ധാക്ക> അവസാന ഓവർവരെ ആവേശം നിറഞ്ഞ മത്സരത്തിൽ ബംഗ്ലാദേശ് വനിതകളെ എട്ട് റൺസിന് തകർത്ത് ഇന്ത്യ. 95 റൺസ് വിജയലക്ഷ്യവുമായി കളത്തിലിറങ്ങിയ ബംഗ്ലാദേശിന് അവസാന ഓവറിൽ നാല് വിക്കറ്റുകളാണ് നഷ്ടമായത്. സ്കോര്: ഇന്ത്യ 95/8, ബംഗ്ലാദേശ് 87/10.
ടോസ് നേടി ബാറ്റിംഗിനെത്തിയ ഇന്ത്യക്ക് നിശ്ചിത ഓവറിൽ എട്ട് വിക്കറ്റ് നഷ്ടത്തിൽ 95 റൺസെടുക്കാനാണ് സാധിച്ചത്. 19 റൺസെടുത്ത ഷെഫാലി വർമയാണ് ഇന്ത്യയുടെ ടോപ് സ്കോറർ. മൂന്ന് വിക്കറ്റുമായി സുൽത്താന ഖതുൻ ബംഗ്ലാ നിരയിൽ തിളങ്ങി. ബാറ്റ് ചെയ്യാൻ അവസരം ലഭിച്ച മലയാളി താരം മിന്നുമണി മൂന്ന് പന്തിൽ അഞ്ച് റൺസുമായി പുറത്താവാതെ നിന്നു. മത്സരത്തിൽ നാല് ഓവറുകൾ പന്തെറിഞ്ഞ താരം ഒൻപതു റൺസ് മാത്രം വഴങ്ങി രണ്ട് വിക്കറ്റുകളും വീഴ്ത്തി.
മറുപടി ബാറ്റിംഗിനെത്തിയ ബംഗ്ലാദേശും തകർച്ചയാടെയാണ് തുടങ്ങിയത്. ക്യാപ്റ്റൻ നിഗർ സുൽത്താന (55 പന്തിൽ 38 റൺസ്) മാത്രമാണ് രണ്ടക്കം കണ്ടത്. 19-ാം ഓവറിൽ നിഗർ സുൽത്താനയെ ദീപ്തി ശർമ വീഴ്ത്തിയതോടെയാണ് കളി ഇന്ത്യയ്ക്ക് അനുകൂലമായത്. ഷെഫാലിയുടെ അവസാന ഓവറിൽ റൺ ഔട്ട് അടക്കം നാല് വിക്കറ്റുകളാണ് വീണത്. കളിയിൽ ദീപ്തി ശർമയും ഷെഫാലിയും മൂന്ന് വിക്കറ്റുകൾ വീതം വീഴ്ത്തി.
