അമിതഭാരവും മുട്ടുവേദനയും
മുട്ടുവേദനക്കുള്ള കാരണങ്ങൾ പല വിധത്തിലാണ്. അതിൽ പ്രധാനപ്പെട്ട ഒന്നാണ് അമിത ഭാരം.
ശരീരത്തിന്റെ എത്ര വലിയ ഭാരവും നമുക്ക് താങ്ങാനാവുന്നത് കാൽമുട്ടുകളിലാണ്. അധിക ശരീരഭാരം ചുമക്കുന്നത് മുട്ടിന് കൂടുതൽ സമ്മർദ്ദം ഉണ്ടാക്കുകയും വേദന അനുഭപ്പെടുകയും ചെയ്യുന്നു . സന്ധിവാതം, ആർത്രൈറ്റിസ്, അണുബാധ എന്നിവയെല്ലാം മുട്ടുവേദനയുടെ മറ്റു കാരണങ്ങളിൽ ചിലതാണ്. മുട്ടിന് തേയ്മാനം സംഭവിച്ചു വേദനയും നീരും ഉണ്ടാവുന്ന സന്ധിവാതമാണ് പ്രായമായവരിൽ മുട്ടുവേദനയുണ്ടാകുന്ന പ്രധാന കാരണം. കാൽമുട്ടുകൾക്ക് വേദനയും മുറുക്കവും അനുഭവപ്പെടുന്നതാണ് ആദ്യ ലക്ഷണം.കൂടാതെ മുട്ടു മടക്കാനുള്ള പ്രയാസവും കാൽമുട്ടിൽ നീരും എല്ലാം മുട്ടുവേദനയുടെ ലക്ഷണങ്ങളിൽ പ്രധാനപ്പെട്ടതാണ്.
പുരുഷൻമാരെ അപേക്ഷിച്ച് സ്ത്രീകളിലാണ് മുട്ടുവേദന കൂടുതലായി കണ്ട് വരുന്നത്. പല സ്ത്രീകളിലും ആർത്തവ വിരാമത്തോടനുബന്ധിച്ച് മുട്ടുവേദന ഉണ്ടാവുന്നു. മുട്ടുവേദനയുടെ തീവ്രത അനുസരിച്ചു പല തരത്തിലുള്ള ചികിത്സ രീതികൾ നിലവിലുണ്ട്.
മാറാൻ വീട്ടിൽ തന്നെ പരീക്ഷിക്കാവുന്ന ചില ഒറ്റമൂലികൾ ഉണ്ട്. അവ ഏതൊക്കെയാണെന്ന് നോക്കാം.
ഇഞ്ചി
ഇഞ്ചി മുട്ടുവേദനയെ പ്രതിരോധിക്കുന്ന കാര്യത്തിൽ മുന്നിലാണ്. ഇതിൽ ജിൻജേറോൾ എന്ന ആന്റി ഇൻഫ്ളമേറ്ററി പദാർത്ഥം ഉണ്ട്. അത് വീക്കം ഉണ്ടാകുന്നത് കുറയ്ക്കാൻ സഹായിക്കുന്നു. അതുപോലെ ഇഞ്ചി ചായ ഉണ്ടാക്കി കുടിക്കാവുന്നതാണ്. ഇഞ്ചി കുറച്ചു ചൂട് വെള്ളത്തിൽ കുറച്ചു തേൻ, ചെറു നാരങ്ങ എന്നിവ ചേർത്ത് കുടിക്കാവുന്നതാണ്. ഇത് മുട്ടുവേദനക്ക് ആശ്വാസം നൽകാൻ സഹായിക്കുന്നു. കൂടാതെ ആരോഗ്യത്തിന് ഇഞ്ചി വളരെയധികം ഗുണം നൽകുന്ന ഒന്നാണ്. അതുകൊണ്ട് തന്നെ ഇഞ്ചി സ്ഥിരമാക്കിയാൽ മുട്ടുവേദനക്ക് പരിഹാരം കാണാൻ സാധിയ്ക്കും.
മഞ്ഞൾ
മഞ്ഞളിൽ കാണപ്പെടുന്ന ആൻറി-ഇൻഫ്ലമേറ്ററി രാസവസ്തുവായ കുർക്കുമിന് ആന്റി ഓക്‌സിഡന്റ് ഗുണങ്ങളുമുണ്ട്. ഇത് മുട്ട് വേദന ഉണ്ടാക്കുന്ന കാരണങ്ങളെ ചെറുക്കുന്നു. അര ടീസ്പൂൺ വീതം ഇഞ്ചി, മഞ്ഞൾ എന്നിവ ഒരു കപ്പ് വെള്ളത്തിൽ ഇട്ട് പത്ത് മിനിറ്റ് നേരം തിളപ്പിക്കുക.അതിനു ശേഷം അരിച്ചെടുത്ത്, അതിലേക്ക് അല്പം തേൻ ചേർക്കുക. ദിവസത്തിൽ രണ്ടു നേരം സേവിക്കുക.
ഐസ് പാഡുകൾ
ഐസ് അല്ലെങ്കിൽ ഐസ് പായ്ക്കുകൾ പ്രശ്ന ബാധിത സ്ഥലത്ത് ഒരു ദിവസം രണ്ടോ അല്ലെങ്കിൽ മൂന്നോ തവണ വച്ച് തടവുന്നത് നീർവീക്കവും വേദനയും കുറയ്ക്കുവാൻ സഹായിക്കുന്നു. ഇളം ചൂടുള്ള പാഡും പ്രയോഗിക്കാം.
തുളസി
തുളസിയിൽ ആന്റി-റുമാറ്റിക്, ആന്റിസ്പാസ്മോഡിക് ഗുണങ്ങളുണ്ട്.തുളസി ഇലകൾ ഒരു കപ്പ് വെള്ളത്തിൽ ഇട്ട് കുറച്ച് നേരം തിളപ്പിക്കുക. 10 മിനിറ്റ് കഴ്ഞ്ഞതിനു ശേഷം അരിച്ചെടുത്ത് കുടിക്കുക. ദിവസവും മൂന്നോ നാലോ കപ്പ് വീതം ഈ തുളസിചായ ഉണ്ടാക്കി കുടിക്കുക.
സന്ധിവാതം, പരിക്കുകൾ തുടങ്ങിയവ മൂലം കാല്മുട്ടിനുണ്ടാകുന്ന വേദന ലഘൂകരിക്കാനുള്ള ലളിതമായ മാർഗ്ഗങ്ങൾ മാത്രമാണ് ഈ വീട്ടുവൈദ്യങ്ങൾ. എന്നാൽ നടക്കാൻ വയ്യാത്ത വിധം വളരെ കഠിനമായ അനുഭവപ്പെടുകയാണെങ്കിൽ വിദഗ്ദ്ധ ഡോക്ടറെ കണ്ട് ചികിത്സ തേടുക.
