ന്യൂഡൽഹി: ടെലികോം റെഗുലേറ്ററായ ട്രായിയ്ക്ക് ഏറ്റവും കൂടുതൽ പരാതി ലഭിച്ചത് ഭാരതി എയർടെലിനെതിരെ. വെള്ളിയാഴ്ച പാർലമെന്റിലാണ് സർക്കാർ ഈ വിവരം അറിയിച്ചത്. തൊട്ടുപിന്നിൽ വോഡഫോൺ ഐഡിയയും റിലയൻസ് ജിയോയുമാണ്. വാർത്താ-വിനിമയ മന്ത്രാലയം സഹമന്ത്രി ദേവുസിങ് ചൗഹാൻ നൽകിയ വിവരം അനുസരിച്ച് ഭാരതി എയർടെലിനെതിരെ 2021-ൽ സേവനവുമായി ബന്ധപ്പെട്ട 16111 പരാതികൾ ലഭിച്ചിട്ടുണ്ട്. വോഡഫോൺ ഐഡിയയ്ക്കെതിരെ 14,487, റിലയൻസ് ജിയോയ്ക്കെതിരെ 7341 പരാതികളും ലഭിച്ചു.
വോഡഫോൺ ഐഡിയയ്ക്കെതിരെയുള്ള 14487 പരാതികളിൽ 9186 എണ്ണം ഐഡിയയ്ക്കും 5301 എണ്ണം വോഡഫോണിനും എതിരെയുള്ളതാണ്. 732 പരാതികൾ എം.ടി.എൻ.എലിനെതിരെയും 2913 പരാതികൾ ബി.എസ്എൻ.എലിന് എതിരെയും ലഭിച്ചിട്ടുണ്ട്.
1997-ലെ ട്രായ് നിയമം അനുസരിച്ച് വ്യക്തിഗത ഉപഭോക്താക്കളെ കൈകാര്യം ചെയ്യാൻ ട്രായിയ്ക്ക് സാധിക്കില്ലെന്ന് ചൗഹാൻ പറഞ്ഞു. എങ്കിലും ലഭിച്ച പരാതികൾ നടപടി സ്വീകരിക്കണമെന്നാവശ്യപ്പെട്ട് ബന്ധപ്പെട്ട സേവനദാതാക്കൾക്ക് കൈമാറിയിട്ടുണ്ട്. ഉപഭോക്താക്കളുടെ പരാതികൾ കൈകാര്യം ചെയ്യാൻ എല്ലാ സേവനദാതാക്കളോടും ദ്വിതല പരാതി പരിഹാര സംവിധാനം ഏർപ്പെടുത്താൻ ആവശ്യപ്പെട്ടിട്ടുണ്ട്. അദ്ദേഹം പറഞ്ഞു.
ഈ സംവിധാനത്തിലൂടെ ഉപഭോക്താവിന് സേവനാധിഷ്ടിത പരാതികൾ നൽകാൻ സാധിക്കും. പരാതി പരിഹരിക്കപ്പെട്ടില്ലെങ്കിൽ ടെലികോം സേവന ദാതാക്കളുടെ അപ്പീൽ അതോറിറ്റിയെ സമീപിച്ച് അപ്പീൽ നൽകാം. ചൗഹാൻ പറഞ്ഞു.
Content Highlights: Bharti Airtel gets maximum consumer complaints center in parliament
