റിയോ
കോപ അമേരിക്ക ഫുട്ബോളിൽ ബ്രസീൽ–-അർജന്റീന സ്വപ്നഫൈനലിന് സാധ്യതയേറുന്നു. സെമിയിൽ ബ്രസീൽ നാളെ പെറുവിനെ നേരിടുകയാണ്. അർജന്റീന ബുധനാഴ്ച കൊളംബിയയുമായും ഏറ്റുമുട്ടും. ഞായറാഴ്ചയാണ് ഫൈനൽ.
നിലവിലെ ചാമ്പ്യൻമാരായ ബ്രസീൽ കിരീടം നിലനിർത്താനുള്ള ഒരുക്കത്തിലാണ്. നെയ്മറുടെ കുതിപ്പിൽ അവർ സെമിവരെ വലിയ വെല്ലുവിളികളില്ലാതെ മുന്നേറി. സെമിയിലെ എതിരാളികളായ പെറുവിനെ ഗ്രൂപ്പ് ഘട്ടത്തിൽ നാല് ഗോളിന് തകർത്തിട്ടുണ്ട്. നെയ്മറായിരുന്നു ആ കളിയിൽ നിറഞ്ഞാടിയത്. എന്നാൽ, പെറു അതിനുശേഷം ഏറെ മാറി. 2–-1ന് കൊളംബിയയെ വീഴ്ത്തി. തകർപ്പൻ പ്രകടനവുമായി ക്വാർട്ടറിൽ എത്തിയ പരാഗ്വേയെ ഷൂട്ടൗട്ടിൽ മടക്കി.
ഇറ്റാലിയൻ വംശജനായ ജിയാൻലൂക ലപാദുലയാണ് പെറുവിന്റെ പ്രധാന താരം. 2016 കോപയിൽ ബ്രസീലിനെ അട്ടിമറിച്ചിട്ടുണ്ട് പെറു. നെയ്മറാണ് ബ്രസീലിന്റെ താളം. ചിലിയുമായുള്ള ക്വാർട്ടറിൽ ചുവപ്പുകാർഡ് കിട്ടിയ ഗബ്രിയേൽ ജെസ്യൂസിന് നാളെ കളിക്കാനാകില്ല.
