ഇന്ത്യയിലെ സാമൂഹ്യ മാധ്യമ ഉപയോക്താക്കളുടെ എണ്ണം 2021 ജനുവരിയിലെ മൊത്തം ജനസംഖ്യയുടെ 32.3 ശതമാനത്തിന് തുല്യമായിരുന്നു.
