അബുദാബി >പോളിമർ ഉപയോഗിച്ച് നിർമ്മിച്ച 1000 ദിർഹം മൂല്യമുള്ള പുതിയ ബാങ്ക് നോട്ട് യുഎഇ സെൻട്രൽ ബാങ്ക് വിപണിയിൽ പുറത്തിറക്കി. 2023 ഏപ്രിൽ 10 മുതൽ ബാങ്കുകളിലും എക്സ്ചേഞ്ച് ഹൗസുകളിലും പുതിയ നോട്ടുകൾ ലഭ്യമാകും. കള്ള നോട്ടുകൾ തടയും വിധത്തിൽ സുരക്ഷ വർധിപ്പിച്ചു കൊണ്ടാണ് പുതിയ നോട്ടുകൾ പ്രചാരത്തിൽ വരുന്നത്.
സാംസ്കാരിക, വികസന ചിഹ്നങ്ങൾക്കൊപ്പം യുഎഇയുടെ ആഗോള നേട്ടങ്ങളെ പ്രതിഫലിപ്പിക്കുന്ന ചിത്രങ്ങളും പുതിയ നോട്ടിന്റെ രൂപകല്പനയിൽ ഉൾപ്പെടുന്നു. വ്യതിരിക്തമായ സൗന്ദര്യാത്മക സ്വഭാവം, തവിട്ട് നിറത്തിലുള്ള വ്യത്യസ്ത ഷേഡുകൾ എന്നിവയോടൊപ്പം നിലവിൽ പ്രചാരത്തിലുള്ള നോട്ടിന്റെ വർണ്ണ സവിശേഷതകൾ നോട്ടിൽ നിലനിർത്തിയിട്ടുണ്ട്. പൊതുജനങ്ങൾക്ക് തിരിച്ചറിയാൻ എളുപ്പമാക്കുന്നതോടൊപ്പം, യുഎഇ നാഷണൽ ബ്രാൻഡിന്റെ ഫ്ലൂറസെന്റ് നീല അടയാളങ്ങളും മധ്യഭാഗത്ത്, വിപുലമായ ഇന്റാഗ്ലിയോ പ്രിന്റിംഗ് ടെക്നിക്കുകൾ ഉപയോഗിച്ചുള്ള ഡ്രോയിംഗുകളും ലിഖിതങ്ങളും ഇതിൽ ഉൾക്കൊള്ളന്നു.അന്തരിച്ച ഷെയ്ഖ് സായിദ് ബിൻ സുൽത്താൻ അൽ നഹ്യാന്റെ ചിത്രം പുതിയ ബാങ്ക് നോട്ടിന്റെ മുൻവശത്ത് ചിത്രീകരിച്ചിരിക്കുന്നു. എമിറേറ്റ്സ് മാർസ് മിഷനായ “ഹോപ്പ് പ്രോബ്” ന്റെ ചിത്രവും നോട്ടിൽ ഉൾക്കൊള്ളിച്ചിട്ടുണ്ട്. രാജ്യത്തെ ഊർജ സ്രോതസ്സുകൾ വൈവിധ്യവത്കരിക്കുന്നതിലും കാർബൺ ബഹിർഗമനം കുറയ്ക്കുന്നതിലും പ്രധാന പങ്കുവഹിക്കുന്ന അബുദാബിയിലെ ബറാക്ക ആണവോർജ്ജ പ്ലാന്റിന്റെ ചിത്രമാണ് പുതിയ നോട്ടിന്റെ പിൻഭാഗത്ത് ഉൾപ്പെടുത്തിയിരിക്കുന്നത്.
ഉപഭോക്താക്കളുടെ ആത്മവിശ്വാസം വർധിപ്പിക്കുന്നതിനും ദേശീയ കറൻസിയുടെ കള്ളപ്പണത്തെ ചെറുക്കുന്നതിനുമായി, യൂറോപ്പ്, മിഡിൽ ഈസ്റ്റ്, ആഫ്രിക്ക എന്നിവിടങ്ങളിൽ വിതരണം ചെയ്യുന്ന നോട്ടുകളിൽ ആദ്യമായി ഉപയോഗിക്കുന്ന സ്പാർക് ഫ്ളോ ഡൈമെൻഷൻ പോലുള്ള ആധുനിക സാങ്കേതികവിദ്യകൾ ഉൾപ്പെടുന്ന നൂതന സുരക്ഷാ ഫീച്ചറുകൾ പുതിയ ബാങ്ക് നോട്ടിൽ ഉൾപ്പെടുത്തിയിട്ടുണ്ട്. സുരക്ഷയുടെയും രൂപകൽപ്പനയുടെയും കാര്യത്തിൽ വ്യത്യസ്തമായ വിഷ്വൽ ഇഫക്റ്റുകൾക്ക് പുറമേ, കാഴ്ചാ വൈകല്യമുള്ളവരായ ഉപഭോക്താക്കളെ ബാങ്ക് നോട്ടിന്റെ മൂല്യം തിരിച്ചറിയാൻ സഹായിക്കുന്നതിന് സിബിയുഎഇ ബ്രെയിലിൽ പ്രമുഖ ചിഹ്നങ്ങളും ചേർത്തിട്ടുണ്ട്. നിലവിലെ 1000 ദിർഹം നോട്ടും പുതിയ നോട്ടിനോടൊപ്പം പ്രചാരത്തിലുണ്ടാകും.
