മൈഗ്രേൻ മാറ്റിയെടുക്കാൻ ആയുർവേദവും പിന്നെ വീട്ടുവൈദ്യങ്ങളും

ഒരു വല്ലാത്ത തലവേദന തന്നെയാണ്. ഒരിക്കലെങ്കിലും ഈ വേദന അനുഭവിച്ചിട്ടുള്ളവർ അത് മറക്കില്ല. പലതരം മരുന്നുകൾ പരീക്ഷിച്ചു നോക്കിയാലും മാറാത്ത തലവേദനയാണ് മൈഗ്രേൻ. ഒരിക്കൽ ആരംഭിച്ചാൽ പിന്നീട് അതിൽ നിന്ന് രക്ഷ നേടാൻ പണി പതിനെട്ടും പരീക്ഷിച്ചാലും ചിലപ്പോൾ നടക്കില്ല. എന്നാൽ ദൈനദിന ജീവിതത്തെ പൂർണമായും ബാധിക്കുന്ന ഈ തലവേദന മാറ്റിയെടുക്കാൻ ചില ആയുർവേദ വഴികളുണ്ട്. അവ വിശദമായി അറിയാം.

ഓക്കാനം, ഛർദ്ദി തുടങ്ങിയവയും കൂടെ കഠിനമായ തലവേദനയുമാണ് മൈഗ്രേൻ തലവേദന. ശബ്ദം, പ്രകാശം എന്നിവയുടെ സാന്നിധ്യം വലിയ അസ്വസ്ഥത ഉണ്ടാക്കാനും കാരണമാകും. മാത്രമല്ല, സാധാരണ തലവേദനയിൽ നിന്ന് വ്യത്യസ്തമായി പുരികത്തിന് മുകളിൽ വേദനയുടെ തോത് വർദ്ധിക്കുന്നത് ഇതിന്റ ഭാഗമാണ്. അല്ലെങ്കിൽ കൂടുതൽ നേരം സൂര്യപ്രകാശമേൽക്കുന്നത് തലവേദന വഷളാക്കും. വേദന കൂടുമ്പോൾ ഇത് കഴുത്തിലേക്കും തോളിലേക്കും വ്യാപിക്കുകയും ചെയ്യും. സാധാരണഗതിയിൽ ഈ തലവേദന രണ്ട് മുതൽ മൂന്ന് മണിക്കൂർ വരെ നീണ്ടുനിൽക്കും, എന്നാൽ ഏറ്റവും മോശം സാഹചര്യങ്ങളിൽ, വേദന രണ്ട് മൂന്ന് ദിവസം വരെ നീണ്ടുനിൽക്കും. ഈ അവസ്ഥ തീർത്തും അസഹനീയമാണ്.

രക്തക്കുഴലുകളുടെയും തലച്ചോറിന്റെയും അമിതമായ ഉത്തേജനം മൂലമാണ് ഇത് സംഭവിക്കുന്നത്. മൈഗ്രേനിന്റെ ലക്ഷണങ്ങൾ ഓരോ വ്യക്തിയിലും വ്യത്യാസപ്പെടാം, പക്ഷേ സാധാരണയായി സൂര്യോദയ സമയത്തും ഉച്ചസമയത്തും ഈ അവസ്ഥ വഷളാകുകയും വൈകുന്നേരത്തോടെ ശാന്തമാവുകയും ചെയ്യും.

