പുതിയ ആപ്പിൾ ഉത്പന്നങ്ങളുടെ അവതരണം ആരംഭിച്ചു. ആപ്പിൾ മേധാവി ടിം കുക്കാണ് പുത്തൻ ഉത്‌പന്നങ്ങളെ പരിചയപ്പെടുത്തുന്നത്. പതിവ് പോലെ ഒരു കൂട്ടം പുതിയ ഉത്‌പന്നങ്ങളാണ് ഇത്തവണയും പ്രതീക്ഷിക്കപ്പെടുന്നത്. ഐഫോണിന്റെ അടുത്ത പതിപ്പായ ഐഫോൺ 13 പരമ്പരയാണ് ഇതിൽ പ്രധാനപ്പെട്ടത്. ഒപ്പം ആപ്പിൾ വാച്ച് സീരീസ് 7, പരിഷ്കരിച്ച എയർപോഡുകൾ എന്നിവയും ഇന്ന് പ്രതീക്ഷിക്കാം.
ആപ്പിളിന്റെ അവതരണ പരിപാടി തത്സമയം കാണാം
വലിയ രീതിയിലുള്ള മാറ്റങ്ങളൊന്നും ഇത്തവണ ഐഫോണിലുണ്ടാവില്ല എന്നാണ് കരുതുന്നത്. ഐഫോൺ 12 പരമ്പരയുടെ തുടർച്ചയെന്നോണം ചില ചെറിയ പരിഷ്കാരങ്ങളുമായാവും ഫോൺ എത്തുക. ഡിസൈനിലുള്ള ചെറിയ മാറ്റങ്ങൾ, പുതിയ ബയോണിക് പ്രൊസസർ ചിപ്പ്, മെച്ചപ്പെടുത്തിയ നൈറ്റ് മോഡ് എന്നിവ അതിലുണ്ടാവാം.
ഐഫോണിൽ പ്രതീക്ഷിക്കുന്ന മാറ്റങ്ങൾ
ഐഫോൺ 12-മായുള്ള സാമ്യങ്ങൾ നിലനിർത്തിക്കൊണ്ടുതന്നെയായിരിക്കും ഐഫോൺ 13-ഉം അവതരിപ്പിക്കുക. ഡിസ്പ്ലേ നോച്ചിലാണ് പ്രത്യക്ഷമായ മാറ്റം പ്രതീക്ഷിക്കുന്നത്. ഇത് ഐഫോൺ 12 നേക്കാൾ വലിപ്പം കുറച്ചേക്കും. 5.4 ഇഞ്ച് സ്ക്രീൻ വലിപ്പമുള്ള ഐഫോൺ 13 മിനി, 6.1 ഇഞ്ച് വലിപ്പമുള്ള ഐഫോൺ 13 റെഗുലർ, 6.1 ഇഞ്ച് തന്നെ വലിപ്പമുള്ള ഐഫോൺ 13 പ്രോ, 6.7 ഇഞ്ച് വലിപ്പമുള്ള ഐഫോൺ 13 പ്രോ മാക്സ്. എന്നിങ്ങനെ നാല് മോഡലുകൾ ഐഫോൺ 13-ന് ഉണ്ടാവും. പുതിയ നിറങ്ങളിലുള്ള ഫോണുകൾ പ്രതീക്ഷിക്കാം. ഒപ്പം മെച്ചപ്പെട്ട ക്യാമറ ഫീച്ചറുകളും അവതരിപ്പിച്ചേക്കും.
ആപ്പിൾ വാച്ച് സീരീസ് 7
ദൃശ്യപരമായി നിരവധി മാറ്റങ്ങളാണ് ആപ്പിൾ വാച്ച് സീരീസ് 7 ൽ പ്രതീക്ഷിക്കുന്നത്. നേരത്തെ ഉണ്ടായിരുന്ന റൗണ്ട് ഡെ്ജ് ഡിസൈന് പകരം പുതിയ ഫ്ളാറ്റ് എഡ്ജ് സ്ക്രീൻ ആണ് ഇതിൽ പ്രധാനം. ഐഫോൺ 12 ന് സമാനമായ ക്രമീകരണമായിരിക്കും ഇത്. സ്ക്രീൻ വലിപ്പം 40 എംഎം, 44 എംഎം എന്നിവയിൽ നിന്നും 41 എംഎം ആയും 45 എംഎം ആയും വർധിപ്പിക്കും. പുതിയ ഹെൽത്ത് ഫീച്ചറുകളും വാച്ചിൽ പ്രതീക്ഷിക്കുന്നുണ്ട്.
പുതിയ എയർപോഡുകൾ
ഡിസൈനിലായിരിക്കും വലിയ മാറ്റങ്ങളുണ്ടാവാൻ സാധ്യത. ഹെഡ്സെറ്റ് സ്റ്റെമ്മിന്റെ നീളം കുറച്ചേക്കാം. വയർലെസ് ചാർജിങ് സൗകര്യവും ഉൾപ്പെടുത്തിയേക്കും.
content highlights: iPhone 13 launch today
