വിവിധ ജനപ്രിയ ബ്രാൻഡുകളിൽ നിന്നുള്ള ലക്ഷക്കണക്കിന് വൈഫൈ റൂട്ടറുകൾ ഭീഷണിയിലാണെന്ന് റിപ്പോർട്ട്. 226 സുരക്ഷാ പ്രശ്നങ്ങളാണ് തിരിച്ചറിഞ്ഞത്. ഐഓടി ഇൻസ്പെക്‍ടറിലെയും ചിപ്പ് മാഗസിനിലേയും സുരക്ഷാ ഗവേഷകരുടെ സംഘമാണ് ഈ കണ്ടെത്തൽ നടത്തിയത്.
നെറ്റ്ഗിയർ, അസൂസ്, സിനോളജി, ഡി-ലിങ്ക്, എവിഎം, ടിപി ലിങ്ക്, എഡിമാക്സ് ഉൾപ്പടെയുള്ള ബ്രാൻഡുകളുടെ റൂട്ടറുകളിലാണ് സുരക്ഷാ പ്രശ്നങ്ങൾ കണ്ടെത്തിയത്. ഇവയിൽ പലതും നിരവധി ആളുകൾ ഉപയോഗിക്കുന്നവയാണ്. ഹാക്കർമാർക്ക് എളുപ്പത്തിൽ കടന്നുകയറാൻ സാധിക്കുന്ന സുരക്ഷാ പ്രശ്നങ്ങളാണ് കണ്ടെത്തിയത്.
റൂട്ടറുകളുടെ നിർമാണത്തിൽ പുതിയ ഘടകങ്ങൾ ഉപയോഗിക്കാത്തതാണ് ഇതിനുള്ള കാരണമെന്ന് കരുതുന്നു. പ്രധാന ഘടകങ്ങളുടെ പഴയ പതിപ്പുകളാണ് ഇവയിലുള്ളത്. ലിനക്സ് കെർനലും മറ്റ് പഴയ സേവനങ്ങളും ഇതിൽ ഉൾപ്പെടുന്നു. സൈബർ കുറ്റവാളികൾക്ക് ഇവ ദുരുപയോഗം ചെയ്‌യുക എളുപ്പമാണ്.
പല റൂട്ടറുകളിലും എളുപ്പമുള്ള ഡിഫോൾട്ട് പാസ് വേഡുകളാണ് കമ്പനികൾ നൽകുന്നത്. ഇത് പ്രവചിക്കാൻ എളുപ്പമാണ്. പല ഉപഭോക്താക്കളും ഈ ഡിഫോൾട്ട് പാസ്വേഡ് മാറ്റാതെ ഉപയോഗിക്കുന്നവരാണ്. ഇത് അവരുടെ നെറ്റ് വർക്കിനെ അപകടത്തിലാക്കുന്നു. Admin പോലുള്ള ദുർബലമായ പാസ് വേഡുകളും ആളുകൾ ഉപയോഗിക്കുന്നു.
എന്തായാലും ഈ പ്രശ്നങ്ങൾ കണ്ടെത്തിയ ഉടൻ അസുസ്, ഡി-ലിങ്ക്, എഡിമാക്സ്, ലിങ്ക്സൈസ്, നെറ്റ് ഗിയർ, സൈനോളജി, ടിപി ലിങ്ക് പോലുള്ള കമ്പനികൾ പ്രശ്നം പരിഹരിച്ചിട്ടുണ്ട്. ഇതിന്റെ ഭാഗമായി ഉപഭോക്താക്കൾ വൈഫൈ റൂട്ടറിന്റെ സോഫ്റ്റ് വെയർ അപ്ഡേറ്റ് ചെയ്‌യേണ്ടിവരും.
Content Highlights: Millions of Wi-Fi routers are at risk found hundreds of security vulnerabilities
