കണക്കില്ലാതെ വെള്ളം കുടിക്കേണ്ട, പണി കിട്ടും

ശരീരത്തിന് പ്രവർത്തിക്കാൻ ആവശ്യത്തിന് വെള്ളം വേണം, എന്നാൽ വെള്ളം അമിതമായാലോ? നമ്മൾ കുടിയ്ക്കുന്ന അധിക വെള്ളം ശരീരത്തിൽ നിന്ന് പുറം തള്ളാൻ കഴിയാത്ത അവസ്ഥയുണ്ടാകും. ഇത് ഗുരുതരമായ പല ആരോഗ്യ അവസ്ഥകൾക്ക് വഴിവെയ്ക്കുമെന്നാണ് വിദഗ്ദർ പറയുന്നത്. അങ്ങനെയെങ്കിൽ വെള്ളം കുടിയ്ക്കുന്ന കാര്യത്തിലും ശ്രദ്ധ വേണം. വെള്ളം ശരീരത്തിന് അത്യന്താപേക്ഷിതമാണ് എന്നതിനാൽ ദാഹം ഇല്ലെങ്കിൽ പോലും ധാരാളമായി വെള്ളം കുടിയ്ക്കുന്നവരാണ് മിക്കവരും. എന്നാൽ നിങ്ങളുടെ ആരോഗ്യ സ്ഥിതി വിലയിരുത്തി മത്രമേ കുടിയ്ക്കുന്ന വെള്ളത്തിന്റെ അളവ് തീരുമാനിക്കാനാകൂ. എന്നാൽ ആവശ്യത്തിന് വെള്ളം കുടിയ്ക്കുന്നത് എണ്ണമറ്റ ആരോഗ്യ ഗുണങ്ങൾ നൽകുകയും ചെയ്യും. നമ്മൾ കഴിയ്ക്കുന്ന പോഷകങ്ങൾ ശരീരത്തിന്റെ മുഴുവൻ ഭാഗങ്ങളിലേയ്ക്കും ആഗിരണം ചെയ്യപ്പെടാൻ വെള്ളം അത്യാവശ്യമാണ്. നല്ല ദഹനം, അമിതവണ്ണം ഒഴിവാക്കൽ, നിർജ്ജലീകരണം തടയൽ എന്നിവയ്ക്കും വെള്ളം അത്യവശ്യമാണ്.

കിഡ്നി പണിമുടക്കിയാൽ
ശരീരത്തിൽ കൂടുതലായി വരുന്ന വെള്ളം പുറന്തള്ളാൻ കിഡ്നി സദാ സമയവും ജാഗ്രത പുലർത്താറുണ്ട്. എന്നാൽ ഏതെങ്കിലും തരത്തിലുള്ള അനാരോഗ്യാവസ്ഥയുള്ള കിഡ്നി ആണെങ്കിൽ അമിതമായി ശരീരത്തിലെത്തുന്ന വെള്ളം പുറത്തേക്ക് കളയാൻ കഴിയാത്ത അവസ്ഥയുണ്ടാകും. ഈ അവസ്ഥയിൽ അമിതമായി വെള്ളം കുടിച്ചുകൊണ്ടിരിക്കുന്നത് ശരീരത്തിൻറെ പല ഭാഗങ്ങളിൽ വെള്ളം കെട്ടിനിൽക്കാനും കാരണമാകുകയും കൂടുതൽ ഗുരുതരമായ ആരോഗ്യ പ്രശ്നങ്ങളിലേയ്ക്ക് നയിക്കുകയും ചെയ്യും.

ചിലർ അമിതമായി വെള്ളം കുടിയ്ക്കുന്നതിന് കാരണം പ്രത്യേകതരം മാനസികാവസ്ഥയാണെന്ന് കണ്ടെത്തിയിട്ടുണ്ട്. സൈക്കോജെനിക് പോളിഡിപ്സിയ എന്നാണ് ഈ മാനസികാവസ്ഥ അറിയപ്പെടുന്നത്. ശരീരത്തിൽ ജലാംശം അമിതമാകുന്നതിനാൽ ശരീരത്തിൻറെ തുലനാവസ്ഥ നഷ്ടപ്പെടുന്ന സാഹചര്യം ഉണ്ടാകാറുണ്ട്, ചിലരിൽ അമിതമായ ആശങ്ക, അകാരണമായ അസ്വസ്ഥത, ചർദ്ദി പോലുള്ള പ്രശ്നങ്ങളും ഉണ്ടാകും.

