പി.സി.ഒ.എസ് ബാധിച്ചവരിൽ 35 ശതമാനം സ്ത്രീകളും കടുത്ത മുഖക്കുരു പ്രശ്നങ്ങൾ അനുഭവിക്കുന്നവരാണ്. മുഖത്ത് മാത്രമല്ല, കൈകൾ, കഴുത്ത്, പിൻകഴുത്ത് എന്നിവിടങ്ങളിലെല്ലാം ഇത്തരത്തിൽ കുരുക്കൾ രൂപപ്പെടാറുണ്ട്. പി.സി.ഒ.എസ് ബാധിച്ചത് മൂലം ഉണ്ടാകുന്ന മുഖക്കുരു മുഖ ചർമത്തെ സാരമായി ബാധിക്കുന്നതും എന്നാൽ നീക്കം ചെയ്ത് പരിഹാരം കണ്ടെത്താൻ പ്രയാസമുള്ളതുമാണ്. തുടർച്ചയായ ശ്രദ്ധയും പരിചരണവും കൊണ്ട് മാത്രമേ ഈ പ്രശ്നം പരിഹരിക്കാൻ കഴിയൂ.
പിന്നിൽ രണ്ട് കാരണങ്ങൾ:
മുഖക്കുരു രൂപപ്പെടുന്നതിന് പിന്നിൽ പ്രധാനപ്പെട്ട രണ്ടു കാരണങ്ങൾ ഉണ്ട്. ഒന്ന് പുരുഷ ഹോർമോൺ ആയ ആൻഡ്രോജൻ ഉദ്പാദനം വർധിക്കുന്നത്. ഇത് ചർമ സുഷിരങ്ങളിൽ അമിതമായ സെബം ഉത്പാദിപ്പിക്കപ്പെടാൻ കാരണമാകും. രണ്ടാമത്തേത് പി.സി.ഒ.എസ് ശരീരത്തെ ബാധിക്കുന്നത്. ഗർഭാശയവുമായി ബന്ധപ്പെട്ട ഈ പ്രശ്നം ഗുരുതരമായ രീതിയിൽ മുഖക്കുരു ബാധിക്കാൻ കാരണമാകും.
പരിഹരിയ്ക്കാൻ പെട്ടെന്നുള്ള വഴികൾ ഒന്നും തന്നെയില്ല, പ്രത്യേകിച്ച് പി.സി.ഒ.എസ് കാരണമുണ്ടാകുന്ന അക്നെ. ഇവ പിരീഡ് ദിനങ്ങൾ അനുബന്ധിച്ച് കൂടുതൽ കടുത്ത രീതിയിലേയ്ക്ക് രൂപപ്പെടുന്ന അവസ്ഥയുണ്ടാകും. മുഖത്തിൻറെ താഴ് ഭാഗങ്ങളിൽ തുടങ്ങി താടി, കഴുത്ത്, പിൻ കഴുത്ത് എന്നിവിടങ്ങളിലേയ്ക്ക് ഇവ പടരാറുണ്ട്. അതിനാൽ ഇവ പൂർണമായും നീക്കം ചെയ്യാൻ ക്ഷമയും സമയവും ആവശ്യമാണ്.
Also read:
മുഖക്കുരു മാറ്റുന്നതിനായി ഡർമറ്റോളജിസ്റ്റുകൾ ചില മാർഗങ്ങൾ നിർദേശിക്കാറുണ്ട്.
റെറ്റിനോയിഡ്സ്:
വൈറ്റമിൻ എ യിൽ നിന്നുള്ളതാണ് റെറ്റിനോയിഡുകൾ. മുഖ ചർമത്തിലെ പാടുകൾ നീക്കം ചെയ്യാനും ചുളിവുകളില്ലാത്ത മനോഹരമായ ചർമം നൽകാനും ഇത് സഹായിക്കും. മുഖക്കുരു ഒരു പരിധി വരെ പരിഹരിയ്ക്കാനും ഇത് നല്ലതാണ്. ഗുളികകൾ, ക്രീം, ജെൽ രൂപത്തിലെല്ലാം റെറ്റിനോയിഡുകൾ ഉപയോഗിക്കാൻ കഴിയും. എന്നാൽ ഇവ ഉപയോഗിക്കുന്നതിനൊപ്പം പകൽ സമയങ്ങളിൽ കൃത്യമായ രീതിയിൽ സൺ സ്ക്രീൻ ഉപയോഗിക്കാൻ ശ്രദ്ധിക്കണം. ഇല്ലെങ്കിൽ ഇത് ഹൈപെർ പിഗ്മെന്റെഷന് കാരണമാകും.
സ്പൈറോനോലാക്ടോൺ:
മുഖക്കുരു പരിഹരിക്കാൻ കഴിയുന്ന മരുന്നാണ് സ്പൈറോനോലാക്ടോൺ. ചർമ പ്രശ്നങ്ങൾക്ക് കാരണമാകുന്ന ടെസ്റ്റോസ്റ്റിറോണിൻറെ പ്രവർത്തനം നിയന്ത്രിക്കാൻ ഇത് സഹായിക്കും.
ബെൻസോയിൽ പെറോക്സൈഡ് , സൾഫർ എന്നിവ അടങ്ങിയ OTC ക്രീം ഉപയോഗിക്കുന്നതും വളരെ നല്ലതാണ്.
