രാത്രിമുഴുവന്‍ ഫോണ്‍ ചാര്‍ജ് ചെയ്യുന്നത് അപകടകരം; ഫോണ്‍ പൊട്ടിത്തെറിയുടെ അഞ്ച് കാരണങ്ങള്‍

ഫോൺ ബാറ്ററി പൊട്ടിത്തെറിക്കുന്ന വാർത്തകൾ നിരന്തരം കേട്ടുകൊണ്ടിരിക്കുകയാണ്. അടുത്തിടെ വൺപ്ലസ് നോർഡ് 2 സ്മാർട്ഫോൺ ഒരു യുവാവിന്റെ പോക്കറ്റിനുള്ളിൽ വെച്ച് പൊട്ടിത്തെറിക്കുകയും അയാൾക്ക് സാരമായ പൊള്ളലേൽക്കുകയും ചെയ്തിരുന്നു.

ഫോണുകളെല്ലാം നിരവധി സുരക്ഷാ പരിശോധനകൾ കഴിഞ്ഞുവരുന്നവയാണെന്നാണ് വൺപ്ലസ് പറയുന്നത്. എങ്കിലും വേറിട്ട ചില സംഭവങ്ങൾ ഉണ്ടാവാം.

ഫോണുകൾ പൊട്ടിത്തെറിക്കുന്നതിന് പല കാരണങ്ങളുണ്ടായിരിക്കാം. ഫോണിന്റെ ഗുണമേന്മ കമ്പനി ശരിയായിപരിശോധിക്കാത്തതും അതിൽ ഒരു കാരണമാവാം. ചിലപ്പോൾ ഉപഭോക്താക്കൾ തന്നെയാവാം കാരണം. ഫോണുകൾക്ക് ഹാനികരമായ അഞ്ച് സാഹചര്യങ്ങളാണ് ഇവിടെ പരിചയപ്പെടുത്തുന്നത്.

ബാറ്ററി പൊട്ടിത്തെറിക്കുന്നതിന് സാധാരണയായി കാണുന്ന കാരണം ബാറ്ററിയ്‍ക്കുണ്ടാവുന്ന കേടുപാടാണ്. ഫോൺ പല തവണ താഴെ വീണാൽ ബാറ്ററിയ്‍ക്ക് കേടുപാട് സംഭവിക്കാം. അത് ഷോർട്ട് സർക്യൂട്ടിനിടയാക്കും. ഫോൺ ചൂടാവും. സാധാരണ ബാറ്ററിയ്‍ക്ക് എന്തെങ്കിലും കേടുപാട് വന്നാൽ അത് വീർത്തുവരാറുണ്ട്. ഇത് എളുപ്പം തിരിച്ചറിയാൻ സാധിക്കും. അങ്ങനെ എന്തെങ്കിലും കണ്ടാൽ ഫോൺ ഉടൻ ഒരു സർവീസ് സ്റ്റേഷനിലെത്തിച്ച് ബാറ്ററി മാറ്റുക.

ബാറ്ററികൾക്ക് കേടുപാട് സംഭവിക്കുന്നതിനും പൊട്ടിത്തെറിക്കുന്നതിനും ഇടയാക്കുന്ന മറ്റൊ രു കാരണമാണ് മറ്റ് ചാർജറുകൾ ഉപയോഗിക്കുന്നത്. ഫോണിന്റെ തന്നെ ചാർജറുകൾ തന്നെ ഉപയോഗിക്കാനാണ് കമ്പനികൾ എപ്പോഴും നിർദേശിക്കാറുള്ളത്. എന്നാൽ അത് പലപ്പോഴും അവഗണിക്കപ്പെടുന്നു.

ഫോണിനൊപ്പമുള്ള ചാർജർ ആ ഫോണിന് അനുയോജ്യമായി നിർമിച്ചതായിരിക്കാം. മറ്റൊരു കമ്പനിയുടെ ചാർജറിന് അതുണ്ടാവണം എന്നില്ല.