മൈഗ്രേൻ ഉണ്ടാകാനുള്ള കാരണങ്ങൾ:
1. എണ്ണമയമുള്ളതും, മസാലകൾ അല്ലെങ്കിൽ ഉപ്പ് അധികമായ ഭക്ഷണം അമിതമായി കഴിക്കുന്നത്.
2. കൂടുതൽ നേരം സൂര്യപ്രകാശമേൽക്കുന്നത്.
3. വളരെയധികം സമ്മർദ്ദം അനുഭവിയ്ക്കുന്നത്
4. ദഹനക്കേട്
5. അമിതമായി മദ്യപാനം അല്ലെങ്കിൽ പുകവലി
6. ശാരീരികമോ മാനസികമോ ആയ സമ്മർദ്ദം
7. കഫീൻ ഉപയോഗം പെട്ടെന്ന് നിർത്തുന്നത് (ചായയുടെയോ കാപ്പിയുടെയോ രൂപത്തിൽ)
8. ഉപവാസം
9. ഹോർമോൺ മാറ്റങ്ങൾ, പ്രത്യേകിച്ച് സ്ത്രീകളിലെ പിരീഡ് സമയങ്ങളിൽ അല്ലെങ്കിൽ ജനന നിയന്ത്രണ ഗുളികകളുടെ അമിത ഉപയോഗം കാരണം
10. ഉറക്ക രീതികളിൽ മാറ്റം

കാരണമാകുന്ന ഭക്ഷണങ്ങൾ:
മൈഗ്രെയ്ൻ ആക്രമണത്തിന് കാരണമാകുന്ന ചില തരം ഭക്ഷണങ്ങളുണ്ട്. സംസ്കരിച്ച ഭക്ഷണങ്ങൾ, പാൽ ഉൽപന്നങ്ങൾ, ചുട്ടെടുത്ത ഭക്ഷണങ്ങൾ, പുളിപ്പിച്ച ഭക്ഷണങ്ങൾ, നിലക്കടല, സവാള അല്ലെങ്കിൽ ദഹന സമയം കൂടുതൽ ആവശ്യമായ മാംസം പോലുള്ള ഭക്ഷണങ്ങൾ അതിന് കാരണമാകാം.

മൈഗ്രേൻ ചികിത്സയ്ക്ക് ആയുർവേദം ശുപാർശ ചെയ്യുന്നത്:

1. ശിരോലേപം:
മൈഗ്രേൻ സുഖപ്പെടുത്തുന്നതിനും സമ്മർദ്ദം മൂലമുണ്ടാകുന്ന മാനസിക ക്ഷീണത്തിനും ഷിരോലെപ വളരെ ഫലപ്രദമാണെന്ന് കണക്കാക്കപ്പെടുന്നു. ചില പ്രത്യേക ഔഷധസസ്യങ്ങൾ ചേർത്ത് പേസ്റ്റ് രൂപപത്തിലാക്കി രോഗിയുടെ തലയിൽ പ്രയോഗിക്കുന്നു. എന്നാൽ ഹെർബൽ പേസ്റ്റ് പ്രയോഗിക്കുന്നതിന് മുമ്പ്, തലയിലും ശരീരത്തിലും ഒരു എണ്ണ ഉപയോഗിക്കുന്നു. പേസ്റ്റ് തലയുടെ മുകളിൽ നിലനിർത്തുന്നു. ശേഷം ഒരു വാഴയിലയുടെ സഹായത്തോടെ ഒരു മണിക്കൂർ മൂടുന്നു. തുടർന്ന്, പേസ്റ്റും എണ്ണയും തുടച്ചുമാറ്റും. തലയും ശരീരവും വീണ്ടും പ്രത്യേക മരുന്ന് ചേർത്ത എണ്ണ ഉപയോഗിച്ച് പുരട്ടുന്നു, തുടർന്ന് ചെറുചൂടുള്ള വെള്ളത്തിൽ കുളിക്കുന്നു.