ഡർമറ്റോളജിസ്റ്റുകൾ നിർദേശിക്കുന്ന മരുന്നുകൾ കഴിക്കുന്നതോടൊപ്പം തന്നെ അതിവേഗത്തിൽ ഫലം ലഭിക്കുന്നതിനായി ഭക്ഷണം, ജീവിതരീതി എന്നിവയിൽ ശ്രദ്ധ കൊടുക്കണം. അതിനായി ഏതെല്ലാം ആഹരങ്ങളാണ് അക്നെ രൂപപ്പെടാൻ കാരണമാകുന്നത് എന്ന് അറിഞ്ഞിരിക്കണം. അത്തരം ഭക്ഷണങ്ങൾ പൂർണമായും ഉപേക്ഷിക്കുന്നത് ചികിത്സയെ പിന്തുണയ്ക്കും.
ഉപേക്ഷിക്കേണ്ട ഭക്ഷണങ്ങൾ:
* എല്ലാ തരം പാലുത്പന്നങ്ങളും
* ആൽക്കഹോൾ
* കോൺ
* വൈറ്റ് റൈസ്
* ഗ്ലൂട്ടൻ
* പ്രോസെസ്സ്ഡ് ഫുഡ്
എത്ര നല്ല ചികിത്സ എടുക്കുകയാണെങ്കിലും ജീവിത ശൈലിയിൽ നിർബന്ധമായും ചില കാര്യങ്ങൾ പാലിക്കേണ്ടതുണ്ട്. എങ്കിൽ മാത്രമേ ഉദ്ദേശിച്ച ഫലം ലഭിക്കൂ.
*മാനസിക സമ്മർദ്ദം കുറയ്ക്കുക,
*ദിവസവും കുറഞ്ഞത് 6-8 മണിക്കൂർ സമയം ഉറങ്ങേണ്ടതുണ്ട്. നല്ല ഉറക്കം ആരോഗ്യത്തിനും സൗന്ദര്യത്തിനും അത്യാവശ്യമാണ്.
*മണ്ണിനടിയിൽ വളരുന്ന പച്ചക്കറി ഇനങ്ങൾ ഭക്ഷണത്തിൽ പതിവായി ഉൾപ്പെടുത്തുന്നത് നല്ലതാണ്. ക്യാരറ്റ്, ബീറ്റ് റൂട്ട്, മുള്ളങ്കി പോലുള്ളവ ധാരാളം കഴിക്കാം. കൂടാതെ തക്കാളി, ചീര, ബദാം, വാൾനട്ട്, ബെറി പഴങ്ങൾ, മഞ്ഞൾ, വെളുത്തുള്ളി എന്നിവയും കൂടുതലായി ഉപയോഗിക്കാം. മില്ലെറ്റ്, ബ്രൌൺ റൈസ്, ക്വിനോവ, തുടങ്ങിയ മുഴു ധാന്യങ്ങളും കഴിക്കുന്നത് അക്നെ കുറയ്ക്കാൻ സഹായിക്കും. ആന്റി ഒക്സിടന്റ്സ് ധാരാളമടങ്ങിയ ഗ്രീൻ ടീ, കടൽ മത്സ്യങ്ങൾ, കോഴിമുട്ട തുടങ്ങിയവയും ഇതിന് സഹായിക്കും.
*അക്നെ, മുഖക്കുരു എന്നിവ ബാധിച്ച ഭാഗം അമിതമായി സ്പർശിക്കാൻ ശ്രമിക്കരുത്, അങ്ങനെ ചെയ്യുന്നത് വിപരീത ഫലമുണ്ടാകും.
*പ്രഭാത ഭക്ഷണത്തിൽ കലോറി കൂടുതൽ അടങ്ങിയ ഭക്ഷണങ്ങളും അത്താഴ സമയത്ത് വളരെ കുറഞ്ഞ കലോറി അടങ്ങിയ ഭക്ഷണവും കഴിക്കാം.
*അക്നെ ബാധിച്ച ചർമത്തിന് പ്രത്യേകമായി ലഭിക്കുന്ന ഉത്പന്നങ്ങൾ മാത്രം മുഖത്ത് ഉപയോഗിക്കാൻ ശ്രദ്ധിക്കണം.
*ചർമം സ്ക്രബ് ചെയ്യരുത്
*മുഖം കഴുകാനായി ചൂട് വെള്ളം ഉപയോഗിക്കുന്നത് നല്ലതാണ്
*അമിതമായി സൂര്യപ്രകാശം എല്ക്കാതിരിയ്ക്കാൻ ശ്രദ്ധിക്കണം
*ചർമ്മവും ശരീരവും എല്ലായ്പ്പോഴും ജലാംശമുള്ളതായി നിലനിർത്തുക
*പതിവായി വ്യായാമം, യോഗ എന്നിവ ചെയ്യുന്നതും ഗുണം ചെയ്യും.
ചികിത്സയ്ക്കൊപ്പം ഭക്ഷണ കാര്യങ്ങളിലും ജീവിതശൈലിയിലും ഇക്കാര്യങ്ങൾ ശ്രദ്ധിച്ചാൽ കൂടുതൽ ഫലം ലഭിക്കും.
