സിഡ്‌നി: സിഡ്‌നിക്കു സമീപം ഡുബ്ബോയില്‍ വീടിന് തീപിടിച്ച് മലയാളി നഴ്‌സിന് ദാരുണാന്ത്യം. മുംബൈയില്‍ താമസിക്കുന്ന കൊല്ലം കുണ്ടറയില്‍നിന്നുള്ള കുടുംബത്തിലെ അംഗമായ ഷെറിന്‍ ജാക്‌സണ്‍ (34) ആണ് മരിച്ചത്.
അതീവ ഗുരുതരാവസ്ഥയില്‍ ഡുബ്ബോ ആശുപത്രിയില്‍ വെന്റിലേറ്ററിലായിരുന്നു. ഡുബ്ബോ ആശുപത്രിയില്‍ നഴ്‌സായിരുന്നു. രക്ഷാപ്രവര്‍ത്തനത്തിന് എത്തിയ അഗ്നിശമന സേനാംഗവും പരിക്കേറ്റ് ചികിത്സയിലാണ്.
പുലര്‍ച്ചെയാണ് ദാരുണമായ സംഭവമുണ്ടായത്. സംഭവം നടക്കുമ്പോള്‍ ഭര്‍ത്താവ് ജാക്‌സണ്‍ ജോലി ആവശ്യാര്‍ത്ഥം പുറത്തായിരുന്നു.
രണ്ടു നിലയുള്ള വീട്ടില്‍ ഷെറിന്‍ മാത്രമാണ് ഉണ്ടായിരുന്നത്. ടെക്‌സ്‌റ്റൈല്‍ എന്‍ജിനീയറായ ജാക്‌സണ്‍ പത്തനംതിട്ട കൈപ്പട്ടൂര്‍ സ്വദേശിയാണ്. തീപിടിത്തം എങ്ങനെ ഉണ്ടായി എന്നതു സംബന്ധിച്ച് പോലീസ് അന്വേഷണം പുരോഗമിക്കുകയാണ്.
