തെക്കൻ ചൈനയിലെ ഗാൻഷോയിലുള്ള പാറകളിൽ നിന്ന് ഗവേഷകർ ഒരു മുട്ട കണ്ടെത്തി. വലിയൊരു ദിനോസർ മുട്ട. 6.6 മുതൽ 7.2 കോടി വർഷങ്ങൾ പഴക്കമുള്ള ആ മുട്ടയ്‍ക്കുള്ളിൽ ഒരു കേടുവരാതെ ഫോസിലായി സംരക്ഷിക്കപ്പെട്ട ദിനോസർ കുഞ്ഞിന്റെ ഭ്രൂണവുമുണ്ടായിരുന്നു.
ബേബി യിങ്ലിയാങ് എന്നാണ് ഈ ഫോസിൽ ഭ്രൂണത്തിന് ഗവേഷകർ പേരിട്ടിരിക്കുന്നത്. പല്ലില്ലാത്ത ഒവിറാപ്ടറോസർ എന്ന് വിളിക്കപ്പെടുന്ന തെറോപോഡ് ദിനോസർ വിഭാഗത്തിൽപ്പെടുന്ന ദിനോസറിന്റെ കുഞ്ഞാണിത്. ഏഷ്യ, വടക്കേ അമേരിക്ക എന്നിവിടങ്ങളിൽ 14.6 മുതൽ 6.6 കോടി വർഷങ്ങൾക്ക് മുമ്പ് ക്രെറ്റേഷ്യസ് കാലഘട്ടത്തിലാണ് ഇവറാപ്ടറോസറുകൾ ജീവിച്ചിരുന്നത്.
തല താഴേക്കും കാലുകൾ ഇരുവശത്തേക്കുമാക്കി ചുരുണ്ട് കിടക്കുവിധത്തിലായിരുന്നു മുട്ടയ്‍ക്കുള്ളിൽ ദിനോസർ കുഞ്ഞ്. ഇന്നു കാണുന്ന പക്ഷിമുട്ടകൾക്കുള്ളിൽ കുഞ്ഞുങ്ങൾ കിടക്കുന്നത് പോലെ തന്നെയാണിത്.
ഞാൻ ഇതുവരെ കണ്ടതിൽ ഏറ്റവും മനോഹരമായ ഫോസിലുകളിലൊന്നാണ് മുട്ടയ്‍ക്കുള്ളിലെ ദിനോസർ കുഞ്ഞിന്റേത് എന്ന് എഡിൻബർ സർവകലാശാലയിലെ പ്രൊഫസർ സ്റ്റീവ് ബ്രുസാറ്റ് പറഞ്ഞു. ഒരു പക്ഷികുഞ്ഞ് മുട്ടയിൽ കഴിയുന്നത് പോലെയാണ് ദിനോസർ കുഞ്ഞ് മുട്ടയിൽ കിടന്നതെന്നും. ഇന്നത്തെ പക്ഷികൾ ദിനോസറുകളിൽ നിന്ന് പരിണമിച്ചുണ്ടായതാണെന്നുള്ളതിന് തെളിവാണിതെന്നും അദ്ദേഹം പറഞ്ഞു.
ദിനോസർ ഭ്രൂണങ്ങളുടെ ഫോസിൽ അത്യപൂർവ്വമാണ്. പലപ്പോഴും പലയിടങ്ങളിലായി മാറിപ്പോയ അസ്ഥികൾ മാത്രമാണ് ദിനോസറുകളുടേതായി ലഭിക്കാറ്. ബേബി യിങ്ലിയാങിനെ കണ്ടെത്തിയതിൽ ഞങ്ങൾ ഏറെ ആവേശത്തിലാണ് പിഎച്ച്ഡി ഗവേഷകനും പ്രബന്ധത്തിന്റെ സഹ രചയിതാവുമായ ഫിയോൻ വായ്സം മാ പറഞ്ഞു.
ഐ സയൻസിൽ (iScience) ഈ പഠനം പ്രസിദ്ധീകരിച്ചിട്ടുണ്ട്. 17 സെന്റീമീറ്റർ നീളമുള്ള മുട്ടയ്‍ക്കുള്ളിൽ തലമുതൽ വാലറ്റം വരെ 27 സെന്റിമീറ്റർ നീളമുള്ള ദിനോസർ ഭ്രൂണമാണ് ഉള്ളത്. ചൈനയിലെ യിങ്ലിയാങ് സ്റ്റോൺ നേച്ചർ ഹിസ്റ്ററി മ്യൂസിയത്തിലാണ് ഇപ്പോൾ ഇതുള്ളത്.
Content Highlights: Baby Yingliang, a well-preserved dinosaur embryo fossil discovered
