പ്രമുഖ ചൈനീസ് സ്മാർട്ഫോൺ നിർമാതാക്കളായ വിവോ പുതിയ സ്മാർട്ഫോണുകളായ വിവോ വി23 5ജി, വിവോ വി23 പ്രോ 5ജി ഇന്ത്യൻ വിപണിയിലെത്തിച്ചു. മീഡിയടെക് ഡൈമെൻസിറ്റി 920, മീഡിയടെക് ഡൈമെൻസിറ്റി 1200 പ്രോസസറുകളാണ് വിവോ വി 23, വി 23 പ്രോ മോഡലുകളിൽ ഉപയോഗിച്ചിരിക്കുന്നത്.
29,900 രൂപ മുതൽ 34,990 രൂപവരെയാണ് വി 23 5ജിയുടെ വില. കൂടാതെ വി 23 പ്രോ 5ജി 38,990 മുതൽ 43,990 രൂപയാണ് വില. സൂര്യപ്രകാശത്തിലെ അൾട്രാ വയലെറ്റ് കിരണങ്ങളുടെ സാന്നിധ്യംകൊണ്ട് സ്വയം നിറംമാറാൻ കഴിയുന്ന ഫ്ലൂറൈറ്റ് ആന്റി ഗ്ലെയർ ഗ്ലാസ്സാണ് രണ്ട് ഫോണുകൾക്കും നൽകിയിരിക്കുന്നത്.
വിവോ വി 23 5ജിയുടെ സവിശേഷതകൾ
മീഡിയടെക് ഡൈമെൻസിറ്റി 920 പ്രോസസ്സറിന്റെ കരുത്തോടെയാണ് വിവോ വി 23 5ജി പ്രവർത്തിക്കുക. യുഎഫ്എസ് 2.2 സപ്പോർട്ടോടു കൂടിയ 12ജിബി വരെയുള്ള റാമും 256 ജിബി വരെയുള്ള സ്റ്റോറേജുമാണ് ഫോണിൽ നൽകിയിരിക്കുന്നത്. 1,080×2,400 പിക്സൽ സാന്ദ്രതയോടെയുള്ള 6.44 ഇഞ്ച് ഫുൾ എച്ച് ഡി+ അമോലെഡ് ഡിസ്പ്ലേയും 44W ഫാസ്റ്റ് ചാർജിങ് സപ്പോർട്ട് ചെയ്‌യുന്ന 4200mAh ബാറ്ററിയുമാണ് മറ്റ് സവിശേഷതകൾ. നാനോ സിം ഉൾപ്പെടുന്ന ഡ്യൂവൽ സിം സംവിധാനവും ഫോണിൽ നൽകിയിരിക്കുന്നു.
എഫ്/1.89 അപ്പർച്ചറോട് കൂടിയ 64 മെഗാപിക്സലിന്റെ പ്രൈമറി ക്യാമറയും എഫ്/2.22 അപ്പർച്ചറോട് കൂടിയ 8 മെഗാപിക്സലിന്റെ അൾട്രാ വൈഡ് ക്യാമറയും കൂടാതെ എഫ്/2.4 അപ്പർച്ചറോട് കൂടിയ 2 മെഗാപിക്സലിന്റെ മാക്രോ ക്യാമറയുമാണ് പിൻ ക്യാമറ സംവിധാനത്തിൽ സജ്ജീകരിച്ചിരിക്കുന്നത്. എന്നാൽ ഡ്യുവൽ സെൽഫി ക്യാമറ വിഭാഗത്തിൽ എഫ്/2.0 അപ്പർച്ചറോട് കൂടിയ 50 മെഗാപിക്സൽ ലെൻസും എഫ്/2.28 അപ്പർച്ചറോട് കൂടിയ 8 മെഗാപിക്സിലിന്റെ ലെൻസും നൽകിയിരിക്കുന്നു. വിവോയുടെ ഫൺ ടച്ച് ഒഎസ് 12 ഉം ആൻഡ്രോയിഡ് 12 സാങ്കേതികവിദ്യയും ഫോണിൽ ഉൾപ്പെടുത്തിയിരിക്കുന്നു.
