തെരഞ്ഞെടുപ്പ് പ്രവർത്തനത്തിലെ വീഴ്ച; എറണാകുളം സിപിഎമ്മിൽ കൂട്ട നടപടി

എറണാകുളം: നിയമസഭാ തെരഞ്ഞെടുപ്പിലെ പ്രവർത്തന വീഴ്ചയുമായി ബന്ധപ്പെട്ട് എറണാകുളം സിപിഎമ്മിൽ കൂട്ട നടപടി. തൃപ്പൂണിത്തുറ, തൃക്കാക്കര, പിറവം, പെരുമ്പാവൂർ മണ്ഡലങ്ങളിലെ തോൽവി സംബന്ധിച്ച പരിശോധനയ്ക്ക് ശേഷമാണ് നടപടി.

തൃക്കാക്കര മണ്ഡലത്തിലെ തോൽവിയുമായി ബന്ധപ്പെട്ട് സി കെ മണിശങ്കറെ ജില്ലാ സെക്രട്ടറിയേറ്റിൽ നിന്നും ജില്ലാ കമ്മിറ്റിയിലേക്ക് തരംതാഴ്ത്തി. ജില്ലാ കമ്മിറ്റി അംഗം സി എം സുന്ദരനെ ജില്ലാ കമ്മിറ്റിയിൽ നിന്നും ഒഴിവാക്കി. വൈറ്റില ഏരിയാ സെക്രട്ടറി കെ ഡി വിൻസെന്റിനെ എല്ലാ ചുമതലകളിൽ നിന്നും നീക്കി.

Also Read:

പിറവം മണ്ഡലത്തിലെ പരാജയത്തെത്തുടർന്ന് കൂത്താട്ടുകുളം ഏരിയാ കമ്മിറ്റി സെക്രട്ടറിയും ജില്ലാ കമ്മിറ്റി അംഗവുമായ ഷാജു ജേക്കബിനെ രണ്ട് ചുമതലകളിൽ നിന്നും നീക്കി. കൂത്താട്ടുകുളം പാർട്ടി ഓഫീസ് സെക്രട്ടറി അരുണിനേയും മാറ്റി. ജില്ലാ സെക്രട്ടറിയേറ്റ് അംഗം എം സി മോഹനനനെതിരെയുള്ള നടപടി പരസ്യ ശാസനയിൽ ഒതുക്കി. പെരുമ്പാവൂരിലെ ഘടകകക്ഷി സ്ഥാനാർത്ഥിയുടെ തോൽവിയുമായി ബന്ധപ്പെട്ടാണ് നടപടി.

Also Read:

നിയമസഭാ തെരഞ്ഞെടുപ്പിൽ സംഭവിച്ച പരാജയം സംബന്ധിച്ച് അന്വേഷണം നടത്താൻ പാർട്ടി രണ്ട് അംഗ കമ്മീഷനെ വെച്ചിരുന്നു. പരിശോധനയുടെ അടിസ്ഥാനത്തിൽ 12 നേതാക്കൾക്ക് കാരണം കാണിക്കൽ നോട്ടീസ് നൽകിയിരുന്നു. നേതാക്കൾ വിശദീകരണം നൽകിയതിനു പിന്നാലെയാണ് നടപടി. ചൊവ്വാഴ്ച ചേർന്ന യോഗത്തിലാണ് നടപടി ഉണ്ടായിരിക്കുന്നത്.