ഹൈപ്പൊനാട്രെമിയ:
അമിതമായ ജലാംശം കാരണം രക്തത്തിലെ ഉപ്പിൻറെ അളവ് ക്രമാതീതമായി കുറയുന്ന അവസ്ഥായാണ് ഹൈപ്പൊനാട്രെമിയ. ഇത് തലകറക്കം പോലുള്ള പല തരം അസ്വസ്ഥതകൾ സൃഷ്ടിക്കും. വൃക്ക, കരൾ, ഹൃദയം, പിറ്റ്യൂട്ടറി ഗ്രന്ഥി എന്നിവയുടെ പ്രവർത്തനങ്ങളിലെ തകരാറുകൾ കാരണവും ശരീരത്തിൽ അമിതമായ അളവിൽ വെള്ളം നിലനിൽക്കാൻ കാരണമാകും.

അമിത ജലാംശവും നിർജ്ജലീകരണവും:
ശരീരത്തെ നിര്ജ്ജീകരണം എങ്ങനെ ദോഷകരമായി ബാധിക്കുന്നുവോ അതിനേക്കാൾ രൂക്ഷമാണ് അമിതമായി ശരീരത്തിൽ ജലാംശം നിലനിൽക്കുന്ന അവസ്ഥ. ദിവസം കുറഞ്ഞത് 8 ഗ്ലാസ്‌ വെള്ളമെങ്കിലും കുടിച്ചിരിക്കണം എന്നാണ് പൊതുവേ പറയാറുള്ളത്. എന്നാൽ ഒരാൾക്ക് ഒരു ദിവസം എത്ര വെള്ളം ആവശ്യമാണ്‌ എന്നത് ഓരോ വ്യക്തികളുടെയും ശാരീരികാവസ്ഥ, കാലാവസ്ഥ, ശാരീരികാധ്വാനം എന്നിവയ്ക്കനുസരിച്ച് വ്യത്യാസപ്പെടും.

പ്രായം, കഴിക്കുന്ന ഭക്ഷണത്തിലെ പോഷകങ്ങളുടെ അളവ്, ശരീര ഭാരം, വ്യായാമ രീതി എന്നിവ കൂടി പരിഗണിച്ചു വേണം ആവശ്യമായ വെള്ളത്തിന്റെ അളവ് തീരുമാനിക്കാൻ.

ആരോഗ്യകരമായ അളവിൽ ജലാംശം നിലനിർത്താൻ
ശരീരത്തിൻറെ പ്രവർത്തനങ്ങൾ മികച്ച രീതിയിൽ നടക്കണമെങ്കിൽ അമിത ജലാംശം, നിർജ്ജലീകരണം എന്നീ രണ്ട് അവസ്ഥകളും ഉണ്ടാകാൻ പാടില്ല. ഇവയ്ക്കിടയിലുള്ള ആരോഗ്യകരമായ ജലാംശം നിലനിർത്താൻ ചില കാര്യങ്ങൾ ശ്രദ്ധിക്കാം:

> ചെറിയ അളവ് വെള്ളം ഇടയ്ക്കിടെ കുടിയ്ക്കാം. ഒരുപാട് സമയം വെള്ളം കുടിയ്ക്കാതിരിക്കുകയും പിന്നീട് ഒരു വലിയ അളവ് വെള്ളം ഒരുമിച്ച് കുടിയ്ക്കുന്നത് തികച്ചും അനാരോഗ്യകരമായ പ്രവണതയാണ്.

> ജലാംശം അടങ്ങിയ പഴങ്ങളും പച്ചക്കറികളും ധാരാളമായി കഴിക്കാം. കുക്കുംബർ, തക്കാളി, സ്ട്രോബറി, തണ്ണിമത്തൻ എന്നിവ ഉൾപ്പെടുത്താം.

> ഉപ്പിൻറെ ഉപയോഗം പരമാവധി കുറയ്ക്കാം

> സോഡിയം, മഗ്നീഷ്യം, പൊട്ടാസ്യം, ക്ലോറിൻ എന്നിവ കൂടുതലടങ്ങിയ പഴങ്ങളും പച്ചക്കറികളും പതിവായി കഴിക്കാൻ ശ്രദ്ധിക്കണം.