വിവോ വി 23 പ്രോ 5ജിയുടെ സവിശേഷതകൾ
മീഡിയടെക്കിന്റെ നിലവിലുള്ള ഫ്ലാഗ്ഷിപ്പ് പ്രോസസ്സറായ ഡൈമെൻസിറ്റി 1200 പ്രോസസ്സറിന്റെ കരുത്തോടെയാണ് വിവോ വി 23 പ്രോ 5ജി വിപണിയിലെത്തിയിരിക്കുന്നത്. 12ജിബി വരെയുള്ള റാമും 256 ജിബി വരെയുള്ള സ്റ്റോറേജുമാണ് കമ്പനി നൽകിയിരിക്കുന്നത്. 1,080×2,376 പിക്സൽ സാന്ദ്രതയോടെയുള്ള 6.56 ഇഞ്ച് അമോലെഡ് ഡിസ്പ്ലേയും മികച്ച ബാറ്ററി ക്ഷമതക്കായി 44W ഫാസ്റ്റ് ചാർജിങ് സപ്പോർട്ടോട് കൂടിയ 4300mAh ബാറ്ററിയും ഫോണിൽ ഉൾപ്പെടുത്തിയിരിക്കുന്നു.
ട്രിപ്പിൾ ക്യാമറ സംവിധാനത്തോടെയെത്തുന്ന പിൻ ക്യാമറ വിഭാഗത്തിൽ എഫ്/1.88 അപ്പർച്ചറോട് കൂടിയ108 മെഗാപിക്സലിന്റെ പ്രൈമറി ക്യാമറയും 8 മെഗാപിക്സലിന്റെ അൾട്രാ വൈഡ് ക്യാമറയും കൂടാതെ 2 മെഗാപിക്സലിന്റെ മാക്രോ ക്യാമറയുമാണ് പിൻ ക്യാമറ വിഭാഗത്തിന് കരുത്തേകുന്നത്. വിവോ വി 23 യിൽ നൽകിയിരിക്കുന്ന അതേ ലെൻസുകളാണ് പ്രോയിലും സജ്ജീകരിച്ചിരിക്കുന്നത്. ആൻഡ്രോയിഡിന്റെ ഏറ്റവും പുതിയ ആൻഡ്രോയിഡ് 12 പതിപ്പും വിവോ ഫൺ ടച്ച് ഒഎസ് 12 ഉം ഫോണിൽ ഉൾപ്പെടുന്നു.
5ജി, 4ജി എൽടിഇ,ഡ്യൂവൽ ബാൻഡ് വൈഫൈ, യുഎസ്ബി ടൈപ്പ് സി, യുഎസ്ബി ഒടിജി, ബ്ലൂടൂത്ത് വേർഷൻ 5.2 പോലെയുള്ള കണക്‍ടിവിറ്റി സംവിധാനങ്ങളും ഇൻ ഡിസ്പ്ലേ ഫിംഗർപ്രിന്റ് സെൻസർ, ആക്സിലറോമീറ്റർ, ആമ്പിയന്റ് ലൈറ്റ് സെൻസർ, പ്രോക്സിമിറ്റി സെൻസർ, ഇ-കോമ്പസ്, ഗൈറോസ്കോപ്പ്, ജിപിഎസ് പോലെയുള്ള സെൻസറുകളും ഇരു ഫോണുകളിലും ഉൾപ്പെടുന്നു.
വിവോ വി 23, വിവോ വി 23 പ്രോ 5ജിയുടെയും വില
സൺഷൈൻ ഗോൾഡ്, സ്റ്റാർഡസ്റ്റ് ബ്ലാക്ക് എന്നീ നിറങ്ങളിൽ എത്തുന്ന വിവോ വി 23ക്ക് 8 ജിബി + 128 ജിബിക്ക് 29,900 രൂപയും 12 ജിബി + 256 ജിബിക്ക് 34,990 രൂപയുമാണ് വില.
എന്നാൽ ഇതേ നിറങ്ങളിൽ തന്നെ വിപണിയിലെത്തുന്ന വിവോ വി 23 പ്രോക്ക് 8 ജിബി + 128 ജിബിക്ക് 34,990 രൂപയും 12 ജിബി + 256 ജിബിക്ക് 43,990 രൂപയുമാണ് വില.
ഔദ്യോഗിക വെബ്സൈറ്റ് വഴിയും ഫ്ലിപ്കാർട്ട് വഴിയും മറ്റ് റീട്ടെയിൽ ഷോറൂമുകൾ വഴിയും ഫോൺ ലഭ്യമാകും. ജനുവരി 5 മുതൽ പ്രീ ഓർഡറുകളും ആരംഭിക്കും.
Content Highlights : Vivo V23 5G, Vivo V23 Pro 5G Launched in India