2. ശിരോധാര:
നാഡീവ്യവസ്ഥയെ ആഴത്തിൽ സ്വാധീനിക്കുന്ന ഒരു മികച്ച ആയുർവേദ ചികിത്സയാണ് ശിരോധാര. നമ്മുടെ ഞരമ്പുകൾ വളരെയധികം കേന്ദ്രീകരിച്ചിരിക്കുന്ന പ്രദേശമായ നെറ്റിയിൽ തുടർച്ചയായി ചെറു ചൂടുള്ള എണ്ണ ഒഴിക്കുന്നു. എണ്ണ തുടർച്ചയായി ഒഴിക്കുമ്പോൾ, എണ്ണയുടെ മർദ്ദം നെറ്റിയിൽ ഒരു പ്രകമ്പനം സൃഷ്ടിക്കുന്നു, ഇത് മനസ്സിനെയും നാഡീവ്യവസ്ഥയെയും വിശ്രമാവസ്ഥയിലെത്തിയ്ക്കുകയും അസ്വസ്ഥതകൾ മാറ്റുകയും ചെയ്യും.

3. കവല ഗ്രഹ
മൈഗ്രേൻ ഭേദമാക്കാൻ ആയുർവേദത്തിൽ കവല ഗ്രഹ അല്ലെങ്കിൽ ഓയിൽ പുള്ളിങ് വളരെ ഉത്തമമാണ്. ഇത് വളരെ ശക്തമായ രീതിയിൽ പ്രവർത്തിയ്ക്കുകയും വേദന കുറയ്ക്കുകയും ചെയ്യും. ഇതിനായി ചന്ദനാദി തൈലം, മഹാനാരായണ തൈലം എന്നിവ ഉപയോഗിക്കാം.

4. ശിരോവസ്തി:
നമ്മുടെ തലയുടെ പുറം ഭാഗം ലെതർ ക്യാപ്പ് കൊണ്ട് മൂടിയിരിക്കുന്ന മറ്റൊരു ഫലപ്രദമായ ആയുർവേദ തെറാപ്പി ആണ് ശിരോവസ്തി. ഈ ക്യാപ്പിനുള്ളിലെ ഒഴിഞ്ഞ ഭാഗത്ത് എണ്ണ നിർത്തിയാണ് ഈ ചികിത്സാ രീതി ചെയ്യുന്നത്. വാത,പിത്ത ദോഷങ്ങളെ ഇല്ലാതാക്കാൻ ഇത് സഹായിക്കും. എണ്ണ പുറത്ത് പോകാത്ത രീതിയിൽ വേണം ഇത് ചെയ്യാൻ. നിശ്ചിത ഇടവേളയ്ക്കുള്ളിൽ മൈഗ്രെയ്ൻ തലവേദന പൂർണമായും മാറ്റിയെടുക്കാൻ ഇതുവഴി സാധിയ്ക്കും. കൂടാതെ തൊണ്ടവേദന, വിഷാദം തുടങ്ങിയ രോഗങ്ങൾ ഭേദമാക്കാനും ഈ തെറാപ്പി സഹായിക്കുന്നു.

5. സ്നേഹ നസ്യം :
ഈ തെറാപ്പി നേസൽ റൂട്ടിലൂടെയാണ് നടത്തുന്നത്. ആയുർവേദ മരുന്നുകൾ ചേർത്ത് പ്രത്യേകം തയ്യാറാക്കിയ തൈലം ഉപയോഗിച്ച് നസ്യം ചെയ്യുന്നത് തലവേദന പൂർണമായും ഭേദമാക്കും. മാത്രമല്ല, തോൾ ഭാഗത്തിന് മുകളിലുള്ള വേദന ചികിത്സിക്കാൻ ഇത് ഏറെ സഹായിക്കുന്നു.

ചില വീട്ടുവൈദ്യങ്ങൾ
പ്രാരംഭ ഘട്ടത്തിൽ മൈഗ്രേൻ ചില ലളിതമായ വീട്ടുവൈദ്യങ്ങളുടെ സഹായത്തോടെ ചികിത്സിക്കാം. അവയിൽ ചിലത് ഇതാ:

ഉണക്കമുന്തിരി, ബദാം:
ഉണക്കമുന്തിരി, ബദാം എന്നിവ ആരോഗ്യത്തിന് വളരെ നല്ലതാണ്. രാത്രിയിൽ ഉണക്കമുന്തിരി, ബദാം എന്നിവ 5 വീതം വെള്ളത്തിൽ കുതിർത്തു വയ്ക്കുക,ഇത് പിറ്റേന്ന് രാവിലെ കഴിക്കുക. കുതിർത്ത വെള്ളം കുടിക്കാൻ‌ ശ്രമിയ്ക്കുന്നതും നല്ലതാണ്.

