ദമ്മാം> കേരളത്തിന്റെ നവോത്ഥാന ചരിത്രത്തിൽ വേണ്ട പോലെ രേഖപ്പെടുത്താതെ പോയ ഒന്നാണ് പ്രവാസികളുടെ പങ്കെന്ന് പ്രശസ്ത സാഹിത്യകാരൻ ശിഹാബുദ്ദീൻ പൊയ്ത്തുംകടവ് പറഞ്ഞു. “”ഏത് യുദ്ധസാഹചര്യത്തേക്കാളും അപകടകരമായ സാഹചര്യങ്ങളെ മുറിച്ചു കടന്നാണ് ആദ്യകാല പ്രവാസികൾ കേരളത്തിന്റെ സാമ്പത്തിക നവോത്ഥാന പ്രവർത്തനങ്ങളിൽ പങ്കുചേർന്നത്. ആ പോരാട്ടത്തിൽ ജീവൻ പൊലിഞ്ഞവരും പരാജയപ്പെട്ടവരും ഇനിയും തിരിച്ചു വരാത്ത ഉരുവിൽ കയറി പോയവരും ഉണ്ട്. അവരുടെ പേര് കൂടി എഴുതിചേർക്കുമ്പോളാണ് കേരളത്തിന്റെ നവോത്ഥാന ചരിത്രം പൂർണമാകുക”-അദ്ദേഹം പറഞ്ഞു. ദമ്മാം നവോദയ ബദർ അൽ റബി ഹോസ്പിറ്റൽ ഹാളിൽ സംഘടിപ്പിച്ച “നവോത്ഥാന മൂല്യങ്ങളും പ്രവാസവും” എന്ന സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
നവോദയ രക്ഷാധികാരി സമിതി അംഗം പ്രദീപ് കൊട്ടിയം എഴുത്തുകാരനെ സദസ്സിന് പരിചയപ്പെടുത്തി. കേന്ദ്രസാംസ്കാരിക കമ്മിറ്റി ചെയർമാൻ മോഹനൻ വെള്ളിനേഴി അദ്ധ്യക്ഷനായിരുന്ന യോഗത്തിൽ മുഖ്യരക്ഷാധികാരി ബഷീർ വരോട്, ജനറൽ സെക്രട്ടറി റഹീം മടത്തറ, ട്രഷറർ കൃഷ്ണകുമാർ ചവറ, വിവിധ സംഘടനാ-മാധ്യമ പ്രതിനിധികളായ മുഹമ്മദ് നജാത്തി, ഹബീബ് ഏലംകുളം, സാജിദ് ആറാട്ടുപുഴ, ബിജു കല്ലുമല, ഹമീദ് വടകര, സോഫിയ ഷാജഹാൻ, അമീർ അലി, എന്നിവർ പങ്കെടുത്തു. കേന്ദ്രസാംസ്കാരിക കമ്മിറ്റി കൺവീനർ ഷമീം നാണത്ത് സ്വാഗതവും കേന്ദ്രകുടുംബവേദി സാംസ്കാരിക കമ്മിറ്റി കൺവീനർ അനുരാജേഷ് നന്ദിയും പറഞ്ഞു. തുടർന്ന് നടന്ന ചർച്ചയിൽ സദസ്സിന്റെ സംശയങ്ങൾക്ക് എഴുത്തുകാരൻ മറുപടി പറഞ്ഞു
