ശരീരഭാരം കുറയ്ക്കാൻ സഹായിക്കുന്നതിൽ നട്സ് കഴിക്കുന്നതിന് ഒരു വലിയ പങ്കുണ്ട്. നിങ്ങൾ അധികഭാരം കുറയ്ക്കാൻ ശ്രമിക്കുകയാണെങ്കിലോ അല്ലെങ്കിൽ അല്ലെങ്കിൽ ഭാരം ശരിയായ രീതിയിൽ നിലനിർത്താനോ ശ്രമിക്കുകയാണെങ്കിൽ ശരിയായ ഭക്ഷണത്തോടൊപ്പം, അവ ശരിയായ അളവിൽ കഴിക്കേണ്ടത് അത്യാവശ്യമാണ്. എന്നാൽ പലപ്പോഴും നട്സ് കഴിക്കുന്നത് അവഗണിക്കുകയാണ് മിക്കവരും ചെയ്യാറ്. ഇത് ഭാരം കൂടാൻ കാരണമാകുമെന്നാണ് പലരും ധരിച്ചിരിക്കുന്നത്. നട്സിൽ അടങ്ങിയ കൊഴുപ്പുകൾ കൂടുതലും നല്ല കൊഴുപ്പാണ്, അവ നിങ്ങളുടെ ശരീരഭാരം കൂട്ടില്ല. പകരം, ശരീരഭാരം കുറച്ച് ആരോഗ്യത്തോടെ തുടരാൻ നിങ്ങളെ സഹായിക്കും.
നട്സ് വളരെ വൈവിധ്യമാർന്ന ആരോഗ്യ ഗുണങ്ങളുള്ളതും പോഷക സമൃദ്ധവുമായ ഭക്ഷണങ്ങളാണ്. ശരീരഭാരം കുറയ്ക്കാൻ സഹായിക്കുന്ന മികച്ച നട്സ് ഏതൊക്കെയെന്ന് നോക്കാം.
1. ബദാം
നിങ്ങളുടെ മാതാപിതാക്കൾ ദിവസവും ബദാം കഴിക്കാൻ ശുപാർശ ചെയ്യുന്നത് എന്തുകൊണ്ടാണെന്ന് എപ്പോഴെങ്കിലും ചിന്തിച്ചിട്ടുണ്ടോ? ബദാമിൽ ധാരാളം പോഷക ഗുണങ്ങളുണ്ട്. മഗ്നീഷ്യം, കോപ്പർ, വിറ്റാമിൻ ഇ, കാൽസ്യം, പ്രോട്ടീൻ, ഫൈബർ എന്നിവയാൽ സമ്പുഷ്ടമാണ്. ശരീരഭാരം കുറയ്ക്കാൻ ഇത് വളരെ ആരോഗ്യകരമായ ഭക്ഷണമാണ്. ബദാമിലെ പ്രോട്ടീൻ, നാരുകൾ, ആരോഗ്യകരമായ കൊഴുപ്പുകൾ എന്നിവയുടെ സംയോജനം വിശപ്പും ആസക്തിയും കുറയ്ക്കുന്നതിലൂടെ വിശപ്പ് നിയന്ത്രിക്കാൻ സഹായിക്കുന്നു. ദിവസവും മൂന്ന് മുതൽ അഞ്ച് വരെ ബദാം കഴിക്കുന്നത് ശരീരഭാരം കുറയ്ക്കാനും കൊഴുപ്പ് മെറ്റബോളിസം മെച്ചപ്പെടുത്താനും സഹായിക്കും.
2. വാൾനട്ട്
വാൾനട്ട് അവശ്യ പോഷണവും രുചിയും നൽകുന്നു, കൂടാതെ വിവിധ രീതികളിൽ ഭക്ഷണത്തിൽ എളുപ്പത്തിൽ ഉൾപ്പെടുത്താം. വാൾനട്ട് ഹൃദയാരോഗ്യത്തിനും മികച്ചതാണ്. അപൂരിത കൊഴുപ്പുകൾ, ഒമേഗ-3, അവശ്യ പോഷകങ്ങൾ എന്നിവ ഇതിൽ അടങ്ങിയിട്ടുണ്ട്. ഇത് വിശപ്പ് നിയന്ത്രിക്കാൻ സഹായിക്കുകയും കൂടുതൽ നേരം സംതൃപ്തി അനുഭവപ്പെടുത്തുകയും ചെയ്യും. അനാരോഗ്യകരമായ ഭക്ഷണങ്ങളോടുള്ള ആസക്തിയും അവ നിയന്ത്രിക്കുന്നു. മൊത്തത്തിൽ, ശരീരഭാരം കുറയ്ക്കാൻ ഏറ്റവും മികച്ച നട്‌സുകളിൽ ഒന്നാണ് വാൾനട്ട്.
