കൊവിഡിനൊപ്പം ഡെങ്കിപ്പനിയും; ജാഗ്രത കൈവിടാതെ പ്രതിരോധിക്കാം

ചൂട് അസഹ്യമായ സമയത്ത് മഴ ലഭിയ്ക്കുന്നത് നല്ലത് തന്നെ. എന്നാൽ ഈ മഴയ്ക്ക് പിറകെ മറ്റൊരു പ്രതിസന്ധി കൂടി നമ്മളെ കാത്തിരിപ്പുണ്ട്. മറ്റൊന്നുമല്ല, ഉൾപ്പെടെയുള്ള പകർച്ചവ്യാധികൾ. മലേറിയ, ചിക്കുൻ‌ഗുനിയ, വൈറൽ ശ്വാസകോശ സംബന്ധമായ അസുഖം, വയറിളക്കം തുടങ്ങിയ രോഗങ്ങളുടെ രൂപത്തിലും ഇവ തലപൊക്കാം. ഇതിൽ ഏറ്റവും അപകടകാരി ഡെങ്കിപനി തന്നെ. കൃത്യമായ ചികിത്സയും പരിചരണവും ലഭിച്ചില്ലെങ്കിൽ വളരെ പെട്ടെന്ന് മരണത്തിലേക്ക് നയിക്കുന്ന ഒന്നാണ് ഡെങ്കിപ്പനി. ഈഡീസ് കൊതുകിന്റെ കടി ഏൽക്കുക വഴിയാണ് ഡെങ്കിപ്പനി പടരുന്നത്.

ലക്ഷണങ്ങൾ:
സാധാരണയായി അണുബാധയ്ക്ക് ശേഷം നാല് മുതൽ ആറ് ദിവസം വരെയുള്ള കാലയളവിലാണ് ഇത് ശരീരത്തിൽ ലക്ഷണങ്ങൾ പ്രകടമാക്കി തുടങ്ങുന്നത്. ശേഷം 10 ദിവസം വരെ നീണ്ടുനിൽക്കുന്ന പല തരം അസ്വസ്ഥതകൾ ഉണ്ടാകും. ചില സാധാരണ ലക്ഷണങ്ങൾ:

പെട്ടെന്നുള്ള, ഉയർന്ന പനി
കടുത്ത തലവേദന
കണ്ണുകൾക്ക് പിന്നിൽ വേദന
അസ്ഥി, സന്ധി, പേശി വേദന എന്നിവ
ക്ഷീണം
ഓക്കാനം
ഛർദ്ദി
ശ്വാസം തടസപ്പെടൽ
സ്കിൻ റാഷ് (പനി ആരംഭിച്ച് രണ്ട് മുതൽ അഞ്ച് ദിവസത്തിന് ശേഷം പ്രത്യക്ഷപ്പെടുന്നു.)
മൂക്കിൽ നിന്നോ മോണയിൽ നിന്നോ നേരിയ രക്തസ്രാവം

രോഗലക്ഷണങ്ങൾ തിരിച്ചറിയുക പ്രധാനം:
ചിലപ്പോൾ, രോഗലക്ഷണങ്ങൾ വലിയ രീതിയിൽ പ്രകടമായെന്നു വരില്ല. അതിനാൽ തന്നെ അവ ഇൻഫ്ലുവൻസ അല്ലെങ്കിൽ മറ്റേതെങ്കിലും വൈറൽ അണുബാധ മാത്രമായി തെറ്റിദ്ധരിക്കാം. ലക്ഷണങ്ങൾ കാണിച്ചില്ലെങ്കിലും കൃത്യസമയത്ത് ചികിത്സിച്ചില്ലെങ്കിൽ ഗുരുതരമായ പ്രശ്നങ്ങൾ ഉണ്ടാകാം.

ഡെങ്കി ഷോക്ക് സിൻഡ്രോം (DSS):
ഉയർന്ന പനി, ലിംഫ്, രക്തക്കുഴലുകൾ എന്നിവയ്ക്ക് കേടുപാടുകൾ, മൂക്കിൽ നിന്നും മോണയിൽ നിന്നും രക്തസ്രാവം, കരൾ വലുതാകുക, രക്തചംക്രമണവ്യൂഹത്തിന്റെ പ്രവർത്തനം നിലയ്ക്കുക തുടങ്ങിയ കാര്യങ്ങളും ഇതിൽ ഉൾപ്പെടുന്നു. സാധാരണ രോഗലക്ഷണങ്ങൾ പിന്നീട് വലിയ രക്തസ്രാവം, മരണം എന്നിവയിലേക്ക് പുരോഗമിച്ചേക്കാം. ഇതിനെ ഡെങ്കി ഷോക്ക് സിൻഡ്രോം (DSS) എന്ന് വിളിക്കുന്നു.

