ന്യൂഡൽഹി
ഹരിയാനയിലെ ഹിസാറിൽ പൊലീസ് ഭീകരത വകവയ്ക്കാതെ കർഷകർ പ്രതിഷേധിച്ചു. ലാത്തിച്ചാർജും കള്ളക്കേസും വഴി പ്രതിഷേധം അടിച്ചമർത്താനുള്ള ബിജെപി സർക്കാരിന്റെ ശ്രമം പൊളിഞ്ഞു.
ആയിരക്കണക്കിനു കർഷകരുടെ ചെറുത്തുനിൽപ്പിനു മുന്നിൽ പൊലീസ് പിന്തിരിഞ്ഞു.കേന്ദ്ര–-സംസ്ഥാന സർക്കാരുകളുടെ നയങ്ങളിൽ പ്രതിഷേധിച്ച കർഷകർക്കുനേരെയാണ് പൊലീസ് അതിക്രമം ഉണ്ടായത്.
അഖിലേന്ത്യ കിസാൻസഭ പ്രസിഡന്റ് ഡോ. അശോക് ധാവ്ളെ, ഫിനാൻസ് സെക്രട്ടറി പി കൃഷ്ണപ്രസാദ്, ഹരിയാന കിസാൻസഭ പ്രസിഡന്റ് ഫൂൽസിങ്, സെക്രട്ടറി സുമിത്, ഇന്ദർസിങ് സിങ് എന്നിവർ പ്രതിഷേധത്തിനു നേതൃത്വം നൽകി.
