ന്യൂഡല്ഹി> മുന് കേന്ദ്രമന്ത്രിയും രാഹുല്ഗാന്ധിയുടെ വിശ്വസ്തനുമായിരുന്ന കോണ്ഗ്രസ് നേതാവ് ജിതിന് പ്രസാദ ബിജെപിയില് ചേര്ന്നു. പാര്ട്ടി ആസ്ഥാനത്തെത്തിയാണു അംഗത്വം എടുത്തത്.
നേരത്തെ ജിതിന് പ്രസാദ കേന്ദ്ര മന്ത്രി പിയുഷ് ഗോയലിനെ കണ്ടതായി ദേശീയ മാധ്യമങ്ങള് റിപ്പോര്ട്ട് ചെയ്തിരുന്നു. ബംഗാളിന്റെ ചുമതലയുള്ള എ ഐ സി സി ജനറല് സെക്രട്ടറിയായിരുന്നു ഇദ്ദേഹം.
രാജ്യത്തെ ഒരേയൊരു ദേശീയ പാര്ട്ടി ബി ജെ പിയാണെന്നാണ് അംഗത്വം സ്വീകരിച്ചു കൊണ്ട് ജിതിന്പ്രസാദ പറഞ്ഞത്. ഒരു പ്രധാന കോണ്ഗ്രസ് നേതാവ് ജൂണ് 9ന് ബി ജെ പിയില് ചേരുമെന്ന് നേരത്തെ പാര്ട്ടി വക്താവ് അനില് ബലൂനി ട്വീറ്റ് ചെയ്തിരുന്നു. 20 വര്ഷത്തോളമായി ജിതിന് പ്രസാദയ്ക്ക് പാര്ട്ടിയുമായുള്ള ഇടച്ചില് രഹസ്യമല്ല.
2019ല് ബി ജെ പിയില് ചേരുന്നുവെന്നുള്ള റിപ്പോര്ട്ടുകളുണ്ടായിരുന്നെങ്കിലും അദ്ദേഹം തന്നെ അത് നിഷേധിച്ച് രംഗത്തെത്തിയിരുന്നു.നേതൃത്വത്തിനെതിരെ സോണിയാ ഗാന്ധിക്കു കത്തെഴുതിയ കോണ്ഗ്രസ് നേതാക്കളില് ജിതിന് പ്രസാദയുമുണ്ടായിരുന്നു. ഇതിന് ശേഷം പ്രസാദയെ കോണ്ഗ്രസിലെ പ്രവര്ത്തനങ്ങളില് നിന്ന് മാറ്റി നിര്ത്തിയിരുന്നു.
ഇന്ത്യന് സെകുലര് ഫ്രണ്ടുമായി കോണ്ഗ്രസ് സഖ്യമുണ്ടാക്കിയതിനെതിരെയും ജിതിന് പ്രസാദ പരസ്യമായി വിമര്ശനമുന്നയിച്ചിരുന്നു.രാഹുല് ഗാന്ധിയുമായി അടുത്ത ബന്ധമുണ്ടായിരുന്ന ജിതിന് പ്രസാദ മന്മോഹന് സിംഗ് സര്ക്കാരിന്റെ കാലത്തായിരുന്നു കേന്ദ്രമന്ത്രിയായിരുന്നത്.