വിലകുറഞ്ഞതും അംഗീകാരമില്ലാത്തതുമായ ചാർജറുകൾ ഫോൺ ചൂടാവുന്നതിനും കേടുവരുന്നതിനുമിടയാക്കും. അതിനാൽ എല്ലായിപ്പോഴും കമ്പനി ചാർജർ തന്നെ ഉപയോഗിക്കുക.

ഉറങ്ങാൻ നേരം ഫോൺ ചാർജിലിട്ട് പോവുന്ന ശീലമുണ്ട് നമ്മളിൽ പലർക്കും. ഇത് യഥാർത്ഥത്തിൽ ഫോണിന്റെ ആരോഗ്യത്തിന് യോജിച്ചതല്ല. ആവശ്യത്തിൽ കൂടുതൽ നേരംഫോൺ ചാർജ് ചെയ്‌യുന്നത് ഫോൺ ചൂടാവുന്നതിനും ഷോർട്ട് സർക്യൂട്ടിനും ഇടയാക്കാം. ചിലപ്പോൾ പൊട്ടിത്തെറിക്കാം. എന്നാൽ ഇപ്പോൾ മിക്ക ഫോൺ ചിപ്പുകളും നൂറ് ശതമാനം ചാർജ് ആയാൽ ചാർജിങ് ഓട്ടോ മാറ്റിക് ആയി നിർത്തുന്ന സംവിധാനമുള്ളവയാണ്. എന്നാൽ അതില്ലാത്തവയും ഉണ്ട്.

വെയിലിന്റെ ചൂട് ഫോണിൽ നേരിട്ടേൽക്കുന്നതും വെള്ളം നനയുന്നതുമെല്ലാം ബാറ്ററി പൊട്ടിത്തെറിക്കുന്നതിലേക്ക് നയിച്ചേക്കാം. വെയിലിന്റെ ചൂടേറ്റാൽ ബാറ്ററിയ്‍ക്ക് ആഘാതമേൽക്കുകയും ബാറ്ററിയ്‍ക്കുള്ളിൽ ഓക്സിജൻ, കാർബൺ ഡയോക്സൈഡ് പോലുള്ള വാതകങ്ങൾ നിറയുകയും ചെയ്‌യും. അങ്ങനെ ബാറ്ററി വീർത്ത് വരും. പതിയെ പൊട്ടിത്തെറിയിലേക്ക് നയിക്കും.

ഫോൺ വെള്ളം നനഞ്ഞാലും സമാന പ്രശ്നമുണ്ട്. ഫോണുകളൊന്നും തന്നെ വെള്ളത്തിനടിയിൽ ഉപയോഗിക്കാൻ വേണ്ടി തയ്‌യാറാക്കുന്നവയല്ല. ചെറിയ തോതിൽ വെള്ളം തെറിക്കുന്നത് ചെറുക്കാനുള്ള സംവിധാനങ്ങളാണ് ഇപ്പോൾ പുറത്തിറങ്ങുന്ന പല ഫോണുകൾക്കുമുള്ളത് എന്നാൽ അതിന് പരിമിതികളുണ്ട്.

ഗെയിമിങിന്റേയും ഒരേ സമയം ഒന്നിലധികം ജോലികൾ ചെയ്‌യുന്നതിന്റേയും ഭാഗമായി പ്രൊസസറിൽ ഓവർലോഡ് ഉണ്ടാവുകയും അത് ഫോൺ ചൂടാകുന്ന പ്രശ്നങ്ങൾക്കിടയാക്കും. ഇത് ബാറ്ററിയ്‍ക്കും പ്രശ്നങ്ങളുണ്ടാക്കിയേക്കാം. ഈ പ്രശ്നം ഒഴിവാക്കാൻ ചില കമ്പനികൾ ഫോണുകളിൽ തെർമൽ ലോക്ക് ഫീച്ചർ ഉൾപ്പെടുത്താറുണ്ട്.

Content Highlights: smartphone battery blast 5 things to never do on your phone