ഭക്ഷണം തയ്യാറാക്കുമ്പോൾ നമ്മൾ പതിവായി ഉപയോഗിക്കുന്ന ചേരുവകൾ തന്നെയാണ് ശരീരത്തിന് വലിയ തോതിൽ ആരോഗ്യ ഗുണങ്ങൾ നൽകുന്നത്. എന്നാൽ ചില ചേരുവകൾ കൂടുതലായി ഉപയോഗിക്കുകയോ ചിലത് വളരെ കുറച്ച് മാത്രം ഉപയോഗിക്കുകയോ ചെയ്യുന്നത് ഗുണം ചെയ്യില്ല. എല്ലാ ചേരുവകളും മിതമായ രീതിയിൽ ഉപയോഗിച്ചാൽ വിവിധ ആരോഗ്യ ഗുണങ്ങൾ ലഭിക്കും.
ഇഞ്ചി
പാചകത്തിൽ ധാരാളമായി ഉപയോഗിക്കുന്ന ഒന്നാണ് ഇഞ്ചി. ആയുർവേദ ചികിത്സയിൽ മുൻ നിരയിൽ നിൽക്കുന്ന ഒന്ന്. ശരീരത്തിലെ വിഷാംശം നീക്കം ചെയ്യാനും ദഹനത്തെ സഹായിക്കുന്ന എൻസൈമുകൾ കൂടുതലായി ഉദ്പാദിപ്പിക്കാനും ഇഞ്ചി സഹായിക്കും. ഭക്ഷണത്തിൽ പാകം ചെയ്ത് കഴിക്കുന്നതിനേക്കാൾ, വേവിക്കാതെ കഴിക്കുന്നതാണ് കൂടുതൽ ഗുണം നൽകുക. ഇതിനായി ഭക്ഷണത്തിന് മുൻപ് ഒരു ചെറിയ ഇഞ്ചി കഷ്ണം കഴിക്കാം. ഒരു സ്പൂൺ ലൈം ജ്യൂസ്, ഒരു നുള്ള് ഉപ്പ് എന്നിവയിൽ ഇഞ്ചി കഷ്ണം യോജിപ്പിച്ച് കഴിക്കുന്നത് ഗുണം ചെയ്യും. കൂടാതെ ചായയിൽ ഒരു കഷ്ണം ഇഞ്ചി ചതച്ച് ചേർക്കുന്നത് ജലദോഷം, സൈനസ് പോലുള്ള പ്രശ്നങ്ങൾക്ക് പരിഹാരമുണ്ടാകും.
കറുവപ്പട്ട
ധാരാളം ആൻറി വൈറൽ ഗുണങ്ങൾ അടങ്ങിയതാണ് കറുവപ്പട്ട. ജലദോഷം പെട്ടെന്ന് മാറ്റിയെടുക്കാനും തൊണ്ടയിലെ പ്രയാസങ്ങൾ കുറയ്ക്കാനും ഇത് സഹായിക്കും. ആൻറി ഇന്ഫ്ലമേറ്ററി ഗുണങ്ങൾ അടങ്ങിയതിനാൽ സോർ ത്രോട്ട് വളരെ വേഗത്തിൽ മാറ്റിയെടുക്കാനും ഇത് സഹായിക്കും.
ജീരകം
ആൻറി ഇന്ഫ്ലമേറ്ററി ഗുണങ്ങൾ ഉള്ളതിനാൽ ജീരകം കഴിക്കുന്നത് ദഹനത്തെ സഹായിക്കും. ദഹനം മെച്ചപ്പെടുത്തുന്നതിനാൽ അസിഡിറ്റി സംബന്ധമായ പ്രശ്നങ്ങൾ കുറയ്ക്കാനും ഇത് സഹായിക്കും. കറികളിൽ ജീരകം ഉൾപ്പെടുത്തുന്നത് നല്ലതാണ്. കഴിയുമെങ്കിൽ ജീരകം ഉപയോഗിച്ച് വെള്ളം തിളപ്പിക്കുന്നതും ഗുണം ചെയ്യും.
മല്ലി
ശരീരം തണുപ്പിക്കാനും ആസിഡ് റിഫ്ലക്സ് ഒഴിവാക്കാനും മല്ലി കഴിക്കുന്നത് നല്ലതാണ്. ആമാശയത്തിലെ അണുബാധ ഒഴിവാക്കാനും വിശപ്പ്‌ ക്രമീകരിക്കാനും മല്ലി സഹായകമാണ്.
