കൊച്ചി: ഓണവിപണി ലക്ഷ്യമിട്ട് വിലക്കിഴിവുകൾ പ്രഖ്യാപിച്ച് ലെനോവോ. കമ്പ്യൂട്ടറുകൾക്കും സ്മാർട് ഉപകരണങ്ങൾക്കും നൽകുന്ന സേവനങ്ങൾക്കാണ് ഇളവ് പ്രഖ്യാപിച്ചിരിക്കുന്നത്. 11,089 രൂപയുടെ ലെനോവോ സേവനങ്ങൾക്ക് ഓണം പ്രമാണിച്ച് വെറും 2099 രൂപ നൽകിയാൽ മതി. ഉത്പന്നങ്ങൾക്ക് ഒരു വർഷത്തെ അധിക വാറന്റി, മൂന്ന് വർഷത്തെ പ്രീമിയം പരിചരണം, ഒരു ലെനോവോ ഹെഡ്സെറ്റ് എന്നിവയാണ് ഈ ഓഫറിലൂടെ ലഭ്യമാവുക. ഓഗസ്റ്റ് അവസാനം വരെയാണ് ഓഫർ.
ഏറ്റവും മികച്ച ഉപഭോക്താക്കൾ ഉള്ള വിപണിയാണ് കേരളം എന്നും, ഉപഭോക്താക്കളുടെ താൽപ്പര്യത്തിന് ഊന്നൽ നൽകിയുള്ള പ്രവർത്തനങ്ങളിലൂടെ കഴിഞ്ഞ സാമ്പത്തിക വർഷത്തിൽ രണ്ടിരട്ടി വളർച്ച കമ്പനിക്ക് കൈവരിക്കാനായെന്നും ലെനോവോ ഇന്ത്യയുടെ സൗത്ത് വെസ്റ്റ് കൺസ്യൂമർ വിഭാഗം തലവനായ വിജയ് ശർമ്മ പറഞ്ഞു.
നടപ്പ് പാദത്തിൽ സംസ്ഥാനത്ത് നാല് എക്സ്ക്ലൂസീവ് സ്റ്റോറുകൾ കൂടി തുറക്കാൻ ഒരുങ്ങുകയാണ് ലെനോവോ. നിലവിൽ കേരളത്തിൽ പേഴ്സണൽ കമ്പ്യൂട്ടർ വ്യാപാരത്തിൽ രണ്ടാമതുള്ള കമ്പനി പുതിയ സ്റ്റോറുകളിലൂടെ ചില്ലറ വില്പന രംഗത്ത് മുന്നേറാൻ ലക്ഷ്യമിടുന്നുവെന്ന് ലെനോവോ വാർത്താകുറിപ്പിൽ പറഞ്ഞു. നടപ്പ് സാമ്പത്തിക വർഷത്തിന്റെ അവസാനത്തോടെ കേരളത്തിൽ പതിനാറ് സ്റ്റോറുകൾ തുറക്കുകയാണ് കമ്പനിയുടെ ലക്ഷ്യം. തിരുവനന്തപുരം, കൊച്ചി, തൃശൂർ, കോഴിക്കോട് ഉൾപ്പെടെയുള്ള നഗരങ്ങളിലാണ് പുതിയ സ്റ്റോറുകൾ വരിക.