രോഗപ്രതിരോധ ശേഷി ദുർബലമായ ആളുകൾക്കും രണ്ടാമത്തെയോ അതിനുശേഷമുള്ള ഡെങ്കിപ്പനി ബാധിച്ചവർക്കോ ഡെങ്കി ഹെമറാജിക് പനി വരാനുള്ള സാധ്യത വളരെ കൂടുതലാണ്.

ഡെങ്കിപ്പനി രോഗനിർണയം:
വൈറസ് അല്ലെങ്കിൽ ആന്റിബോഡികൾ പരിശോധിക്കാൻ ഡോക്ടർമാർക്ക് രക്തപരിശോധനയിലൂടെ ഡെങ്കി അണുബാധ നിർണ്ണയിക്കാൻ കഴിയും. ലക്ഷണങ്ങളെക്കുറിച്ച് അറിഞ്ഞിരിയ്ക്കുകയും അത് അനുഭവപ്പെടുകയാണെങ്കിൽ വേഗം തന്നെ പരിശോധന നടത്താൻ തയ്യാറാവുകയും വേണം.

ചികിത്സ എങ്ങനെ:
ഡെങ്കിപ്പനി ചികിത്സിച്ചു ഭേദമാക്കാൻ പ്രത്യേകം മരുന്നുകൾ നിലവിൽ ലഭ്യമല്ല. പനിക്കായി പാരസെറ്റമോൾ മാത്രമേ ഉപയോഗിക്കാവൂ. രക്തസ്രാവം വഷളാക്കുന്ന ആസ്പിരിൻ, ഇബുപ്രോഫെൻ, വിവിധ പെയിൻ കില്ലറുകൾ മുതലായവ ഒഴിവാക്കുക. വിശ്രമിക്കുകയും ധാരാളം വെള്ളം കുടിക്കുകയും ഡോക്ടറെ കാണുകയും വേണം.

രോഗം വരുന്നത് തടയാൻ:
ഡെങ്കിപ്പനി തടയാൻ ഇതുവരെ വാക്സിൻ കണ്ടെത്തിയിട്ടില്ല. രോഗം തടയാനുള്ള ഏറ്റവും നല്ല മാർഗം കൊതുകുകൾ കടിക്കുന്ന സാഹചര്യം ഒഴിവാക്കുക എന്നതാണ്. മഴക്കാലത്തിനൊപ്പം കൊതുകുകൾ കൂട്ടത്തോടെ പെരുകുമ്പോൾ അവയെ നശിപ്പിയ്ക്കാനുള്ള നടപടികൾ തീർച്ചയായും ചെയ്യണം.

സുരക്ഷിതരായിരിക്കാൻ ഇക്കാര്യങ്ങൾ മറക്കാതെ ചെയ്യാം:
*കഴിയുമെങ്കിൽ കൂടുതൽ ജനവാസമുള്ള പ്രദേശങ്ങളിൽ നിന്ന് മാറിനിൽക്കുക.

*പുറത്തുപോകുമ്പോഴും വീടിനകത്തും കൊതുക് അകറ്റുന്ന വഴികൾ സ്വീകരിക്കുക. കൊതുകിനെ അകറ്റി നിർത്തുന്ന ക്രീം ഉപയോഗിക്കുക.

* കൃഷി പോലുള്ള പുറംജോലികൾ ചെയ്യുമ്പോൾ, ശരീരം പൂർണമായും മൂടുന്ന വസ്ത്രം ധരിക്കുക.

*രാത്രി കൊതുക് വലകൾ ഉപയോഗിക്കുക.

*നിങ്ങൾക്ക് ഡെങ്കിയുടെ ലക്ഷണങ്ങളുണ്ടെങ്കിൽ ഡോക്ടറുമായി സംസാരിക്കുക.

*കൊതുകുകൾക്ക് പ്രജനനം നടത്താൻ കഴിയുന്ന സ്ഥലങ്ങളിൽ വെള്ളം ശേഖരിക്കുന്നത് ഒഴിവാക്കുക. പഴയ ടയറുകൾ, ക്യാനുകൾ അല്ലെങ്കിൽ മഴ ശേഖരിക്കുന്ന പൂച്ചട്ടികൾ എന്നിവ ഇതിൽ ഉൾപ്പെടുന്നു.

* വീട്ടിൽ ആർക്കെങ്കിലും ഡെങ്കിപ്പനി വന്നാൽ, നിങ്ങളെയും മറ്റ് കുടുംബാംഗങ്ങളെയും കൊതുകുകളിൽ നിന്ന് സംരക്ഷിക്കുന്നതിൽ ജാഗ്രത പാലിക്കുക. രോഗം ബാധിച്ച കുടുംബാംഗത്തെ കടിക്കുന്ന കൊതുകുകൾ നിങ്ങളുടെ വീട്ടിലെ മറ്റുള്ളവരിലേക്കും അണുബാധ വ്യാപിപ്പിക്കും.