കായം
രൂക്ഷമായ ഗന്ധം പുറപ്പെടുവിക്കുന്ന ഒന്നാണ് കായം എങ്കിൽ പോലും, ദഹന സംബന്ധമായ എല്ലാ പ്രശ്നങ്ങൾക്കും ഇത് പരിഹാരമാണ്. ദഹനം സുഗമമാക്കാനും വയർ വേദന കുറയ്ക്കാനും കായം സഹായിക്കും. വയറുവേദനയോ വയർ സംബന്ധമായ എന്തെങ്കിലും അസ്വസ്തതകളോ അനുഭവപ്പെട്ടാൽ ഒരു ഗുളിക വലിപ്പത്തിലുള്ള കായം ചൂട് വെള്ളത്തോടൊപ്പം കഴിക്കുന്നത് വളരെ വേഗത്തിൽ ആശ്വാസം നൽകും.
മഞ്ഞൾ
കേരളീയരോട് മഞ്ഞളിന്റെ ഗുണങ്ങളെക്കുറിച്ച് പ്രത്യേകം പറയേണ്ടതില്ല. ഭക്ഷണത്തിലെയും ശരീരത്തിലെയും വിഷാംശം പൂർണമായും നീക്കം ചെയ്യാൻ സഹായിക്കുന്നതാണ് മഞ്ഞൾ. അതുകൊണ്ട് തന്നെ ഭക്ഷണത്തിലും ആയുർവേദ മരുന്നുകളിലും ധാരാളമായി തന്നെ ഉപയോഗിക്കുന്ന ഒന്നാണ് മഞ്ഞൾ. ശരീരത്തിന് ചൂട് നൽകുമെന്നതിനാൽ വാത, പിത്ത ദോഷങ്ങളെ ഇല്ലാതാക്കാൻ മഞ്ഞൾ സഹായിക്കും. ശരീരത്തിന് പ്രതിരോധ ശേഷി നൽകാനും കരളിൽ അടിഞ്ഞുകൂടിയ വിഷാംശങ്ങൾ നീക്കം ചെയ്യാനും ഇത് സഹായിക്കും. സന്ധിവേദന കുറയ്ക്കാനും സന്ധികളുടെ പ്രവർത്തനം സുഗമമാക്കാനും മഞ്ഞൾ കഴിക്കുന്നത് സഹായകമാണ്. അതിനാൽ ഭക്ഷണം പാകം ചെയ്യുമ്പോൾ കഴിയുന്നത്ര മഞ്ഞൾ ഉപയോഗിക്കാൻ ശ്രദ്ധിക്കാം. ശുദ്ധമായ മഞ്ഞൾ തന്നെ ഇതിനായി തിരഞ്ഞെടുക്കുക.
ഏലയ്ക്ക
ഇന്ത്യൻ വിഭവങ്ങളിൽ വളരെ പ്രാധാന്യമുള്ളതാണ് ഏലക്കായ. കട്ടൻ ചായ മുതൽ വിവിധ മധുര പലഹാരങ്ങളിലും ഏലക്കായ ഒരു പ്രധാന ചേരുവയാണ്. ഏലക്കായ ചേർത്തില്ലെങ്കിൽ ഉദ്ദേശിക്കുന്ന രുചി ലഭിക്കില്ലെന്നത് കൊണ്ട് തന്നെ എല്ലാ അടുക്കളകളിലും ഏലക്കായ ഒരു സ്ഥിരം സാന്നിധ്യമാണ്. അല്പം സ്പൈസി രുചിയോടോപ്പവും ഏലക്കായ മികച്ചു നിൽക്കും. വായ്നാറ്റം അകറ്റാനും വായുടെ ആരോഗ്യത്തിനും ഏലക്കായ ചവയ്ക്കുന്നത് ഗുണം ചെയ്യും. ആയുർവേദത്തിൽ ദഹനത്തെ സഹായിക്കുന്ന സുഗന്ധവ്യഞ്ജനമായും എലക്കായയെ കണക്കാക്കുന്നുണ്ട്. നിരവധി ആരോഗ്യ ഗുണങ്ങൾ അടങ്ങിയ ഈ അടുക്കളക്കൂട്ടുകൾ പതിവായി ഉപയോഗിക്കുന്നത് ഏറെ നല്ലതാണ്.
