എന്നാൽ പുതുതായി കേട്ടുവരുന്ന ഒരു പ്രതിവിധിയുണ്ട്, മറ്റൊന്നുമല്ല. കോഫിയും നാരങ്ങാ നീരും ചേർന്ന മിശ്രിതം. ഇതാണ് പുതുതായി വലിയ പ്രചാരം നേടുന്ന വ്യത്യസ്തമായ വെയിറ്റ് ലോസ് ഡ്രിങ്ക്. ഇത്തരമൊരു കോമ്പിനേഷനെക്കുറിച്ച് നിങ്ങൾ മുൻപ് കേട്ടിട്ടുണ്ടാകാൻ സാധ്യതയില്ല. നിങ്ങളുടെ അടുക്കളയിൽ എല്ലായ്പ്പോഴും സുലഭമായ ഒന്ന് തന്നെയായതിനാൽ ഈ രീതിയിലൂടെ അമിതവണ്ണം ഇല്ലാതാക്കാം എന്നാണ് പലരും സ്വപ്നം കാണുന്നത്. ഇങ്ങനൊന്ന് മുൻപ് പരീക്ഷിച്ചിരിയ്ക്കാൻ വഴിയില്ല. വലിയ അധ്വാനം കൂടാതെ തന്നെ നിങ്ങളുടെ ശരീരത്തിലെ കൊഴുപ്പ് നീക്കി അമിതവണ്ണം കുറയ്ക്കാൻ ഇത് സഹായിക്കുമെന്നാണ് വിശ്വാസം.
എന്നാൽ യഥാർത്ഥത്തിൽ ഈ കോമ്പിനേഷൻ അമിത വണ്ണം ഉരുക്കി കളയുമോ?
കോഫിയും ലെമണും എങ്ങനെ?
കാപ്പിപൊടിയും നാരങ്ങയും ഇല്ലാത്ത അടുക്കള കാണില്ല. രണ്ടും വ്യത്യസ്തമായ ഗുണങ്ങളാൽ ആരോഗ്യത്തിന് മുതൽക്കൂട്ടാവുന്ന രണ്ട് വിഭവങ്ങളാണ്. അമിതവണ്ണം കുറയ്ക്കുന്ന കാര്യത്തിലും കാപ്പി പൊടിയും നാരങ്ങാ നീരും ഏറെ ഗുണകരമാണ്. കാപ്പി പൊടിയിൽ അടങ്ങിയ കഫീൻ ശരീരത്തിലെ മെറ്റബോളിസം വർദ്ധിപ്പിയ്ക്കും. കൂടാതെ നാഡീവ്യവസ്ഥയെ ഉത്തേജിപ്പിയ്ക്കുകയും മാനസികാവസ്ഥ മെച്ചപ്പെടുത്തുകയും ചെയ്യും.
അതേസമയം, നാരങ്ങ നിശ്ചിത അളവിൽ ശരീരത്തിൽ എത്തുന്നത് എല്ലായ്പ്പോഴും വയർ നിറഞ്ഞതുപോലെ അനുഭവപ്പെടാൻ കാരണമാകും. ഊർജ്ജനില വർധിപ്പിയ്ക്കുകയും അമിത അളവിൽ കലോറി അടങ്ങിയ ഭക്ഷണം കഴിയ്ക്കുന്നത് നിരുത്സാഹപ്പെടുത്താനും നാരങ്ങാ നീര് കഴിയ്ക്കുന്നത് വഴി സാധിയ്ക്കും. മാത്രമല്ല, നാരങ്ങാനീരിൽ ധാരാളം വൈറ്റമിൻ സി യും ആൻറി ഓക്സിഡന്ടുകളും അടങ്ങിയിട്ടുള്ളതിനാൽ ഫ്രീ റാഡിക്കലുകൾ കാരണമുള്ള പ്രശ്നങ്ങൾ ഒഴിവാക്കാനും സഹായകമാകും.
എത്ര കിലോഗ്രാം ഭാരം കുറയ്ക്കും?
ഭാരം കുറയ്ക്കാനുള്ള മാജിക് ഡ്രിങ്ക് എന്ന് കേൾക്കുമ്പോൾ ആർക്കും ആദ്യം അറിയേണ്ടത് എത്ര കിലോഗ്രാം വണ്ണം കുറയും, എത്ര സമയത്തിനുള്ളിൽ കുറയും എന്നെല്ലാമാണ്. ഈ ഡ്രിങ്ക് കുടിച്ചാൽ ശരീരത്തിലെ അമിത് കൊഴുപ്പ് ഉരുകി ഇല്ലാതാകുമെന്ന് നിങ്ങൾ കരുതുന്നുണ്ടോ? ഇവ യോജിപ്പിച്ച് കഴിയ്ക്കുന്നത് തികച്ചും ആരോഗ്യകരമായ ശീലം തന്നെയാണ്. എന്നാൽ ശരീരത്തിലെ അമിതവണ്ണം ഇല്ലാതാക്കാൻ ഇത് മാത്രം മതി എന്നത് വലിയ തെറ്റിധാരണയാണ്. ഇത്ര ലളിതമായി അമിതവണ്ണം കുറയ്ക്കാൻ കഴിയില്ല എന്നതാണ് വാസ്തവം.
