ശിവമോഗ
കർണാടകത്തിൽ അഞ്ചാം ക്ലാസുകാരായ മുസ്ലിം വിദ്യാർഥികളോട് പാകിസ്ഥാനിലേക്ക് പോകാൻ ആക്രോശിച്ച് അധ്യാപിക. ശിവമോഗ ടിപ്പു നഗറിലെ സ്കൂളിലെ അധ്യാപിക മഞ്ജുളാദേവിയെ പരാതിയെ തുടർന്ന് സ്ഥലംമാറ്റി. ക്ലാസിൽ വഴക്കുണ്ടാക്കിയ രണ്ട് മുസ്ലിം വിദ്യാർഥികളോടായിരുന്നു അധ്യാപികയുടെ പരാമർശം. ‘ഇത് നിങ്ങളുടെ രാജ്യമല്ല. ഇത് ഹിന്ദുക്കളുടെ രാജ്യമാണ്. നിങ്ങൾ പാകിസ്ഥാനിലേക്ക് പോകണം.’–- എന്ന് മഞ്ജുളാദേവി മുസ്ലിം വിദ്യാർഥികളെ അധിക്ഷേപിച്ചെന്നാണ് ശിവമോഗയിലെ ജെഡിഎസ് നേതാവ് എ നസ്റുള്ള പരാതിയിൽ ചൂണ്ടിക്കാട്ടിയത്. പരാതിയിൽ വകുപ്പുതല അന്വേഷണം തുടങ്ങിയതായി വിദ്യാഭ്യാസ വകുപ്പ് അറിയിച്ചു.
ഉത്തർപ്രദേശിലെ മുസഫർ നഗറിൽ മുസ്ലിം വിദ്യാർഥിയെ ഇതര മതസ്ഥരായ സഹപാഠികളെക്കൊണ്ട് അധ്യാപിക തല്ലിക്കുന്ന വീഡിയോ ഒരാഴ്ച മുമ്പ് പുറത്തുവന്നിരുന്നു. അതിൽ രാജ്യവ്യാപകമായി വലിയ പ്രതിഷേധം നിലനിൽക്കുന്നതിനിടെയാണ് കർണാടകത്തിലെ സംഭവം.
