മലപ്പുറം
കേരള പൊലീസ് ഫുട്ബോൾ ടീമിന്റെ മാനേജരായി മുൻ സന്തോഷ് ട്രോഫി താരം ഹബീബ് റഹ്മാനെ നിയമിച്ചു. എംഎസ്പി അസി. കമാൻഡന്റായ അദ്ദേഹം നിലവിൽ ടീമിന്റെ അസി. മാനേജരാണ്. മാനേജരായിരുന്ന അബ്ദുൾ കരീം വിരമിച്ചതോടെയാണ് ഹബീബിനെ ചുമതല ഏൽപിച്ചത്. നിലമ്പൂർ എംഎസ്പി ക്യാമ്പിലാണ് പൊലീസ് ടീമിന്റെ പരിശീലനം. പുതുതായെത്തിയ ഏഴു പേരടക്കം 30 താരങ്ങൾ ടീമിനൊപ്പമുണ്ട്.
സന്തോഷ് ട്രോഫിയിൽ അഞ്ചുതവണ കേരളത്തിനായി ബൂട്ടണിഞ്ഞ ഹബീബ് റഹ്മാൻ ജൂനിയർ ഇന്ത്യൻ ടീമിൽ കളിച്ചാണ് ശ്രദ്ധേയനാകുന്നത്. മമ്പാട് എംഇഎസ് കോളേജിൽ പഠിക്കുമ്പോൾ കലിക്കറ്റ് സർവകലാശാല ടീമിനും ജഴ്സിയണിഞ്ഞു. 1990ൽ ഹെഡ് കോൺസ്റ്റബിളായാണ് പൊലീസ് ടീമിലെത്തുന്നത്. അരീക്കോട് സ്വദേശിയാണ്. 2002 വരെ പൊലീസ് ടീമിന്റെ മുന്നേറ്റനിരയിലെ സജീവ സാന്നിധ്യമായിരുന്നു. ടീമിനെ മികവുറ്റതാക്കാൻ ശ്രമിക്കുമെന്ന് അദ്ദേഹം പറഞ്ഞു.
