ന്യൂഡൽഹി
രാജ്യത്ത് കോവിഡ് വാക്സിനേഷൻ മന്ദഗതിയിൽ. 24 മണിക്കൂറിനിടെ കുത്തിവച്ചത് 20.24 ലക്ഷം പേർക്ക് മാത്രം. രജിസ്റ്റർ ചെയ്ത് കാത്തിരിക്കുന്നവരുടെ എണ്ണം 19.31 കോടിയായി . ആകെ കുത്തിവയ്പ്പുകളുടെ എണ്ണത്തേക്കാൾ കൂടുതൽ പേർ കാത്തിരിപ്പിലാണ്. രജിസ്റ്റർ ചെയ്തിരിക്കുന്നവരിൽ 6.18 കോടി പേർ 18 നും 45 നും ഇടയിൽ പ്രായക്കാരാണ്. 13.12 കോടി പേർ 45 ന് മുകളിൽ പ്രായക്കാരും. 18–- 45 പ്രായക്കാരിൽ 2.95 ലക്ഷം പേർക്ക് മാത്രമാണ് ഇതുവരെയായി ഒരു ഡോസ് ലഭിച്ചിട്ടുള്ളത്.
സംസ്ഥാനങ്ങൾക്ക് നൽകുന്ന ഡോസുകളുടെ എണ്ണത്തിൽ പുരോഗതിയില്ല. 17.56 കോടി ഡോസ് സംസ്ഥാനങ്ങൾക്ക് കൈമാറി . സംസ്ഥാനങ്ങളുടെ പക്കൽ ശേഷിക്കുന്നത് 72.42 ലക്ഷം ഡോസ് മാത്രമാണ്. മൂന്ന് ദിവസത്തിനുള്ളിൽ 1.84 ലക്ഷം ഡോസ് വാക്സിൻ കേരളത്തിന് നൽകുമെന്നാണ് അറിയിച്ചിട്ടുള്ളത്. ഞായറാഴ്ച രാവിലെവരെയുള്ള കണക്കുപ്രകാരം കേരളത്തിലെ കുത്തിവയ്പ്പുകൾ 79.34 ലക്ഷമെത്തി.