3. കശുവണ്ടി
കശുവണ്ടി ഒട്ടുമിക്ക ആളുകളുടെയും ഏറ്റവും പ്രിയപ്പെട്ട ലഘുഭക്ഷണങ്ങളിൽ ഒന്നാണ്. അത് രുചികരവും മധുരവുമുള്ള വിഭവങ്ങൾക്ക് അനുയോജ്യമാണ്. അവ മഗ്നീഷ്യത്തിന്റെ മികച്ച ഉറവിടമാണ്, ഇത് കൊഴുപ്പിന്റെയും കാർബോഹൈഡ്രേറ്റിന്റെയും മെറ്റബോളിസത്തെ നിയന്ത്രിക്കാൻ അത്യാവശ്യമാണ്. ഇത് ശരീരഭാരം കുറയ്ക്കാൻ നിങ്ങളെ സഹായിച്ചേക്കാം.
എന്തിനധികം, അവ താരതമ്യേന പ്രോട്ടീന്റെ നല്ല ഉറവിടമാണ്, ഇത് നിങ്ങളുടെ ശരീരഭാരം കുറയ്ക്കാനുള്ള യാത്ര വേഗത്തിലാക്കാനും സഹായിക്കും. കശുവണ്ടി കഴിക്കാൻ ഏറ്റവും അനുയോജ്യമായ സമയം രാവിലെയാണ്.
4. നിലക്കടല
രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിനും നല്ല കൊളസ്‌ട്രോളിന്റെ അളവ് നിലനിർത്തുന്നതിനും ഉയർത്തുന്നതിനും നിലക്കടല സഹായിക്കും. മാത്രമല്ല, അവ നിങ്ങളുടെ രക്തത്തിൽ കാണപ്പെടുന്ന ട്രൈഗ്ലിസറൈഡുകളുടെ എണ്ണം കുറയ്ക്കുന്നു. നിലക്കടല ശരീരഭാരം കുറയ്ക്കാൻ നല്ലതാണ്, കാരണം അവ ബി-വിറ്റാമിനുകൾ, ഫോളേറ്റ്, പ്ലാന്റ് പ്രോട്ടീൻ എന്നിവയുടെ സമ്പന്നമായ ഉറവിടമാണ്, ഇത് നിങ്ങളുടെ വയർ നിറയ്ക്കാൻ സഹായിക്കും.
5. പിസ്ത
പിസ്തയിൽ മിതമായ അളവിൽ പ്രോട്ടീൻ അടങ്ങിയിട്ടുണ്ട്, ഇത് കൂടുതൽ നേരം സംതൃപ്തിയോടെ തുടരാൻ നിങ്ങളെ സഹായിക്കും, അതുവഴി ജങ്ക് ഫുഡ് കഴിക്കുന്നതിൽ നിന്ന് നിങ്ങളെ തടയും. കൂടാതെ, പുതിയ പേശി ടിഷ്യൂകൾ നിർമ്മിക്കാൻ പ്രോട്ടീൻ സഹായിക്കുന്നു. ശരീരഭാരം കുറയ്ക്കാൻ സഹായിക്കുന്ന മോണോസാച്ചുറേറ്റഡ് കൊഴുപ്പുകളും ഇതിൽ അടങ്ങിയിട്ടുണ്ട്.
പതിവായി പിസ്ത കഴിക്കുന്നത് ശരീരഭാരം കുറയ്ക്കാൻ സഹായിക്കുന്നു. കൂടുതൽ പ്രോട്ടീനുകളും നാരുകളുമുള്ള ഏറ്റവും കുറഞ്ഞ കലോറി അടങ്ങിയ നട്ട്സുകളിൽ ഒന്നാണിത്.
നട്സ് മാത്രം കഴിച്ചാൽ തടി കുറയുമോ?
ശരീരഭാരം കുറയ്ക്കുന്നതിനെക്കുറിച്ച് സംസാരിക്കുമ്പോൾ, ഒരാൾ എപ്പോഴും മൊത്തം കലോറിയുടെ അളവ് നിരീക്ഷിക്കണം. നട്സ് ആരോഗ്യകരവും നിങ്ങളുടെ ശരീരഭാരം കുറയ്ക്കാൻ സഹായിക്കുമെങ്കിലും, ധാരാളം നട്ട്സ് കഴിക്കുന്നത് നിങ്ങളുടെ ഭക്ഷണത്തിൽ അധിക കലോറികൾ ചേർക്കും. അതുകൊണ്ട് അവ കഴിക്കുന്നതിന്റെ അളവിൽ നിയന്ത്രണം പാലിക്കേണ്ടത് പ്രധാനമാണ്.
