മെൽബൺ : പ്രവാസി ലോകം കണ്ട ഏറ്റവും വലിയ വടംവലി മാമാങ്കത്തിന് ഓസ്‌ട്രേലിയയിലെ മെൽബണിൽ കളമൊരുങ്ങിയിരിക്കുന്നു. നവംബർ മാസം 5-)0 തിയതി, മെൽബൺ കില്സിത്തിലെ നെറ്റ്‌ ബോൾ ക്ലബ് ഇൻഡോർ സ്റ്റേഡിയത്തിൽവെച്ച്, മെൽബൺ കോട്ടയം ബ്രദർസിന്റെയും (MKB) ഫിഷിങ് ആൻഡ് അഡ്വെൻഞ്ചർ ക്ലബ് മെൽബണിന്റെയും(FAAM Club) സംയുക്താഭിമുഖ്യത്തിൽ, ജമ്മിന്റെ (GEM) സഹകരണത്തോടെയാണ് രണ്ടാമത് IHNA-IHM ഓൾ ഓസ്‌ട്രേലിയ വടംവലി മത്സരം സംഘടിപ്പിച്ചിരിക്കുന്നത്.
ഓസ്‌ട്രേലിയായുടെ വിവിധ ഭാഗങ്ങളിൽ നിന്നുമുള്ള 19 ചാമ്പ്യൻ ടീമുകളാണ്, കമ്പക്കയറിന്റെ ഈ ഉത്സവത്തിൽ മാറ്റുരയ്ക്കാനായി തയ്യാറായി വന്നിരിക്കുന്നത്. പ്രവാസി ലോകത്തുതന്നെ ഏറ്റവും കൂടുതൽ ടീമുകൾ മാറ്റുരയ്ക്കുന്നു എന്ന ഖ്യാതി കേട്ട മെൽബൺ വടംവലി, ഇതിനോടകംതന്നെ ഓസ്‌ട്രേലിയായിലാകമാനം തരംഗമായി മാറിയിരിക്കുകയാണ്. മറ്റു രാജ്യങ്ങളിലുള്ള വടംവലി പ്രേമികളുടെ അഭ്യർത്ഥനപ്രകാരം, വാശിയേറിയ ഈ ടൂർണമെന്റിലെ എല്ലാ മത്സരങ്ങളും കെ.വി.ടി.വി ചാനലിൽ തത്സമയം സംരക്ഷണം ചെയ്യുന്നതായിരിക്കും.
ഹോംഫിൻ ലോൺ ആൻഡ് മോർട്ടഗേജ് സൊല്യൂഷൻസ് സ്പോൺസർ ചെയ്യുന്ന $3333 ഒന്നാം സമ്മാനവും, AAA അക്കൗന്റിംഗ്‌ & മറൂണ്ട ഡെന്റൽ കെയർ സ്പോൺസർ ചെയ്യുന്ന $2222 രണ്ടാം സമ്മാനവും, ഫ്ലാവറേജ്‌ കാറ്ററിങ് സ്പോൺസർ ചെയ്യുന്ന $1111 മൂന്നാം സമ്മാനവും, എ യു കാർട്ട് സ്പോൺസർ ചെയ്യുന്ന $777 നാലാം സമ്മാനവും തുടങ്ങി, മത്സരത്തിൽ പങ്കെടുക്കുന്ന എല്ലാ ടീമുകൾക്കും സമ്മാനം ഉണ്ടായിരിക്കുന്നതാണ്. കൂടാതെ ഇതോടൊപ്പം, മത്സരത്തിന്റെ ഗതി നിർണ്ണയിക്കുന്ന പ്രകടനങ്ങൾ നടത്തുന്നവർക്കുള്ള വ്യക്തിഗത സമ്മാനങ്ങളും ഉണ്ടായിരിക്കുന്നതാണ്.
ശ്രീ. മനോജ് വള്ളിത്തോട്ടം ചെയർമാനായും, ബിജോ മുളയ്ക്കൻ കൺവീനറായും, സിബിൽ ബിനോയ് ഓഫീസ്‌ സെക്രട്ടറി ആയും, ജിബിൻ തോമസ് ടീം ക്യാപ്റ്റനായുമുള്ള, വിവിധ കമ്മറ്റികളുടെ നേതൃത്വത്തിൽ, മെൽബൺ വടംവലി മാമാങ്കത്തിനുള്ള ഒരുക്കങ്ങൾ പൂർത്തിയായി വരികയാണ്. മെൽബണിൽ നടക്കുന്ന ഈ ഏറ്റവും വലിയ വടംവലി മാമാങ്കത്തിൽ പങ്കാളികളാകുവാനും, ചാമ്പ്യൻ ടീമുകളെ പ്രോത്സാഹിപ്പിക്കുന്നതിനുമായി ഓസ്‌ട്രേലിയായിലുള്ള എല്ലാ വടംവലി പ്രേമികളെയും, മെൽബണിന്റെ മണ്ണിലേക്ക് ഏറ്റവും സ്നേഹപൂർവ്വം സ്വാഗതം ചെയ്തുകൊള്ളുന്നു.
ന്യൂസ്‌ തയ്യാറാക്കിയത് : ഷിനോയ് മഞ്ഞാങ്കൽ
