ഇന്ത്യയിൽ അവതരിപ്പിക്കും മുമ്പ് സാംസങിന്റെ ഫോൾഡബിൾ സ്മാർട്ഫോണായ ഗാലക്സി ഫോൾഡ് 3 സ്വന്തമാക്കി മോഹൻലാൽ. ഈ മാസം പത്തിനാണ് ഗാലക്സി ഫോൾഡ് 3 ഇന്ത്യയിൽ ഔദ്യോഗികമായി അവതരിപ്പിക്കുന്നത്. മോഹൻലാൽ ഈ ഫോൺ ഉപയോഗിക്കുന്നതിന്റെ ഒരു വീഡിയോയാണ് ഇപ്പോൾ പുറത്തുവന്നിരിക്കുന്നത്.
ഇക്കഴിഞ്ഞ ഓഗസ്റ്റ് 11 നാണ് സാംസങ് ഗാലക്സി സെഡ് ഫോൾഡ് 3 സ്മാർട്ഫോൺ ആഗോള വിപണിയിൽ അവതരിപ്പിച്ചത്. ഓഗസ്റ്റ് 27 മുതൽ യുഎസ്, യൂറോപ്പ്, ദക്ഷിണ കൊറിയ ഉൾപ്പടെയുള്ള തിരഞ്ഞെടുത്ത വിപണികളിൽ ഫോൺ വിൽപന ആരംഭിച്ചിട്ടുണ്ട്.
7.6 ഇഞ്ച് ടച്ച് സ്ക്രീൻ പ്രൈമറി ഡിസ്പ്ലേയിൽ 20208 x 1768 പിക്സൽ റസല്യൂഷനുണ്ട്. 6.20 ഇഞ്ച് സെക്കൻഡറി ഡിസ്പ്ലേയും ഫോണിനുണ്ട്. ആൻഡ്രോയിഡ് 11 ൽ പ്രവർത്തിക്കുന്ന ഫോണിൽ 4400 എംഎഎച്ച് ബാറ്ററിയാണുള്ളത്. ക്വാൽകോം സ്നാപ്ഡ്രാഗൺ 888 ഒക്‍ടാകോർ പ്രൊസസറിനൊപ്പം 12 ജിബി റാം ശേഷിയുമുണ്ട്.
വ്യത്യസ്ത അപ്പാർച്ചറിൽ 12 മെഗാപിക്സൽ സെൻസറുകൾ ഉൾപ്പെടുന്ന ട്രിപ്പിൾ ക്യാമറ മോഡ്യൂൾ ആണിതിന്. 10 മെഗാപിക്സൽ, 4 മെഗാപിക്സൽ സെൻസറുകൾ അടങ്ങുന്ന ഡ്യുവൽ ക്യാമറയാണ് സെൽറിയ്‍ക്ക്.
256 ജിബി/512 ജിബി ഇൻബിൽറ്റ് സ്റ്റോറേജും ഡ്യുവൽ സിം കാർഡ് സൗകര്യവുമുണ്ട്. ഫാന്റം ബ്ലാക്ക്, ഫാന്റം ഗ്രീൻ, ഫാന്റം സിൽവർ നിറങ്ങളിലാണ് ഇത് ലഭ്യമാവുക.
കഴിഞ്ഞ വർഷം സെപ്റ്റംബറിൽ അവതരിപ്പിച്ച സാംസങ് ഗാലക്സി സെഡ് ഫോൾഡ് 2 സ്മാർട്ഫോണും മോഹൻലാൽ സ്വന്തമാക്കിയിരുന്നു. പുതിയ പതിപ്പ് ഇന്ത്യൻ വിപണിയിൽ അവതിരിപ്പിക്കുന്നതിന് മുമ്പ് തന്നെ ഫോൺ സ്വന്തമാക്കാൻ ആഗ്രഹിക്കുന്നവർക്ക് മുൻകൂർ ബുക്ക് ചെയ്‌യാനുള്ള സൗകര്യം ഒരുക്കിയിട്ടുണ്ട്.
