പലവിധ കാരണങ്ങൾക്കൊണ്ട് ഫെയ്സ്ബുക്ക് അക്കൗണ്ട് ലോക്ക് ആയി നിയന്ത്രണം നഷ്ടപ്പെട്ട ക്രിയേറ്റർമാർ ഉൾപ്പടെയുള്ള ഇംഗ്ലീഷ് സംസാരിക്കുന്ന ഉപഭോക്താക്കൾക്ക് വേണ്ടി ലൈവ് ചാറ്റ് സൗകര്യം അവതരിപ്പിച്ച് മെറ്റ. നഷ്ടപ്പെട്ട അക്കൗണ്ട് എങ്ങനെ തിരികെ ലഭിക്കണം എന്നും അതിന് ആരെ എങ്ങനെ ബന്ധപ്പെടണമെന്നും അറിയാത്തവർക്ക് ഏറെ ഉപകാരപ്രദമായിരിക്കും ഈ സംവിധാനം. നിലവിൽ ക്രിയേറ്റർമാർക്കിടയിൽ ഈ ഫീച്ചർ പരീക്ഷിക്കാൻ തുടങ്ങിയിട്ടുണ്ട്.
അക്കൗണ്ടിൽ അസാധാരണ പ്രവർത്തനങ്ങൾ (Unusual Activities) ശ്രദ്ധയിൽ പെട്ടതിനെ തുടർന്നും കമ്മ്യൂണിറ്റി സ്റ്റാന്റേർഡ് ലംഘിച്ചതിന്റെ പേരിലും അക്കൗണ്ടിന്റെ നിയന്ത്രണം നഷ്ടപ്പെട്ടവർക്ക് വേണ്ടിയാണ് ലൈവ് ചാറ്റ് ഫീച്ചർ ഇപ്പോൾ അവതരിപ്പിച്ചിരിക്കുന്നത്. നിലവിൽ ഫെയ്സ്ബുക്ക് ആപ്പിലാണ് ഇത് ലഭിക്കുക. അക്കൗണ്ട് ലോക്ക് ആയ ഉപഭോക്താക്കൾക്ക് വേണ്ടി തത്സമയം സഹായം വാഗ്ദാനം ചെയ്യുന്ന ഫീച്ചർ ഇത് ആദ്യമായാണ് ഫെയ്സ്ബുക്ക് അവതരിപ്പിക്കുന്നത്.
അക്കൗണ്ടിലേക്കുള്ള നിയന്ത്രണം നഷ്ടപ്പെട്ട് ലോഗിൻ ചെയ്യാൻ കഴിയാതെ വരുമ്പോൾ ലൈവ് ചാറ്റ് ചെയ്യാനുള്ള നിർദേശം പോപ്പ് അപ്പ് ആയി കാണിക്കും. ഉപഭോക്താവിന് എന്തെങ്കിലും പ്രശ്നമുണ്ടെങ്കിൽ ഒരു സപ്പോർട്ട് ഏജന്റിനോട് സംസാരിക്കാം എന്ന സന്ദേശമാണ് പോപ്പ് അപ്പിലുണ്ടാവുക.
അതിലെ ചാറ്റ് റ്റു അസ് ഓപ്ഷനിൽ ക്ലിക്ക് ചെയ്താൽ പുതിയ ചാറ്റ് വിൻഡോ തുറക്കും. അതുവഴി നിങ്ങൾക്ക് ഒരു കസ്റ്റമർ സർവീസ് എക്സിക്യൂട്ടീവുമായി സംസാരിക്കാം. അക്കൗണ്ട് തിരികെ ലഭിക്കാനുള്ള സഹായം ഇവർ നൽകും. റിലേഷൻഷിപ്പ് മാനേജറെ ഏർപ്പെടുത്തിയിട്ടില്ലാത്ത യുഎസിലെ ക്രിയേറ്റർമാർക്ക് ലൈവ് ചാറ്റ് സപ്പോർട്ടിലൂടെ ഫെയ്സ്ബുക്കുമായി ബന്ധപ്പെടാം.
നിലവിൽ ഇത് പരീക്ഷണഘട്ടത്തിലാണ്. ഇതിനായി തിരഞ്ഞെടുക്കുന്ന ക്രിയേറ്റർമാർക്ക് ഇൻസ്റ്റാഗ്രാമിലും ഫെയ്സ്ബുക്കിലും ഇത് സംബന്ധിച്ച ക്ഷണം ലഭിക്കും.
ഇതോടൊപ്പം ക്രിയേറ്റർമാർക്ക് വേണ്ടി അശ്ലീല കീവേഡുകൾ ബ്ലോക്ക് ചെയ്യുന്ന ടൂളുകൾ, സസ്പെന്റിങ്/ ബാനിങ് കൺട്രോളുകൾ, സ്ട്രോങർ കമന്റ് കൺട്രോൾ ഉൾപ്പടെ വിവിധ കമന്റ് മോഡറേഷൻ ടൂളുകളും അവതരിപ്പിച്ചുവെന്ന് ഫെയ്സ്ബുക്ക് ഒരു ബ്ലോഗിൽ പറഞ്ഞു.
Content Highlights: Facebook live chat support for people who lose access to their accounts
