ഒരു ഡിവൈസില്‍ ഒന്നിലധികം അക്കൗണ്ടുകള്‍ ഉപയോഗിക്കാന്‍ ഉപയോക്താക്കളെ അനുവദിക്കുന്ന ഫീച്ചര്‍ അവതരിപ്പിച്ച് വാട്ട്സ്ആപ്പ്. വ്യത്യസ്ത ഡിവൈസുകളില്‍ നിന്ന് ഒരേ അക്കൗണ്ടിലേക്ക് ലോഗിന്‍ ചെയ്യാന്‍ ഉപയോക്താക്കളെ നേരത്തെ വാട്സ്ആപ്പ് അനുവദിച്ചിരുന്നു. ജോലി സംബന്ധമായി ഒരു അക്കൗണ്ടും വ്യക്തിഗത ആവശ്യങ്ങള്‍ക്ക് മറ്റൊരു അക്കൗണ്ടും ഉപയോഗിക്കുന്നവര്‍ക്ക് പുതിയ ഫീച്ചര്‍ ഗുണകരമാകും.
ഓരോ തവണയും വ്യത്യസ്ത അക്കൗണ്ട് ഉപയോഗിക്കാന്‍ ആഗ്രഹിക്കുമ്പോള്‍ ലോഗ് ഔട്ട് ചെയ്യാനും ലോഗിന്‍ ചെയ്യാനും രണ്ട് ഫോണുകള്‍ കൊണ്ടുനടക്കാനും അല്ലെങ്കില്‍ തെറ്റായ അക്കൗണ്ടില്‍ നിന്ന് ആര്‍ക്കെങ്കിലും അബദ്ധത്തില്‍ സന്ദേശം അയയ്ക്കുന്നതുള്‍പ്പെടെയുള്ള പ്രശ്നങ്ങളില്‍ നിന്ന് പുതിയ ഫീച്ചര്‍ ഉപയോക്താക്കളെ രക്ഷിക്കും.
സുഹൃത്തുക്കളുമായും കുടുംബാംഗങ്ങളുമായും ചാറ്റുചെയ്യുക, സഹപ്രവര്‍ത്തകരുമായും ക്ലയന്റ്‌സുമായും ആശയവിനിമയം നടത്തുക, അല്ലെങ്കില്‍ വിവിധ ഗ്രൂപ്പുകളിലും കമ്മ്യൂണിറ്റികളിലും ചേരുക എന്നിങ്ങനെ വ്യത്യസ്ത ആവശ്യങ്ങള്‍ക്കായി പ്രത്യേക അക്കൗണ്ടുകള്‍ ഉള്ള സൗകര്യം ഉപയോക്താക്കള്‍ക്ക് ഇപ്പോള്‍ ആസ്വദിക്കാനാകും. ഒരു ഫോണില്‍ ഒന്നിലധികം വാട്സ്ആപ്പ് അക്കൗണ്ടുകള്‍ എങ്ങനെ സജ്ജീകരിക്കാം. ഈ ഫീച്ചര്‍ ഉപയോഗിക്കുന്നതിന്, ഉപയോക്താക്കള്‍ക്ക് രണ്ടാമത്തെ ഫോണ്‍ നമ്പറോ സിം കാര്‍ഡോ ഡ്യുവല്‍ സിം കാര്‍ഡുകളെ പിന്തുണയ്ക്കുന്ന ഒരു ഫോണോ ആവശ്യമാണ്.
ആദ്യമായി വാട്സ്ആപ്പ് സെറ്റിങ്‌സിലേക്ക് പോകുക, ചെറിയ ആരോ ബട്ടണില്‍ അമര്‍ത്തുക, നിങ്ങളുടെ നെയിമിലേക്ക് പോകുക, ആഡ് അക്കൗണ്ട് കൊടുക്കുക, നിങ്ങളുടെ രണ്ടാമത്തെ ഫോണ്‍ നമ്പര്‍ നല്‍കുക, എസ്എംഎസ് വഴി ലഭിക്കുന്ന കോഡ് വേരിഫൈ ആകും. ഇതോടെ നിങ്ങള്‍ക്ക് പുതിയ അക്കൗണ്ടിലേക്ക് പ്രവേശിക്കാം.
ഓരോ അക്കൗണ്ടിനും പ്രത്യേകം സ്വകാര്യതയും നോട്ടിഫിക്കേഷന്‍ ക്രമീകരണങ്ങളും ഉണ്ടായിരിക്കാം, അതിനാല്‍ നിങ്ങളുടെ മുന്‍ഗണനകള്‍ക്കനുസരിച്ച് നിങ്ങള്‍ക്ക് അവ ഇഷ്ടാനുസൃതമാക്കാനാകും. നിങ്ങള്‍ക്ക് ഓരോ അക്കൗണ്ടിനുമുള്ള ചാറ്റുകള്‍ മ്യൂട്ട് ചെയ്യുകയോ ആര്‍ക്കൈവ് ചെയ്യുകയോ സന്ദേശങ്ങള്‍ ഇല്ലാതാക്കുകയോ കോണ്‍ടാക്റ്റുകള്‍ ബ്ലോക്ക് ചെയ്യുകയോ ചെയ്യാം. വാട്ട്സ്ആപ്പിന്റെ ബീറ്റയിലും സ്ഥിരതയുള്ള ചാനലുകളിലും അപ്ഡേറ്റ് പുറത്തിറക്കിയതായി തോന്നുന്നു.