ജീവിതശൈലിയിൽ ഉൾപ്പെടുന്ന പല കാര്യങ്ങളിലും മാറ്റങ്ങൾ വരുത്തിക്കൊണ്ട് മാത്രമേ അമിതവണ്ണം കുറച്ചുകൊണ്ട് മനോഹരമായ ശരീരഘടന നിലനിർത്താൻ സാധിക്കൂ എന്നകാര്യം ആദ്യമേ തിരിച്ചറിയണം. ക്രമമായ ഭക്ഷണം, വ്യായാമം, ഉറക്കം എന്നിവയെല്ലാം ശരിയായ രീതിയിൽ ക്രമീകരിച്ചുകൊണ്ടുള്ള ജീവിതരീതിയിലൂടെ മാത്രമേ വിപരീത ഫലമില്ലാതെ വണ്ണം കുറയ്ക്കാൻ സാധിയ്ക്കൂ. എന്നാൽ കോഫിയിൽ നാരങ്ങാനീര് കലർത്തി കഴിയ്ക്കുന്നത് നിങ്ങളുടെ മെറ്റബോളിസവും ആരോഗ്യവും വർദ്ധിപ്പിയ്ക്കും എന്നതിൽ സംശയമില്ല.
തലവേദന കുറയ്ക്കുമോ, ദഹനം വർധിപ്പിയ്ക്കുമോ?
കോഫിയിൽ നാരങ്ങാ നീര് ചേർത്ത് കഴിയ്ക്കുന്നത് തലവേദന ശമിപ്പിയ്ക്കാൻ സഹായിക്കുമെന്നും ദഹനത്തെ സഹായിക്കുമെന്നും പൊതുവേ വിശ്വസിയ്ക്കുന്നു. എന്നാൽ ഇത് തെളിയിക്കുന്ന ശാസ്ത്രീയ പഠനങ്ങളൊന്നും ഇതുവരെ ഉണ്ടായിട്ടില്ല. കോഫി കുടിയ്ക്കുന്നത് തലവേദന കുറയ്ക്കുമെന്ന് ചിലർ അഭിപ്രായപ്പെടുമ്പോൾ മറ്റു ചിലർ കോഫി തലവേദന ഉണ്ടാകാൻ കാരണമാകും എന്നാണ് പറയുന്നത്. അതുപോലെ തന്നെ ദഹനം മെച്ചപ്പെടുത്തും എന്ന വാദത്തിനും ശാസ്ത്രീയ തെളിവുകൾ ഒന്നും തന്നെയില്ല. ദഹന സംബന്ധമായ പ്രയാസങ്ങൾ അനുഭവിയ്ക്കുന്ന സമയത്ത് നാരങ്ങാ നീര് ചേർത്ത കോഫി കുടിയ്ക്കുന്നത് ഗുണത്തേക്കാൾ ദോഷം ചെയ്യും എന്നാണ് കരുതുന്നത്.
തയ്യാറാക്കേണ്ട വിധം:
അമിതവണ്ണം കുറയാൻ ലെമൺ കോഫി വലിയ തോതിൽ സഹായിക്കില്ലെങ്കിലും ശരീരത്തിന് മറ്റ് പല കാര്യങ്ങൾക്കും ഉപകരപ്പെടും. മാത്രമല്ല, ഈ കോമ്പിനേഷൻ നിങ്ങളുടെ അമിത വണ്ണം ഇല്ലാതാക്കും എന്ന വിശ്വാസമുണ്ടെങ്കിലും ഈ ഡ്രിങ്ക് തയ്യാറാക്കി കഴിക്കാം. ഏറ്റവും ആരോഗ്യകരമായി ഇത് തയ്യാറാക്കാൻ ഇങ്ങനെ ചെയ്തോളൂ.
കട്ടൻ കാപ്പി തയ്യാറാക്കിയ ശേഷം ഇതിലേയ്ക്ക് ഒരു ടീസ്പൂൺ നാരങ്ങാ നീര് കലർത്തി ഉപയോഗിക്കാം. ഒരിയ്ക്കലും ഇതിൽ പാൽ ഉപയോഗിക്കരുത്. നാരങ്ങ ചേർക്കുന്നതിനാൽ ഇതിൻറെ സിട്രിക് സ്വഭാവം ക്രമമാക്കാനായി അല്പം ഉപ്പ് ചേർക്കുന്നത് ഗുണം വർദ്ധിപ്പിയ്ക്കും. എന്നാൽ കുറഞ്ഞ അളവിൽ പോലും പഞ്ചസാര ചേർക്കാനായി ശ്രമിയ്ക്കരുത്. ഇത് വിപരീത ഫലം ചെയ്യും. കൂടാതെ ദിവസത്തിൽ ഒരു കപ്പിൽ കൂടുതൽ ലെമൺ കോഫി കുടിയ്ക്കാനും ശ്രമിയ്ക്കരുത്. ഇതോടൊപ്പം ജീവിതശൈലി കൂടി നിയന്ത്രിയ്ക്കുന്നത് ശരീരത്തിന് നേട്ടം നൽകും.
ശ്രദ്ധിക്കുക: ഈ ഉള്ളടക്കം പൊതുവായ വിവരങ്ങൾ മാത്രമാണ് നൽകുന്നത്. ഇത് ഒരു തരത്തിലും വിദഗ്ദ്ധ മെഡിക്കൽ അഭിപ്രായത്തിന് പകരമാകില്ല. കൂടുതൽ വിവരങ്ങൾക്ക് എല്ലായ്പ്പോഴും ഒരു സ്പെഷ്യലിസ്റ്റിനെ അല്ലെങ്കിൽ നിങ്ങളുടെ സ്വന്തം ഡോക്ടറെ സമീപിക്കുക.
