മസ്കത്ത് > മദ്രസ വിദ്യാർത്ഥികളുടെ നബിദിന ആഘോഷത്തിൽ കൗതുകമായി രക്ഷിതാക്കളുടെ ദഫ് പ്രദർശനം. മസ്കത്തിലെ മബേല ശിഹാബ് തങ്ങൾ സ്മാരക ഹയർ സെക്കൻഡറി ഖുർ ആൻ മദ്രസ്സയിലെ വിദ്യാർത്ഥികളുടെ രക്ഷിതാക്കളുടെ ടീം ആയ ഖുർതുബയാണ് ദഫ് നടത്തിയത്. മബെല അഫ്റാ പാലസ് ഓഡിറ്റോറിയത്തിൽ നടന്ന മീലാദ് ഫെസ്റ്റിൽ മദ്രസ്സ വിദ്യാർത്ഥികളുടെ വിവിധ കലാസാഹിത്യ മത്സരവും നബിദിന റാലിയും നടന്നു.
5, 7, 10 ക്ലാസുകളിലെ പൊതു പരീക്ഷയിൽ ഇന്നതവിജയം നേടിയ വിദ്യാർത്ഥികൾക്കുള്ള ഉപഹാരങ്ങൾ പരിപാടിയിൽ സമ്മാനിച്ചു. ‘അസ്മാഉൽ ഹുസ്ന’ 48 സെക്കൻഡിൽ പറഞ്ഞു തീർത്തതിന് ഏഷ്യ ബുക്ക് ഓഫ് റെക്കോഡിൽ ഇടം നേടിയ മദ്രസയിലെ ഒന്നാം ക്ലാസ്സ് വിദ്യാർത്ഥിനി നോഹാ സൈനബിന് ശൈഖ് ജമീൽ ഉപഹാരം നൽകി.
മസ്കത്ത് കെഎംസിസി സെക്രട്ടറി ഉസ്മാൻ പന്തല്ലൂർ ഉദ്ഘാടനം ചെയ്തു. മദ്രസ കമ്മിറ്റി പ്രസിഡന്റ് സയ്യിദ് എ കെ കെ തങ്ങൾ അധ്യക്ഷനായി. ഒമാനി പൗരപ്രമുഖൻ ശൈഖ് ജമീൽ മുഖ്യാതിഥിയായി പങ്കെടുത്തു. മുസ്തഫ റഹ്മാനി മുഖ്യ പ്രഭാഷണം നിർവഹിച്ചു. ഇബ്രാഹിം ഒറ്റപ്പാലം,ഹുസൈൻ വയനാട്,സലീം അന്നാര,യാക്കൂബ് തിരൂർ,ഇബ്രാഹിം ലുലു, എം ടി അബൂബക്കർ, ഖാലിദ് കുന്നുമ്മൽ, ഗഫൂർ താമരശ്ശേരി, അബൂബക്കർ പറമ്പത്ത്, ഹമീദ് അൽഖൂദ്, റഫീഖ് ശ്രീകണ്ഠപുരം, അമീർ കാവനൂർ, ഷാഫി കോട്ടക്കൽ, റിയാസ് മത്രാ , നൗഷാദ് മുസന്ന, മുർഷിദ് തങ്ങൾ,മൻസൂർ അലി, അഷ്റഫ് പൊയ്ക്കര എന്നിവർ പങ്കെടുത്തു.