കറുക പുല്ല് :
ഒരു പിടി കറുകപ്പുല്ലെടുത്ത് ജ്യൂസ് തയ്യാറാക്കുക. ഈ ജ്യൂസിൽ ഒരു നുള്ള് ഇരട്ടിമധുര പൊടി ചേർത്ത് നന്നായി ഇളക്കുക. ഇങ്ങനെ ഒരു മാസത്തേക്ക് തുടർച്ചയായി കുടിക്കുക. രോഗത്തിന്റെ കാഠിന്യം കുറയ്ക്കാൻ ഇത് സഹായിക്കും.

മല്ലിപ്പൊടി :
ഒരു ടീസ്പൂൺ മല്ലി പൊടി എടുത്ത് ഒരു കപ്പ് വെള്ളത്തിൽ കലർത്തുക. ഇത് രാത്രി മുഴുവൻ അടച്ചു സൂക്ഷിച്ച ശേഷം അടുത്ത ദിവസം രാവിലെ വെറും വയറ്റിൽ ഇത് കുടിക്കുക. ഫലം തീർച്ച.

മുല്ല, മാതളം ഇലകൾ :
മൈഗ്രേൻ സുഖപ്പെടുത്തുന്നതിന് മുല്ല അല്ലെങ്കിൽ മാതളനാരങ്ങയുടെ ഇളം ഇലകൾ മികച്ച ഫലം ചെയ്യും. ഈ ഇലകൾ നന്നായി ചതച്ച് ഒരു നുള്ള് ഉപ്പ് ചേർത്ത് പിഴിഞ്ഞ് ജ്യൂസ് ഉണ്ടാക്കുക. ഇതിന്റെ രണ്ട് മൂന്ന് തുള്ളികൾ അതിരാവിലെ നിങ്ങളുടെ മൂക്കിലേക്ക് ഒഴിക്കുക. ഇങ്ങനെ ഒന്നിടവിട്ടുള്ള ദിവസങ്ങളിൽ ചെയ്യുന്നത് ഗുണം ചെയ്യും.

ഇക്കാര്യങ്ങൾ ശ്രദ്ധിക്കാം :
*സ്വയം അമിതമായി സമ്മർദ്ദം ചെലുത്തരുത്.
*പതിവായി ഉറങ്ങുന്ന സമയം നിലനിർത്തുക, ഏഴ് മുതൽ എട്ട് മണിക്കൂർ വരെ ഉറങ്ങുക.
*ചായയും കാപ്പിയും കഴിക്കുന്നത് കുറയ്ക്കുക.
*രാവിലെ 10 മിനിറ്റ് ശുദ്ധവായുവിലൂടെ നടക്കുന്നത് വേദനയും അസ്വസ്ഥതയും കുറയ്ക്കും
*ഭക്ഷണത്തിൽ മസാലകൾ കഴിയുന്നത്ര ഒഴിവാക്കാൻ ശ്രമിക്കുക.
*കറുവപ്പട്ട, ഇഞ്ചി, ഗ്രാമ്പൂ, കുരുമുളക് എന്നിവ ഭക്ഷണത്തിൽ ഉൾപ്പെടുത്തുക.
*ഇലക്ട്രോണിക് ഗാഡ്‌ജെറ്റുകൾ‌ ഉപയോഗിക്കുമ്പോൾ‌ അവയുടെ തെളിച്ചം കുറയ്‌ക്കുക.
* വെയിലത്ത് പോകുമ്പോൾ സൺഗ്ലാസ് ധരിക്കുക.