കുവൈത്ത് സിറ്റി > കുവൈത്തിൽ വെബ്സൈറ്റ് ലിങ്ക് വഴി ട്രാഫിക് പിഴ അടക്കണമെന്നും അല്ലെങ്കിൽ വലിയ പിഴ ഈടാക്കുമെന്നും ആവശ്യപ്പെട്ട് തട്ടിപ്പുകാർ അയച്ച എസ്എംഎസ് സന്ദേശങ്ങൾക്കെതിരെ ആഭ്യന്തര മന്ത്രാലയം പൊതുജനങ്ങൾക്ക് മുന്നറിയിപ്പ് നൽകി. ട്രാഫിക് നിയമലംഘനത്തിന് പിഴയടച്ചില്ലെങ്കിൽ വലിയ പിഴ ചുമത്തുമെന്ന് ഭീഷണിപ്പെടുത്തുന്ന സന്ദേശങ്ങൾ ശ്രദ്ധിക്കണമെന്ന് മന്ത്രാലയം വാർത്താക്കുറിപ്പിൽ അറിയിച്ചു.
ആളുകളെ കബളിപ്പിക്കാൻ മന്ത്രാലയത്തിന്റെ വെബ്സൈറ്റ് ക്ലോൺ ചെയ്യുന്ന ഒരു വെബ്സൈറ്റ് ഉപയോഗിക്കുന്ന തട്ടിപ്പുകാർ ചെയ്യുന്ന പ്രവർത്തനങ്ങളാണിവ എന്നും മന്ത്രാലയം മുന്നറിയിപ്പ് നൽകി. ഗവൺമെന്റ് ഡിജിറ്റൽ പ്ലാറ്റ്ഫോമായ സഹേൽ ആപ്ലിക്കേഷനിൽ ട്രാഫിക് ലംഘനങ്ങളെക്കുറിച്ചുള്ള മുന്നറിയിപ്പ് സന്ദേശങ്ങൾ മാത്രമേ നിയമ ലംഘകർക്ക് അയയ്ക്കുകയുള്ളൂവെന്നും , ഏതെങ്കിലും പേയ്മെന്റ് ഓപ്പറേഷന് മുമ്പ് മന്ത്രാലയത്തിന്റെ ഔദ്യോഗിക വെബ്സൈറ്റ് പരിശോദിച്ച് ഉറപ്പാക്കണമെന്ന് രാജ്യത്തെ സ്വദേശികളോടും വിദേശികളോടും അഭ്യർത്ഥിച്ചു
